141
Waiq Xìn Chuaq Wèq Ban Claih ca Bìac Dù
Đawit Achìh
1 Ôi Chuaq, au khoi waiq dang Ìh, xìn renh trùh ta au.
Jò au waiq dang Ìh, xìn halang don tamàng bàu au.
2 Xìn am bàu au waiq khàn lam trùh jang ngìa Chuaq tìah ca hòi xua thùm,
Xìn bìac au hnhè tì jah tìah ca ngè tadreo jò chìu!
3 Ôi Chuaq, xìn wèq hacùng au,
wa gŏc 'mang hacùng au.
4 Xìn paq am manoh au wìh ta bìac 'mèq broq bìac dù ti mangai broq dù;
paq đòiq au caq ngè caq jìang da wì haq.
5 Waiq ca mangai ta-atoq jêh au xam manoh xa-ŏch.
Aih ùh crài ca dàu xùt ta gàu au,
paq đòiq gàu au ùh nhàn yŏc dàu aih.
Mahaq 'nhac ca wì mangai dù broq dù, au xôq waiq khàn ca wì.
'Nhac ca wì mangai dù broq dù, au xôq waiq khàn yôt yôt.
6 'Bài cwan hadrah wì haq 'bìq hwenh ca'nìh đac ta nòi panàt hmu;
wì haq jah loq bàu au doi troq joq 'nàng.
7 Tìah ca wì ma cai halòq taneh,
caxènh ramoh nhèn 'bìq rai 'noh ta nòi ralùng hanang.
8 Chuaq ôi, mat au tangìa 'nah ta Chuaq;
au canòm mot hanình ŏi ta Chuaq; xìn paq cađac au 'bìq ŏi mòiq ngai.
9 Xìn Chuaq wèq au claih ca gùi wì haq ma bet ca au,
wa claih khoi ca rawiang mangai broq dù.
10 Waiq ca mangai dù hlac dèh ta hlàm cla wì haq,
mahaq au jah lam cwa ùh hìaq troq cleq.