94
1 Ôi Chuaq, Ìh Boc Plình da bìac tabroq hlài;
Ìh Boc Plình da bìac tabroq hlài, xìn Ìh xreo 'noh 'ngah 'ngai da Ìh.
2 Ôi Chuaq ma hadrah crŏng taneh, yòng beq!
Xìn jêh chao ma tajì ca mangai ma loq catèh.
3 Ôi Chuaq, mangai ngang dù jah
lem bùi trùh jò leq cô èh?
4 Wì haq toq pa'noh bàu loq catèh,
rìm ngai mangai dù dìq loq padèch dađeh.
5 Chuaq ôi! Wì haq padit padiang con jàn da Ìh,
wì haq baxa con jàn, aih xôxech da Chuaq.
6 Wì haq jêh mangai hadrô, wa mangai tamoi 'noiq;
wì haq jêh mangai lac miq baq.
7 Wì haq doi: “Chuaq ùh jah hnoq,
Boc Plình da Jacôp ùh tamàng ngan.”
8 Ô mangai ma awàt! Phai ngan loq beq;
Ô mangai ma blùng! Trùh jò leq pì ma khôn rabiaq?
9 Haq ma khoi am ca pì don, Haq ùh jah tàng 'mòh?
Haq ma khoi am ca pì mat, Haq ùh jah hnoq 'mòh?
10 Haq ma khoi baxa jàn 'bài Diac, Haq ùh hìaq lech baxa 'mòh?
Cla Haq raq hnài con mangai bìac 'nì loq.
11 Chuaq loq manoh hèm da con mangai,
aih toq dech 'ngwan hêq, wì haq toq dech 'ngwan.
12 Ôi Chuaq, dìq jaq xôq ramŏt ca mangai leq jah Ìh lech hnài,
wa hnài haq broq tiaq ranenh Ìh;
13 Đòiq mangai aih jah catèm ta 'bài hì nan xa,
trùh jò leq ralùng jrùq khoi chìa am ca mangai ngang dù.
14 Ma jah 'màng aih Chuaq ùh cađac jàn Haq,
Haq hadai ùh cađac dèh xôxech.
15 Ma jah 'màng aih bìac hadrah ta-atoq jah wìh hlài ca tì mangai ta-atoq,
wa rìm ngai mangai i manoh jang lem jah broq tiaq.
16 Cabô yòng tiaq au đòiq tajraq hlài ca mangai dù?
Cabô ma wiang yòng tiaq au đòiq tajraq hlài ca mangai dù.
17 Tàng Chuaq khoi ùh wiang ti au, èh mahua yiang au khoi renh ŏi ta ralùng hanang.
18 Ôi Chuaq, tàng au doi: “Jènh au khoi talia,”
èh can xa-ŏch xam manoh loq waq da Chuaq jah dèch au.
19 Jò manoh au hèm lo bàc bìac,
èh can loq alòng da Chuaq palòng manoh au.
20 'Bài mangai canòm dèh ca cwìang càn, yŏc ranenh padit mangai,
mangai aih Boc plình ùh broq bua.
21 Wì haq pajùm ti dabau, raliang đac can rìh da mangai ta-atoq
wa ta'mòq jêh đac mangai ùh broq tôiq.
22 Mahaq Chuaq khoi broq nòi hanình đôn đòiq wèq ban au,
wa Boc Plình da au, Haq hmu xèm đòiq au jah hanình hlèp.
23 Boc Plình khoi ca'naih hlài bìac ngang dù ca wì haq.
Haq jah jêh đac wì haq taiq bìac ngang dù da wì haq.
Chuaq, Boc Plình da nhèn jah jêh đac wì haq.