83
Chuaq Broq ca Mangai Git 'Bìq Manhài
Asap Achìh
1 Waiq Boc Plình, xìn Ìh paq hatenh! Xìn Ìh paq ùh capoch cleq,
xìn Ìh paq ŏi aiq.
2 Ma jah 'màng aih, wì ma tagit ca Ìh khoi tagrùang tagràt,
wì ma git ca Ìh khoi dèch dèh gàu.
3 Wì khoi pađim ca dabau chaq trong tajraq hlài ca jàn Ìh,
wì khoi hatình ca dabau broq raliang ca wì mangai Ìh ma wèq ngan.
4 Wì haq khoi doi: “Beq bèn lam trùh jêh đac dìq jàn Diac aih,
đòiq ùh i ca mangai leq hmàng ca hiniq Is-ra-ên hòm.”
5 Ma jah 'màng aih wì haq pajùm mòiq manoh tajraq hlài ca Ìh.
Wì haq khoi pachac ca dabau tajraq hlài ca Ìh.
6 Aih jàn Êđôm, Ich-ma-ên,
Moap wa Hagri;
7 Ghêban, Amôn, A-ma-lec,
Phi-li-tin wa jàn Tirò;
8 Jàn A-si-ri hadai pajùm
ti wì haq đòiq wiang ti con xau da Lot.
9 Xìn broq ca wì haq tìah ca Ìh ma khoi broq ca Ma-đi-an,
tìah ca Si-se-ra wa Jabin ta cròng diac Kisôn,
10 wì haq ma 'bìq jêh đac ta Ên-đô-rò,
broq tìah ca ìch ta taneh.
11 Broq ca mangai gù craq da wì haq tìah ca Ôrêp wa Xê-ep,
xam dìq dŏng ca con bùa da wì haq tìah ca Xêbah wa Xan-mu-na.
12 Ma jah 'màng aih wì haq doi:
“Bèn blah yŏc ca dađeh đùng taneh da Boc Plình beq.”
13 Boc Plình da au ôi, xìn broq ca wì haq tìah ca blo jò yaq cayeo dêh
wa tìah ca manùh enh ngìa cayeo càn.
14 Tìah ca ùnh cheo bùh long rôm,
tìah ca pla ùnh cheo long wang,
15 xìn Ìh hnan wì haq xam bahùt càn,
broq ca wì haq yùq crè nhò ranhòm da Ìh.
16 Chuaq ôi, xìn Ìh broq ca hadrò wì haq bình can camaih,
đòiq wì haq creo dang ca Ìh.
17 Waiq xìn wì haq 'bìq camaih wa manhài manhèp hloi hloi,
waiq xìn wì haq jah 'bìq paha'neq wa 'bìq jêh đac.
18 Đòiq wì haq jah loq toq Ìh raq Chuaq,
hiniq Ìh aih Chuaq ma Yi Ha'nhèq, wa wèq cwìang crŏng taneh.