95
1 Trùh beq đòiq bèn calêu padèch Chuaq,
padràu hau lem bùi ca Chuaq, Haq raq hmu xèm đòiq dèch claih bèn.
2 Phai trùh enh ngìa ca Haq xam bàu manè pôi;
wa padràu hau lem bùi xam bàu calêu padèch Haq.
3 Ma jah 'màng aih Chuaq, Haq Boc Plình i cwìang itai ma dìq jaq càn caiq,
Haq Bùa ma yi càn caiq dìq enh 'nhèq dìq ca 'bài can kiac.
4 Tì Haq cadop wèq 'bài ralùng jrùq da crŏng taneh;
'bài bôi ha'nhèq da wang hadai da Haq.
5 Diac raxìq, aih da Haq, ma jah 'màng aih Haq khoi broq loh diac raxìq,
taneh hadai tì Chuaq broq loh.
6 Trùh beq cùp gàu đòiq cùh waiq Haq,
hacùn cràng enh ngìa ca Chuaq,
ma jah 'màng aih Haq raq ma broq loh bèn,
7 ma jah 'màng aih Haq Boc Plình bèn;
bèn con jàn ma Haq wèq, bèn lù trìu Haq ban;
Hì cô dìq jaq ngèh enh ca pì loq tàng bàu Haq!
8 “Pì paq cadoq manoh tìah ca wì broq ta Mê-ri-ba,
tìah ca wì broq ta Masa ta đùng braih càn.
9 Aih nòi boc yaq pì thù Au; wì taleoq ca Au,
'nhac ca wì haq khoi hnoq bìac broq da Au.
10 Ta 40 hanam Au git ca 'nhòng aih.
Au doi: ‘Aih jàn i manoh lam lìq,
wì haq ùh chìuq tiaq trong lam da Au.’
11 Taiq 'màng aih jò nòih, Au doi:
‘Wì haq ùh jò leq jah mùt nòi padài da Au.’ ”