118
1 Dèch bàu calêu manè pôi Chuaq beq, ma jah 'màng aih haq dìq jaq lem;
wa can xa-ŏch xam manoh loq waq da Haq ŏi hloi hloi.
2 Ô Is-ra-ên, phai doi:
“Can xa-ŏch xam manoh loq waq da Haq ŏi hloi hloi.”
3 Ô cadraq da Arôn, phai doi:
“Can xa-ŏch xam manoh loq waq da Haq ŏi hloi hloi.”
4 Ô dìq ca mangai loq yùq crè Chuaq, phai doi:
“Can xa-ŏch xam manoh loq waq da Haq ŏi hloi hloi.”
5 Ta jò nan xa au creo dang Chuaq Haq tèo bàu au,
wa đòiq au ta nòi rùng rai.
6 Chuaq ŏi pah au, au ùh yùq crè cleq?
Con mangai 'nhòng cô ùh broq cleq jah ca au.
7 Chuaq ŏi pah au wa ŏi ta'ne wì ma jùp đò au,
'màng aih au jah 'blêq wì mangai ma git ca au.
8 Hanình dađeh nòi Chuaq
yi hnao ca canòm ca con mangai.
9 Hanình dađeh ta Chuaq
yi hnao ca canòm ca 'bài craq wèq cwìang.
10 Rìm Diac dudan ca au,
canòm ca hiniq Chuaq au jêh đac wì haq.
11 Wì dudan ca au rìm pah,
joq 'màng aih wì dudan ca au,
canòm ca hiniq Chuaq au jêh đac wì haq.
12 Wì dudan ca au tìah ca xùt;
wì haq loh nòih ca au tìah ca ùnh cheo;
canòm ca hiniq Chuaq au jêh đac wì haq.
13 Con mangai ca'nhùc au dìq jaq dêh waq ca au cro,
mahaq Chuaq dèch au yòng.
14 Chuaq aih can dêh wa bàu calêu da au,
Haq raq khoi wìa can dèch claih da au.
15 Ta traiq da mangai ta-atoq jah tàng bàu calêu lem bùi,
nhò tì pa 'ma da Chuaq khoi broq loh bìac jah ta'blêq.
16 Tì pa 'ma da Chuaq khoi dèch ha'nhèq;
tì pah 'ma da Chuaq broq loh bìac jah ta'blêq.
17 Au ùh cachìt mahaq au rìh
đòiq anoi 'noh bìac Chuaq khoi broq.
18 Chuaq khoi baxa au dìq jaq trap,
mahaq Chuaq ùh đòiq au cachìt.
19 Pèh ca au rìm 'mang ta-atoq beq;
au jah mùt; au jah manè pôi Chuaq.
20 Cô trong 'mang da Chuaq,
wì mangai ta-atoq jah mùt 'mang aih.
21 Au jah manè pôi Ìh, ma jah 'màng aih Ìh khoi tèo bàu au;
Ìh khoi wìa can dèch claih au.
22 Pliang Hmu mangai thòq ma khoi dŏih đac,
hmu aih jah wìa hmu gàu mùm hnem.
23 Cô bìac Chuaq khoi broq,
aih bìac dìq jaq halac enh ngìa ca bèn.
24 Cô hì Chuaq khoi broq loh,
khòh lem bùi calêu ta hì aih.
25 Chuaq ôi, au dang xìn Ìh, xìn Ìh dèch claih nhèn.
Waiq Chuaq au dang xìn Ìh, xìn am ca nhèn jah broq gêh rìm bìac.
26 Xôq ramŏt ca mangai canòm ca hiniq Chuaq lam trùh,
enh hnem cùh waiq da Chuaq, waiq Chuaq 'noh am xôq ca pì ma mùt hnem Haq.
27 Chuaq Haq Boc Plình. Haq jah am ca bèn can 'ngah,
yŏc caxi càt ngè tadreo jang aki ca ca'bŏng tadreo beq.
28 Ìh Boc Plình au, au jah manè pôi Ìh. Ìh Boc Plình au,
au jah padèch hiniq Ìh.
29 Dèch bàu calêu manè pôi Chuaq beq, ma jah 'màng aih Haq dìq jaq lem;
wa can xa-ŏch xam manoh loq waq da Haq ŏi hloi hloi.