140
Mangai Ma Achìh Waiq Khàn Xìn Chuaq Jùp Đò
Đawit Achìh
1 Ôi Chuaq, xìn dŏih au claih enh mangai dù,
wèq ban au khoi ca mangai ngang dù,
2 Wì mangai tình ca broq bìac dù ta manoh:
rìm hì wì haq pajùm ca dabau đòiq tajêh poh.
3 Rapet wì haq hin tìah ca rapet bìh,
blìa hacùng wì haq i nŏc đùc bìh tùa.
4 Ôi Chuaq, xìn wèq au claih khoi enh tì mangai dù;
wèq ban au claih khoi enh mangai ngang dù;
aih mangai tình đòiq broq ca cadiang au catŏih tacro.
5 'Bài mangai loq catèh khoi tang caxi bet gùi ca au;
wì tang hlàm lùch ca trong,
đòiq wì haq hadai bet 'bài rahoch ca au.
6 Au doi ca Chuaq: “Ìh Boc Plình au.”
Chuaq ôi! Xìn halang don tamàng bàu au waiq xìn.
7 Ô Boc Plình, Chuaq padren da can dèch claih ca au,
Ìh khoi wèq gàu au ta hì tajêh poh.
8 Ôi Chuaq, xìn paq am ca mangai dù bìac wì ngèh enh;
paq jùp đò wì broq gêh trong 'mèq wì haq ma tình, yùq wì haq loq catèh.
9 Waiq bìac ngang dù da blìa hacùng mangai
ma dudan au ùc hlài ta gàu wì haq!
10 Waiq ca ngia ùnh gòh ùc ta gàu wì haq!
Waiq ca wì haq 'bìq hwenh 'mùt ta ùnh,
ta diac jrùq, pi jah yòng hòm!
11 Paq am ca mangai i rapet loq amòng jah cajap ŏi dèh ta crŏng taneh;
waiq can ranàc jah hnan tiaq mangai ngang dù đòiq jêh haq renh tacro.
12 Au loq Chuaq jah palem am bìac mangai nan xa,
hadrah ta-atoq ca mangai pa.
13 Joq 'nàng mangai rìh ta-atoq ùh hêq ca manè pôi hiniq Chuaq.
Mangai lem jang jah ŏi jang ngìa Chuaq.