115
1 Boc plình ôi! Ùh xài ca nhèn,
ùh xài ca nhèn mahaq ca hiniq Chuaq phai am 'ngah 'ngai,
taiq can xa-ŏch xam manoh loq waq wa taiq bàu joq 'nàng da Ìh.
2 Gleq jàn Diac 'noiq hùa doi:
“Boc Plình da wì haq ŏi ta leq?”
3 Boc Plình da bèn ŏi ta plình,
Haq broq rìm bìac cleq Haq loq enh.
4 'Bài dua 'mù da wì haq aih 'bac, wang,
aih bìac broq loh enh tì mangai.
5 'Bài dua 'mù aih i hacùng mahaq ùh loq capoch,
i mat mahaq ùh jah hnoq;
6 Wì i don mahaq ùh jah tàng,
wì i mùh mahaq ùh jah xua.
7 Wì i tì mahaq ùh mòn loq cleq,
wì i jènh mahaq ùh jah cadiang lam,
wì i trom hŏng mahaq ùh jah 'noh atêh cleq.
8 Wì mangai broq dua 'mù èh hadai tìah ca dua 'mù aih,
wa dìq ca mangai ma lùi canòm dua 'mù aih hadai 'màng aih.
9 Ôi Is-ra-ên, lùi canòm ca Chuaq beq,
taiq Haq jùp đò wì ma canòm 'màng aih wa broq khìan ca wì haq.
10 Ôi hnem da Arôn, lùi canòm ca Chuaq beq,
taiq Haq jùp đò wì ma canòm 'màng aih wa broq khìan ca wì haq.
11 Pì mangai yùq crè ca Chuaq, lùi canòm ca Chuaq beq,
taiq Haq jùp đò wì ma canòm 'màng aih wa broq khìan ca wì haq.
12 Boc Plình hèm trùh ca bèn, Haq am xôq ca bèn,
Chuaq am xôq ca hnem Is-ra-ên.
Chuaq jah am xôq ca hnem Arôn.
13 Chuaq am xôq ca mangai leq loq yùq crè ca Haq,
mangai 'yoh wa mangai càn.
14 Waiq xìn Chuaq broq ca pì jah bàc tam,
pì wa con xau pì.
15 Waiq xìn Chuaq am xôq ca pì,
Haq Chuaq ma broq plình crŏng taneh.
16 Plình ma dìq jaq ha'nhèq aih da Chuaq,
mahaq Haq am taneh ca con mangai.
17 Mangai cachìt ùh calêu padèch hiniq Chuaq,
mangai loh ta ralùng hanang hadai 'màng aih.
18 Mahaq nhèn jah calêu padèch hiniq Chuaq,
enh cô trùh hloi hloi.
Padràu hau Chuaq beq!