1 Majah qmang aih, au ùh enh dôq ka oh daq ùh qnì kan cadraq bèn dìq khoe oe enh qneq ka yùc, dìq ka wì khoe lam pagat ka diac raxìq, 2 đòeq Môise broq ƀaptem ka wì haq enh dalam ka yùc xam enh qneq ka diac raxìq. 3 dìq ka wì khoe acaq dahwèq yiang, 4 rai ôq diac yiang, majah qmang aih wì haq ôq enh nòe hmo yiang ma tiaq wì haq, hmo aih aih raq Christ. 5 Mahaq taqne wì haq ja ka mangai ùh lem manoh Boc Plình, dài bàc ngai wì haq majah khoe tacro cachìt tanòe braih kàn. 6 Ƀòe yiniq kô khoe loh qmang aih, đòeq broq dua hu hnài bèn, dôq bèn ùh hìaq ònh tiaq trong dù qmang ka wì aih khoe broq. 7 Èh hadai pi dùh kùh waiq radua qmù kiac qmang ka wì aih hòm, tìah ka bàu khoe achìh: “Wì haqngui acaq ôq, khoe aih padinh yòng pagôq racaih”. 8 Bèn apaq ti taqnong tango qmang ka wì aih ma khoe broq, taiq aih raq mòeq hì majah i baiq jàt piq mùan mangai cachìt. 9 Bèn hadai apaq qnhro Christ qmang ka wì ma khoe qnhro, taiq aih raq wì haq majah cachìt ka bìh kap. 10 Èh hadai apaq mamùc tìah ka wì khoe mamùc, taiq aih raq wì haq majah ep cachìt enh tì kŏng ƀình plình palùng.

11 Ƀài yiniq kô khoe loh ka wì qmang aih đòeq broq dua am ka bèn, khoe achìh hlài đòeq hu pariaq bèn aih ƀài mangai ma rìh ta ƀài qnhòng atìq pulùch 12 Qmang aih, cabô loq xoh rađeh kô yòng cajap, rabiaq haq oq loq tacro. 13 Ƀài kan padô qnùt trùh ka oh daq, ùh i ka yiniq leq ma yi dôch ka padren kon mangai. Boc Plình ùh tablòq manoh, haq ùh dôq ka oh daq glàm kan padô qnùt yeo loe ka padren oh daq, mahaq ta kan padô aih haq pèch trong ka oh daq hu jah loh, đòeq oh daq hlàt dràng.

14 Qmang aih oh daq da au, drah wia ka hangai trong kùh waiq radua qmù. 15 Au anoe ka oh daq aih au anoe ka ƀài mangai i manoh rabiaq, pì boq bàu au anoe kô: 16 Chrŏng xôq ramot bèn manè apôi kô ma ùh xài khoe pajùm ti mahim da Christ qmòh? Bênh bèn ma goh kô aih ma ùh joq pajùm ka chac da Christ qmòh? 17 Majah qmang aih dìq deh mòeq toq bênh raq, dài bèn yac ka bàc ngai dua mòeq chac raq majah qmang aih bèn dìq pajùm ta mòeq toq bênh raq. 18 Ngan mangai Isorali beq! Ƀài mangai acaq jam tadreo aih ma ùh alùh pajùm ti prang tadreo qmòh? 19 Au anoe qmang aih au anoe cleq? Dahwèq ma dèch tadreo am ka qmù kiac aih i loh ranenh cleq, radua qmù kiac aih i loh cleq ùh? 20 Blinh ka ùh, mahaq dahwèq mangai enh gùng tadreo aih wì tadreo ka kiac chŏc, ma xài wì tadreo ka Boc Plình. Qmang aih au ùh enh oh daq wiang taqmùt ti kiac chŏc. 21 Oh daq ùh jah ôq doe chrŏng da Chuaq khoe aih ôq doe chrŏng da kan kiac, oh daq ùh jah acaq pajùm aniang ti Chuaq rai pajùm aniang ti kan kiac. 22 Ahìaq bèn enh broq ka Chuaq tarènh? Bèn ma yeo dêh ka haq?

23 Pì doe “Rìm yiniq au dìq khòh broq”, mahaq ùh xài rìm yiniq dìq i lòeq; “Rìm yiniq au diq khòh broq”, mahaq ùh xài rìm yiniq dìq broq dua lem. 24 Apaq i cabô hèm jah toq ka rađeh, mahaq mangai leq mangai meh hadai ep hèm ka mangai qnoeq diq. 25 Rìm dahwèq atech tanoe tech jam, dìq khòh rot acaq dŏng, apaq tàng đeh yùq ta manoh đòeq bòch dèh; 26 majah qmang aih, crŏng taneh kô xam rìm yiniq ta aih dìq da Chuaq. 27 Tàng loq i mangai ùh lùi akhen ka oh daq, oh daq enh lam, aih yac ka wì padon qnoh cleq, oh daq acaq cameh, apaq tàng đeh yùq ta manoh đòeq hu bòch dèh. 28 Mahaq tàng i mangai doe ka oh daq: “Ma kô khoe tadreo”, aih apaq acaq, đòeq lem ka manoh cla oh daq xam mangai ma khoe doe ka oh daq: 29 Au ùh anoe trùh manoh oh daq, mahaq anoe trùh manoh mangai tau. Wìa ka trong au loq đeh khòh broq mahaq dôq ka manoh mangai qnoeq ep hadrah ataq? 30 Tàng khoe manè apôi au men acaq, aih ji laiq dàng mòeq nà acaq au ma dôq ka wì qnoeq cwò ka rađeh? 31 Qmang aih, oh daq yac ka acaq, yac ka ôq, yac ka broq cleq, dìq broq đòeq Boc Plình jah ranhòm. 32 Apaq roh ka cabô kan catoeh, yac ka mangai Juđa, mangai Gorec, yac ka Tagop Hadròeh da Boc Plình; 33 drah qmang ka au kô, àu broq rìm trong dôq jah lem ka manoh bàc ngai, ùh chaq trong lem toq ka cla rađeh mahaq chaq trong lem am ka mangai qnoeq, đòeq wì haq hadai jah dèch.