116
1 1 Au loq waq ca Chuaq ma jah 'mang aih Haq tàng bàu au
wa bàu waiq khàn au.
2 Taiq Haq halang don tamàng bàu au,
'màng aih Au creo dang Chuaq lùch dèh ca 'nhòng rìh au.
3 Caxi da can cachìt càt rahnich au,
bìac yùq crè da ralùng hanang trùh tì au;
au jìq xa manoh wa dìq jaq mango.
4 Taiq 'màng aih au creo dang ca Chuaq:
“Chuaq ôi, xìn dèch can rìh au jah claih.”
5 Chuaq ta-atoq wa loq am xôq ramŏt;
Boc Plình da bèn i manoh loq xa-ŏch.
6 Chuaq wèq ban mangai i manoh lùi tìah con 'yoh;
jò au khoi glàm ramòt, Haq dèch au claih.
7 Ôi mahua yiang au, wìh hlài ta can catèm ta manoh beq,
ma jah 'màng aih Chuaq khoi am bàc xôq ramŏt ca au.
8 Ma jah 'màng aih Chuaq khoi dèch mahua yiang au jah claih ca bìac cachìt,
diac mat au pi hìaq loh
wa jènh au ùh catŏih hòm.
9 Au jah cadiang lam enh ngìa ca Chuaq
ta taneh mangai rìh.
10 Au xôq lùi 'nhac ca au doi:
“Au dìq jaq nan xa.”
11 Ta jò yùq crè, au i doi:
“Dìq con mangai, wì amòng.”
12 Au yŏc cleq đòiq am hlài ca Chuaq
tiaq rìm bìac xôq ramŏt Haq khoi am ca au.
13 Au jah dèch doi chrŏng can rìh rai
dang creo ca Chuaq.
14 Au jah broq gêh dèh rìm bàu khoi pachac ca Chuaq
enh ngìa ca con jàn Haq.
15 Bìac cachìt da mangai hadròih,
aih dìq jaq lem enh ngìa ca Chuaq.
16 Chuaq ôi au cô hapŏng Ìh,
au cô hapŏng Ìh con calô da hapŏng cadrì Ìh.
Ìh khoi dèch au jah claih khoi ca long clang jènh.
17 Au jah dèch am ngè tadreo đòiq manè pôi Ìh
wa dang creo ca hiniq Chuaq.
18 Au jah broq gêh dèh rìm bàu khoi pachac ca Chuaq
enh ngìa ca con jàn Haq,
19 Ta xàn hnem da Chuaq
ŏi Jê-ru-sa-lem.
Padràu hau ca Chuaq beq!