3
Nan Xa Ca Phôq Jê-ru-sa-lem Wa 'Bài Diac 'Noiq
1 Nan xa ca phôq loq tablàq,
phôq padrùh wa broq bìac loq tacaq dèh ca jàn!
2 Haq ùh waq iu bàu,
ùh waq tamàng bàu hnài.
Haq ùh canòm nhò ca Chuaq,
ùh thia haten dèh ca Boc Plình.
3 'Bài cwan ŏi ta haq
aih baco hlari loq grenh,
'bài cwan hadrah haq tìah ca coq brì jò damang,
ùh rong đòiq cleq trùh xroq èh.
4 'Bài mangai capoch thai Boc Plình loq amòng
wa loq 'nùt;
'bài pajàu haq broq amùa ca nòi hadròih
wa broq tawech đac ca ranenh.
5 Mahaq Chuaq Haq dìq jaq ta-atoq, ŏi ti phôq aih Haq ùh broq bìac ùh lem jang.
Rìm xroq Haq wèq cwìang jàn ta phôq dìq jaq 'ngah 'ngai,
hì leq Haq xôq hadrah ta-atoq,
mahaq mangai ùh lem jang ùh camaih dèh ca bìac ma wì haq khoi broq.
6 Boc Plình doi: “Au khoi jêh đac rìm jàn da rìm Diac,
broq ca 'bài hnem hin bôi ti mùm phôq tacro padah.
Au broq ca trong ta phôq loh ca wang wê,
pi i cabô lam cwa.
'Bài phôq da wì haq khoi 'bìq raliang đac,
pi i ca mòiq ngai leq lam cwa,
hadai pi i ca mangai ŏi ta aih.
7 Au doi 'màng cô:
‘Ìh toq khòh yùq crè ca Au raq hêq
wa tamàng bàu Au hnài,’
'màng aih èh nòi ŏi da ìh ùh hìaq 'bìq raliang,
rìm bìac Au khoi pajaq đòiq hi baxa haq, au cađac.
Mahaq wì haq broq dù yi hnao,
broq padrùh dèh rìm bìac cla.”
8 'Màng aih Chuaq doi:
“Pì gòm Au beq,
trùh hì Au yòng ta'mòq tôiq;
Taiq Au khoi dì đòiq creo gop dìq dŏng ca 'bài jàn rìm jàn da rìm Diac;
đòiq Au ùc can nòih Au ca wì haq,
ma jah 'màng aih crŏng taneh jah 'bìq bùh đac
xam ùnh tarènh da Au.
9 Jò aih, Au jah tablàq hlài 'bài jàn,
broq hacùng wì haq jah hreo,
đòiq dìq dŏng wì haq loq creo dang hiniq Chuaq,
mòiq manoh pajùm patìh bìac Haq.
10 'Bài mangai ma creo dang Au,
aih mangai Au ma palac cađac ŏi pah tau ca diac cròng Ê-thi-ô-bi,
jah 'ràng ngè tadreo ca Au.
11 Ta hì aih ìh pi ep camaih dèh ca bìac ìh ma broq,
aih bìac đòiq tajraq hlài ca Au;
ma jah 'màng aih Au jah dŏih đac 'bài mangai
loq catèh ta ìh;
èh pì pi hìaq catèh hòm
ta bôi wang hadròih Au.”
Mangai Xrong Hlài Da Is-ra-ên
12 “Mahaq Au đòiq hlài ta ìh mòiq jàn pa wa hamoq,
wì haq jah mot ŏi hlèp ta hiniq Chuaq.
13 Jàn ŏi xrong hlài da Is-ra-ên
ùh broq bìac ngang dù,
ùh capoch amòng,
ùh i ca bàu 'nùt ta hacùng wì haq;
ma jah 'màng aih wì haq jah caq wa cùi padài,
ùh hìaq i cabô broq đòiq wì haq crè tarìt.”
14 Ô con cadrì Siôn, calêu beq!
Ô Is-ra-ên, breo cachech beq!
Ô con cadrì Jê-ru-sa-lem,
dìq ca manoh lem bùi beq!
15 Chuaq khoi cađac bìac hadrah da Haq khoi ca ìh,
broq ca mangai ma tajraq hlài ca ìh wia hangai ca ìh;
Bùa da Is-ra-ên aih Chuaq ŏi ta ìh,
ìh pi hìaq glàm hòm bìac ranàc.
16 Ta hì aih,
wì jah doi ca Jê-ru-sa-lem 'màng cô:
“Ô Siôn! Paq crè,
tì ìh paq ìuq!
17 Chuaq Boc Plình ìh ŏi ta ìh;
Haq Chuaq i cwìang itai jah dèch dŏih ìh:
Haq jah lem bùi ca ìh;
taiq manoh loq waq Haq àt hatenh;
Haq calêu lem bùi ca ìh.”
18 “Au gop 'bài mangai 'nang mango
taiq ùh jah trùh ta hì lè càn, aih hì lè càn da Siôn;
taiq bìac 'bìq rùp 'nong lam khoi dèh Diac khoi broq ca pì palèu genh trap.
19 Cô, ta jò aih Au jah jêh đac 'bài mangai
ma padit padiang ìh;
Au jah broq brêh ca mangai cwê,
gop yŏc 'bài mangai ma 'bìq hnan đac,
broq ca wì haq jah manè wa jah 'bang tìang,
aih 'bài mangai ma khoi 'bìq camaih jàp ta crŏng taneh.
20 Ta jò aih, Au jah 'ràng ahlài pì,
Au gop ahlài pì;
ma jah 'màng aih Au jah broq ca pì jah 'bang tìang wa jah padèch
ta rìm jàn ta crŏng taneh,
jò Au ahlài 'bài hapŏng
hlài jang ngìa pì,”
Chuaq doi 'màng aih.