96
1 Phai calêu 'bŏi calêu neo ca Chuaq;
Dìq ca crŏng taneh ôi, calêu ca Chuaq beq.
2 Phai calêu ca Chuaq, phai padèch hiniq Haq,
rìm hì phai anoi 'noh bìac dèch claih da Haq.
3 Phai anoi bìac 'ngah 'ngai da Haq ca rìm Diac;
phai anoi bìac halac da Haq dìq ca jàn rìm Diac.
4 Ma jah 'màng aih Chuaq dìq jaq càn caiq! Haq đang ca jah manè padèch;
Haq đang ca bèn yùq crè yi hnao ca 'bài can kiac.
5 Ma jah 'màng aih, dìq dŏng can kiac da jàn Diac 'noiq,
aih dua 'mù dech 'ngwan, mahaq Chuaq khoi broq loh 'bài plình.
6 Enh ngìa ca Haq, toq bìac 'ngah 'ngai wa rahù rahìac;
ta hnem cùh waiq Haq toq bìac cwìang itai wa lem jang.
7 Dìq ca mangai ma cùh waiq dua 'mù, aih wì mangai loq catèh dèh ca dua 'mù cla, jah camaih,
ma jah 'màng aih dìq ca dua 'mù aih ep cùp gàu hacùn cràng enh ngia ca Chuaq.
8 Dèch am ca Chuaq bìac 'ngah 'ngai joq 'nàng tajì ca hiniq Haq;
'ràng trùh ngè tadreo mùt ta xàn hnem Haq.
9 Phai caxùnh yŏc eo hadròih đòiq cùh waiq Chuaq,
dìq ca crŏng taneh phai yùq crè tarìt enh ngìa ca Haq.
10 Phai anoi pa'noh ŏi ta rìm Diac, doi: “Boc Plình wèq cwìang!”
Crŏng taneh khoi jah broq cajap hagao, ùh jò leq tadroq;
Haq jah hadrah rìm jàn tiaq trong ta-atoq.
11 Ôi 'bài lòp plình lem bùi beq! Ôi plì taneh phai yŏc manoh bùi beq!
Ôi diac raxìq wa rìm ngè ma rìh ŏi ta aih, cachech bàu beq.
12 Ôi đùng taneh wa rìm bìac ta aih, khòh calêu beq!
Jò aih rìm long ta rôm wang jah calêu lem bùi enh ngìa ca Chuaq,
13 ma jah 'màng aih Chuaq 'nang trùh đòiq hadrah crŏng taneh xam bìac ta-atoq da Haq,
wa yŏc bàu joq 'nàng hadrah rìm jàn.