89
Bàu Wêh Jao da Chuaq wa Can Nan Xa da Is-ra-ên
Êthan Mangai Êtra Achìh
1 Au jah calêu padèch can xa-ŏch xam manoh loq waq da Chuaq hloi hloi,
hacùng au jah anoi 'noh bìac loq wèq dèh bàu da Haq rìm 'nhòng.
2 Ma jah 'màng aih au jah doi, can xa-ŏch xam manoh loq waq da Chuaq cajap hagao trùh hloi hloi,
bìac loq wèq dèh bàu da Haq cajap hagao tìah ca xèm plình.
3 “Au khoi broq wêh jao ca mangai Au khoi ràih,
Au khoi pachac ca Đawit hapŏng da Au, doi:
4 ‘Au jah dèch xinoi ìh đòiq broq bùa hloi hloi;
Au jah broq cajap gèq bùa da ìh rìm 'nhòng.’ ”
5 Chuaq ôi, 'bài lòp plình jah calêu bìac halac da Ìh.
bìac loq wèq dèh bàu da Ìh hadai jah calêu ta'ne 'bài tagop Hadròih.
6 Ma jah 'màng aih i cabô ŏi ta plình jah achùa ca Chuaq?
I ca kiac loq yiang leq nui dàng Haq.
7 Boc Plình jah padèch ha'nhèq, ta tagop pajùm da 'bài mangai Hadròih,
Haq Yiang dìq jaq càn caiq
wa đang ca Yùq crè yi hnao ca yiang ma ŏi dudan ca Haq.
8 Waiq Chuaq ma wèq dìq ca 'bình plình,
cabô i cwìang itai yi hnao ca Ìh?
Bìac loq wèq dèh bàu da Ìh dudan ca Ìh.
9 Ìh wèq cwìang diac raxìq tŏc càn, jò lai laq càn tŏc dêh,
Chuaq broq jah rangàt.
10 Chuaq jôiq bahech Rahap, aih Diac Aicàp, tìah ca hanang cachìt,
Chuaq dèch tì cwìang itai da Haq jêh dìq ca wì ma git ca Haq.
11 'Bài lòp plình aih da Chuaq, taneh hadai da Haq,
Chuaq broq loh plình crŏng taneh wa rìm bìac ŏi ta aih.
12 Chuaq broq loh pah 'ngeo ca mat mahì loh wa pah 'ma ca mat mahì loh;
Wang Tabô wang Hetmôn dìq dèch bàu dêh calêu manè pôi Chuaq.
13 Tì da Chuaq i cwìang itai, ca piang tì Chuaq i padren dêh,
tì pah 'ma da Chuaq dèch ha'nhèq.
14 Bìac ta-atoq wa trong lem jang aih raq xèm da gèq bùa da Haq,
can xa-ŏch xam manoh loq waq wa bìac loq wèq dèh bàu lam adroi ca Haq.
15 Xôq ramŏt ca jàn leq loq dèch bàu calêu lem bùi ta hì lè calêu padèch hiniq Chuaq;
Waiq Chuaq, wì haq jah cadiang lam ti trong can 'ngah da Chuaq.
16 Xèq ca hì wì lam bùi ta hiniq Chuaq,
wa nhò bìac ta-atoq da Chuaq wì haq jah padèch ha'nhèq.
17 Ma jah 'màng aih cla Ìh bìac 'ngah 'ngai wa padren dêh da wì haq;
nhò bìac xôq da Ìh aki da nhèn jah dèch ha'nhèq.
18 Ma jah 'màng aih khìan nhèn aih khìan da Chuaq,
Haq bùa da nhèn wa Chuaq Hadròih da Is-ra-ên.
19 Calah nèh Chuaq hnài
con mangai cwa bìac am hnoq; Chuaq doi:
“Au khoi am padren ca mòiq lình tanuq,
Au padèch ha'nhèq mangai au khoi ràih ŏi ta'ne jàn.
20 Au khoi chaq hnoq Đawit, hapŏng da Au,
Au khoi xùt dàu Hadròih ca Haq.
21 Au ŏi ti haq,
Au am padren ca haq.
22 Wì ma git ca haq ùh jah padit haq,
mangai ngang dù hadai ùh jah baxa haq wa jù lê haq.
23 Au jah jêh đac wì ma tagit ca haq enh ngìa ca haq,
wa raliang đac wì ma git ca haq.
