1 Manòeq kô, au ùh enh ka oh daq ùh qnì qmòe cleq ajang kan tabàih yiang. 2 Oh daq loq jò bèn oe raq mangai enh gùng, yac ka trong leq dìq khoe tùi tiaq radua qmù làu, mac maiq ka wì enh qnong taleq tameh. 3 Aih raq dài au majah anoe ka oh daq, ùh i cabô i Yiang Hadròeh Boc Plình ma ti doe: “Chua Jesus troq ka ra-òh, hamaiq”. Tàng joq ùh i ka Yiang Hadròeh hadai ùh i cabô doe ka Jesus aih Chuaq.

4 I bàc kan tabàih crài ka dabau, mahaq dua mòeq Yiang Hadroèh raq. 5 I bàc yiniq patìh crài ka dabau, mahaq hadai mòeq Chuaq raq. 6 I bàc trong abroq crài ka dabau, mahaq dua mòeq Boc Plình, aih raq Mangai broq rìm yiniq oe enh dalam ka rìm ngai. 7 Yiang Hadròeh patô am enh dalam rìm ngai, đòeq mangai leq mangai meh hadai jah lòeq pajùm. 8 Mangai kô canòm ka Yiang Hadròeh haq jah màiq bàu rabiaq, mangai meh hadai canòm ka Yiang Hadròeh aih jah màiq bàu capoch i kan loq. 9 Enh Yiang Hadròeh, mangai kô jah manoh lùi, hadai enh Yiang Hadròeh aih mangai tau jah màiq broq brêh ka mangai yinìq. 10 Qnah ngai jah màiq broq kan halac, qnah ngai jah capoch bàu pajàu, qnah ngai loq hadro ƀài kiac, qnah ngai jah tapoch bài bàu craq crài ka dabau, qnah ngai jah màiq loq anoe hlài bàu aih. 11 Ƀài yiniq aih dìq loh enh mòeq Yiang Hadròeh, tiaq dèh manoh haq enh lah axong am ka tang ngai.

12 Tìah ka chac aih mòeq raq, mahaq i bàc hamenh, tìah ka hamenh ta chac yac ka bàc mahaq dua wìa pajùm mòeq chac raq. Christ i crài cleq qmang aih. 13 Majah qmang aih bèn yac ka mangai Juđa, yac ka mangai Gorec, yac ka mangai broq hapŏng, yac ka mangai broq dìc cabô, dìq khoe ƀaptem pajùm ta mòeq Yiang Hadròeh đòeq wìa mòeq chac raq, èh hòm bèn dìq hadai khoe ôq pajùm mòeq Yiang Hadròeh. 14 Chac hadai ùh xài i palap mòeq hamenh, mahaq bàc hamenh. 15 Tàng jènh doe: “Au ùh xài tì dài au majah ùh i pajùm cleq ka chac”, ma xài taiq nen aih haq ma ùh hatop ka chac. 16 Tàng don doe: “Au ùh xài mat, dài au ùh wiang pajùm cleq ta chac”, ma xài taiq nen aih haq majah pi pajùm ta chac. 17 Tàng chac aih dìq mat dŏng, aih èh bèn tàng xi cleq? Tàng dìq ta chac aih toq don, aih èh bèn xua xi cleq? 18 Mahaq manòeq kô Boc Plình khoe taqmroq ƀài hamenh ta chac bèn, am mòeq yiniq oe dèh mòeq nòe, qmang ka cla haq hnoq dèh lem tiaq manoh haq khoe dì. 19 Tàng mòeq hamenh raq aih èh chac oe ajang leq? 20 Qmang aih yac ka bàc hamenh mahaq dua mòeq chac raq.

21 Mat ùh khòh doe ka capiang tì: “Au ùh i ep cleq ka gè”. Gàu ùh khòh doe ka jènh “Au ùh i ep cleq ka pì”. 22 Majoq qnàng aih, yiniq cleq ta chac bèn hnoq haq ma yeo ùh nèn đeh, ma aih raq ma yeo khòh nhet. 23 Ta chac bèn hamenh leq bèn hèm haq ma yi ùh cra, ma aih raq bèn ma yeo khòh ngan, maleq ma ùh lem, ma aih raq bèn ma palàng. 24 Maleq ma khoe lem, ma aih ma oe ep palauq cadèh. Mahaq Boc Plình ma khoe taqmroq ta chac mangai bèn, hamenh leq ma yi hamoq aih đòeq haq jah caqmùh caqmàm, 25 đòeq ta chac ùh hìaq i kan talah đac ka dabau, mahaq maleq ma meh loq wiang hèm ka dabau. 26 I maleq ta chac bèn ma jìq, aih ma qnoeq hadai wiang jìq, maleq majah caqmùh caqmàm aih èh maqnoeq hadai wiang lem bùi.

27 Manòeq kô, oh daq aih raq chac da Christ, oh daq aih la hamenh ta chac, mangai leq mangai meh i dèh hra nòe. 28 Boc Plình khoe broq ta Tagop Hadròeh, adroe aih mangai Tiaq cla, atìq aih mangai pajàu, khoe aih mangai hnài, tìa aih mangai broq kan halac, èh hòm mangai i màiq broq brêh ka mangai yinìq, mangai loq hanò, mangai đòeq ti ranenh, mangai capoch bài bàu craq crài. 29 Rìm ngai aih dìq mangai tiaq cla dŏng qmòh? Rìm ngai aih dìq pajàu dŏng qmòh? Rìm ngai aih dìq mangai hnài dŏng qmòh? Rìm ngai dìq broq kan halac dŏng qmòh? 30 Rìm ngai dìq i màiq broq brêh kamangai yinìq qmòh? Rìm ngai dìq capoch bàu halac qmòh? Rìm ngai dìq loq anoe hlài bàu halac aih doe cleq qmòh?

31 Drah tangèh đoèq jah kan tabàih ma yi kàn dŏng. Manòeq kô èh, au padon patô ka oh daq trong ma yeo lem hòm.