99
1 Chuaq wèq cwìang rìm Diac!
Ôi rìm jàn khòh loq yùq crè tarìt beq;
Chuaq yòng enh 'nhèq ca chê-ru-bim,
plì taneh loh ca tadroq.
2 Chuaq da Jê-ru-sa-lem dìq jaq càn caiq,
Haq jah padèch ha'nhèq ta rìm jàn ta crŏng taneh.
3 Đòiq wì haq jah calêu padèch hiniq càn caiq wa đang ca yùq crè da Haq,
Haq hadròih.
4 Bùa ma i cwìang itai loq waq bìac ta-atoq wa broq loh bìac lem jang;
Ìh khoi broq loh bìac da-adàng wa ta-atoq ta Jacôp.
5 Padèch hiniq Chuaq beq, Haq Boc Plình da bèn,
cùh waiq ta long thòt roh jènh Haq beq,
Haq hadròih.
6 Môise wa Arôn broq pajàu ta 'bài pajàu da Haq;
Sa-mu-ên, haq mòiq ngai ŏi ta 'bài mangai ma dang creo hiniq Haq;
jò wì dang creo,
Haq tèo bàu wì.
7 Ŏi ta jrang yùc Haq doi ca wì.
Haq am ca wì trong hnài wa bàu thê wì wèq tiaq aih.
8 Ôi Chuaq, Ìh Boc Plình da nhèn;
cla Ìh khoi tèo bàu wì haq;
Ìh Boc Plình ma khoi loq baxŏng tôiq ca wì,
mahaq Ìh hadai tabroq hlài ca mangai leq loq broq bìac ngang dù.
9 Padèch ha'nhèq Chuaq beq, Haq Boc Plình da bèn.
Phai cùh waiq Haq ta wang hadròih,
ma jah 'màng aih Chuaq Haq Boc Plình Hadròih.