24 Manoh wèq dèh bàu wa can xa-ŏch xam manoh loq waq da au ŏi ti haq,
nhò hiniq au aki haq jah dèch ha'nhèq.
25 Au jah am ca tì haq wèq diac raxìq,
wa tì pah 'ma haq wèq rìm cròng diac.
26 Haq jah doi ca au: ‘Ìh baq au,
Boc Plình da au wa hmu càn da au.’
27 Au dèch haq broq con ramua,
haq broq bùa mahaq bùa ma yi càn ca bùa ta crŏng taneh.
28 Au wèq can xa-ŏch xam manoh loq waq da Au ca haq hloi hloi,
wêh jao da Au wa haq jah cajap.
29 Au jah broq cajap hagao xinoi haq hloi hloi,
wa gèq bùa da haq jah i hloi hloi tìah ca hì ta Diac Plình.
30 “Tàng con xau da haq,
cađac ranenh wa bàu thê da Au,
31 Tàng wì haq broq ùh troq ca ranenh Au
wa trong hnài da Au.
32 Au jah yŏc long dùi đòiq baxa bìac tôiq ma wì haq khoi broq
wa long roi đòiq baxa bìac ngang dù da wì haq.
33 Mahaq Au ùh cađac can xa-ŏch xam manoh loq waq Au ca haq;
Au hadai ùh blàq blènh bìac wèq dèh bàu khoi hùaq ca haq.
34 Au ùh blàq hlài bìac wêh jao da Au khoi broq ca haq,
hadai ùh halìh hlài ma khoi anoi loh enh hacùng Au.
35 Canòm khoi ca hiniq Hadròih da Au,
Au khoi pachac mòiq yàng aih khoi tôm tàu,
Au ùh capoch amòng ca Đawit.
36 xinoi haq jah ŏi i hloi hloi;
gèq bùa haq jah dùnh tìah ca mahì enh ngìa ca Au.
37 Gèq bùa aih jah cajap hloi hloi tìah ca mat khê,
aih teo ta plình đòiq patô jah doi joq 'nàng wèq dèh bàu.”
38 Mahaq Ìh khoi 'noh đac haq.
Ìh khoi nòih ca mangai Ìh khoi xùt dàu.
39 Chuaq khoi ramòt ca wêh jao da hapŏng Haq,
Chuaq hwenh đac cadoh bùa haq ta trap amùa.
40 Chuaq raliang dìq ca panàt haq,
wa broq ca plài haq tacro dìq.
41 Rìm ngai lam ti trong dìq mùt atùng haq,
mangai haten ca haq jù lê haq.
42 Chuaq dèch tì pah 'ma mangai ma tagit ca haq,
wa broq ca mangai ma tagit ca haq jah lem bùi.
43 Chuaq broq pla chang gùm da haq tawìh hlài ta haq,
haq ùh jah yòng cajap hagao jò tajêh poh.
44 Chuaq dŏih đac bìac 'ngah 'ngai da haq,
hwenh gèq bùa da haq ta taneh.
45 Chuaq khoi baxùch đac 'bài hì jò ŏi radam da haq,
toq bìac camaih dudan ca haq.
46 Chuaq ôi, Ìh cadoc dađeh hloi hloi 'mòh?
Can nòih da Ìh xôq cheo tìah ca ùnh khàng hloi hloi 'mòh?
47 Xìn Ìh hmàng, can rìh da au dìq jaq đêq!
Taiq Ìh khoi broq loh con mangai aih dech 'ngwan 'mòh?
48 Mangai leq jah rìh hloi, ma ùh hnoq can cachìt?
Cabô jah dèch dèh can rìh claih ca tì bìac cachìt.
49 Chuaq ôi! can loq waq da Chuaq enh calah nèh,
ma Ìh khoi wèq dèh bàu pachac ca Đawit aih ta leq.
50 Waiq Chuaq, xìn hmàng hlài bìac camaih da 'bài hapŏng Ìh,
chac au pòq wê dìq ca bìac jù lê da 'bài jàn,
51 aih bìac camaih da wì mangai ma tagit
ca Ìh khoi broq đòiq broq camaih ca mangai khoi jah xùt dàu da Chuaq.
52 Chuaq ôi! hiniq da Ìh đang ca jah padèch hloi hloi!
Amen! Amen!