97
1 Boc Plình wèq cwìang, Ôi dìq ca crŏng taneh, phai padràu hau lem bùi beq,
wa dìq ca pleo ta diac raxìq khòh lem bùi.
2 Yùc wa 'mù clam habàu habùt wawenh ca Haq,
bìac ta-atoq wa bìac lem jang aih raq xèm tanam broq hagao ca gèq bùa Haq.
3 Ùnh lam adroi ca Haq
bùh dìq mangai ma tagit dudan ca Haq.
4 Camlet Haq broq đen xreo 'ngah crŏng taneh,
plì taneh hnoq loh ca tarìt.
5 Wang rôm hech bu dàng jrình enh ngìa ca Chuaq,
enh ngìa ca Chuaq da dìq ca crŏng taneh.
6 'Bài lòp plình anoi pa'noh bìac ta-atoq da Haq;
dìq ca jàn jah hnoq bìac 'ngah 'ngai da Haq.
7 Dìq ca mangai ma cùh waiq dua 'mù,
aih wì mangai loq catèh dèh ca dua 'mù cla, jah camaih,
ma jah 'màng aih dìq ca dua 'mù aih ep cùp gàu hacùn cràng enh ngia ca Chuaq.
8 Ôi Chuaq, Jê-ru-sa-lem khoi tàng, wì haq dìq jaq lem bùi,
wa con cadrì da Juđa padràu hau lem bùi ca bìac lem jang da Ìh.
9 Ma jah 'màng aih Ìh Chuaq ma wèq cwìang dìq jaq ha'nhèq ca crŏng taneh,
Ìh jah padèch yi ha'nhèq dìq ca can kiac.
10 Ô pì mangai ma loq waq ca Chuaq, git ca bìac dù beq,
Chuaq dìq jaq loq waq ca mangai git ca bìac dù,
Haq dèch wì claih khoi enh tì mangai dù.
11 Can 'ngah xreo am mangai ta-atoq,
wa bìac lem bùi pa'noh loh ca mangai lem jang.
12 Ôi mangai ta-atoq, phai lem bùi ŏi ta Chuaq beq,
wa manè pôi hiniq hadròih da Haq.