9
Cwìang da Phaulo
1 Au ma ùh i cwìang cleq qmoh? Au ma ùh xài mangai Tiaq cla? Au ma qnhòq hmaq hnoq Jesus Chuaq bèn ùh xài? Oh daq ma ùh xai yiniq broq da au enh dalam ka Chuaq qmòh? 2 Patìah đac haq, tàng joq au ùh broq mangai Tiaq cla am ka mangai qnoeq, dua au broq mangai Tiaq cla ka oh daq, majaq qmang aih oh daq raq teo abroq da au enh dalam ka Chuaq. 3 Aih bàu au capoch cwaih rađeh enh ngèa mangai enh tah hadrah ka au. 4 Nhèn ma ùh i cwìang acaq ôq? 5 Nhèn ma ùh khòh qnong mòeq ngai gucadrì broq mai hu lam ti nhèn qmang ka bòe mangai Tiaq cla qnoeq, qmang ka oh daq ta Chuaq, qmang ka Sepha khoe broq loq ùh xài? 6 Ahìaq toq au sam Banaba raq ma ep abroq hu jah acaq? 7 Alah i cabô acaq pua enh hnim cla hu lam tajêh? Alah i cabô pìt wùan nho mahaq ùh jah acaq plì. Alah i cabô ban trìu mahaq ùh yoc diac tôh haq hu ban rađeh. 8 Au anoe qmang aih, ma xài qmang ka wì ma loq capoch yôt? Hset Ranenh ma uh anoe qmang aih? 9 Majah qmang aih ta Ranenh Moise i achìh: “Ìh apaq srôp mong bo qnang len qmau”. Boc Plình lèt ka bo ùh xài? 10 Haq anoe bàu aih ka bèn loq ùh xài? Joq! Qmang ka ma khoe achìh ka bèn rameh:
“Mangai cai ta rùang ep jah tangèh men cai,
mangai len qmau, ngèh ka jah đeh diq men len”.
11 Tàng nhèn khoe rai ka oh daq adrech trong mahua yiang, nhèn gat hlài dahwèq enh pì, aih i cleq ma ùh troq? 12 Mangai qnoeq khòh broq qmang aih enh qnhèq ka oh daq, loq ka nhèn? Hnoq anoe qmang aih, nhèn ùh yoc cwìang kô, xan cla nhèn raq chìuq xalep rìm trong, đòeq uh hìaq i cleq khech tàt Bàu lem da Christ. 13 Oh daq ma ùh qnì, cabô patìh ta hnim kùh waiq, aih haq acaq ra mènh wì ma dèch ta hnim kùh waiq qmòh? Cabô patìh ajang prang tadreo, aih ajoq haq wiang jah axong enh aih qmòh? 14 Hadai qmang aih, Chuaq i doe: “Mangai leq hnài Bàu lem, aih haq jah ban rađeh sam Bàu lem”.
15 Mahaq au qnhòh lah yoc cwìang aih hu thê oh daq, au achìh jàiq kô ùh xài đòeq bòch cwìang aih, kô raq nen au jah catèh deh, au chìuq cahìt kan au ùh đòeq ka cabô blah yoc da au. 16 Majah qmang aih, jò au lam anoe Bàu lem, au ùh i ka nen jang leq đòeq hu catèh. Aih raq yiniq au au ep broq, ùh anoe Bàu lem aih majoq kan habo ka au. 17 Tàng joq au lem bùi broq yiniq aih, au jah waq baha, tàng joq au uh enh broq, aih dua khoe thê au. 18 Aih èh au jah baha au cleq? Qmang kô! Au ùh yoc cwìang au ma khoe i qmang ka mangai anoe Bàu lem qnoeq, mahaq jò au anoe Bàu lem, au anoe qmòe dech ùh yoc baha. 19 Au ùh tawac ùh ep broq tiaq bàu cabô, mahaq au khoe broq rađeh wìa hapong rìm ngai, đòeq hu jah tam yeo bàc ngai. 20 Oe ti mangai Juđa, au tìah ka mangai Juđa, waq ka jah mangai Juđa, ti mangai enh qneq ka ranenh, (hiloq ka au ùh oe enh qneq ka ranenh) au hadai tìah ka mangai enh qneq ka ranenh, đòeq au hujah mangai enh qneq ka ranenh; 21 oe ti mangai ùh i ranenh, (Yac ka enh ngèa Boc Plình au ùh xài mangai ùh i ranenh, majah qmang aih au oe enh qneq ka ranenh da Christ), mahaq au hadai oe tìah ka mangai ùh i tiaq ranenh, đòeq hu jah mangai ùh tiaq ranenh. 22 Oe ti mangai ùh nèn, au hadai ùh nèn, đoèq hujah mangai ùh nèn, au khoe wìa rìm trong am ka rìm ngai, đòeq hujah dèch yac ka toq biaq ngai broq qmang leq dua au lènh. 23 Au broq rìm yiniq kô aih dìq broq ka Bàu Lem, đòeq au hadai wiang jah ta axong sôq ramot ta aih.
24 Oh daq ma ùh loq, tanòe wì ta cadàu cadêh, dìq ka wì cadàu, mahaq toq biaq ngai raq majah waq baha qmòh? Qmang aih, oh daq cadàu qmang leq đòeq hujah waq baha oq. 25 Dìq ka mangai ta cadàu cadêh aih, wì haq dênh ka rađeh bàc trong, wì broq qmang aih đòeq jah kui cadoh riang loq om. Mahaq da bèn đòeq hujah kui cadoh riang ùh jò leq om. 26 Aih ìq, dài au ùh cadàu talìq, au jêh ùh xài au jêh cayeo; 27 mahaq au tabroq dèh ka chac cla au ùh palap cleq, thê haq broq hapong au, ùh qmang aih broq braiq atìq ka au hnài wì qnoeq, yàng cla au aih cađac rađeh qmòh.