84
Ngèh Enh Ŏi ta Hnem Cùh Waiq
Con Calô da Côra Achìh
1 Waiq Chuaq ma wèq dìq ca 'bình plình,
nòi ŏi da Ìh joq 'nàng lem lình dìq jaq!
2 Mahua yiang au ngèh enh jah ŏi ta xàn hnem cùh waiq da Chuaq;
mahua yiang au wa chac hamac au jah calêu lem bùi ca Boc Plình ma rìh hloi.
3 Waiq Chuaq ma i cwìang itai,
Ìh Bùa da au, Ìh Boc Plình da au,
chìm xê xôq chaq jah ca dađeh mòiq nòi ŏi,
wa chìm plahaiq hadai chaq jah pù dèh
ca lù con ŏi haten ca ca'bŏng tadreo da Chuaq.
4 Xôq ramŏt ca mangai leq jah ŏi ta hnem Ìh,
wì haq jah calêu padèch Ìh hloi hloi.
5 Xôq ramŏt ca mangai leq jah i can tadêh ŏi ta Ìh,
wa ta manoh i trong lam trùh Jê-ru-sa-lem.
6 Jò wì haq lam cwa thòng Baca, thòng wang crò hmoi,
wì broq ca nòi aih loh ca i diac tamŏc;
mè loh xrŏih hadai ùc 'noh xôq ramŏt bình hlùih ta aih.
7 Wì haq rai lam, can tadêh èh rai tŏc,
trùh jò rìm ngai dìq jah yòng enh ngìa ca Boc Plình ta Jê-ru-sa-lem.
8 Ôi Chuaq, Boc Plình ma wèq dìq ca 'bình plình,
xìn tamàng bàu waiq dang da au;
waiq Boc Plình da Jacôp xìn halang don tamàng.
9 Waiq Boc Plình ôi, Ìh joq 'nàng khìan da nhèn,
xìn am xôq ca mangai khoi xùt dàu da Ìh.
10 Ma jah 'màng aih, au enh waq broq mangai gòm rap 'mang hnem
cùh waiq Ìh, mòiq hì yi hnao ca 1.000 hì ta nòi 'noiq;
au enh broq mangai gòm ngo hnem cùh waiq da Boc Plình
yi hnao ca ŏi ta hnem mangai ngang dù.
11 Ma jah 'màng aih Chuaq,
Boc Plình Haq mat mahì wa khìan.
Haq am xôq ramŏt wa bìac 'ngah 'ngai;
Chuaq ùh tàt khech đac bìac lem leq da mangai rìh lem jang.
12 Ôi Chuaq ma wèq dìq ca 'bình plình,
xôq ramŏt ca mangai leq lùi canòm Ìh.