1 Yac ka au loq tapoch dìq dŏng ka bàu kon mangai xam bàu ƀình plình, mahaq ùh i kan loq waq, aih au bu dàng chình ja atêh, qmang ka hatùq gŏc lòe bàu. 2 Yac ka au i màiq loq capoch pajàu, yac ka loq dìq dŏng ka kan hlèp, loq dìq kan rabiaq, yac ka au i manoh lùi jah qnhac hloe bui wang, mahaq ùh ka kan loq waq, aih dua au ùh loh cleq. 3 Yac ka au axong dŏng dèh kùng hang đòeq hu ban mangai pa, yac ka chac cla au dôq hloe wì bùh, mahaq tàng ùh i kan loq waq, ƀài yiniq aih dua ùh i broq ka au jah lòeq cleq.

4 Kan loq waq loq dràng àt, kan loq waq loq hanò, kan loq waq ùh tajênh, ùh catèh rađeh, 5 ùh broq trong ùh troq, ùh chaq jah lòeq toq ka rađeh ùh rênh nòeh, ùh hèm qmèq ka cabô, 6 ùh bùi ka trong ùh taq atoq, mahaq bùi ta trong joq qnàng. 7 Kan loq waq loq grom gri rìm trong, lùi rìm trong, loq tangèh rìm trong, loq àt rìm trong.

8 Kan loq waq ùh jò leq hnhung lùch. Bàu pajàu èh dìq, bìac am màiq tapoch bàu halac èh lùch, kan rabiaq loq èh hadai pi i. 9 Majah qmang aih kan loq da bèn qnhòq gêh geo, capoch pajàu dua qnhòq gêh geo. 10 Mahaq jò kan gêh geo hi trùh, jò aih èh ƀài yiniq leq ma qnhòq gêh geo hi cađac. 11 Jò au oe raq kon qyoh, au tapoch tìah ka wì qyoh, manoh hèm tìah ka wì qyoh, boq ngan tìah ka wì qyoh, jò au khoe wìa mangai kàn, au hi cađac bài trong da wì qyoh. 12 Manòeq kô tìah ka bèn ngan ta gùang, hnoq bu badrèh badrah, trùh hì bèn hi jah hnoq baiq hadrò tangèa ti dabau, hì kô au loq qnhòq jàp. Trùh jò aih èh, au hi jah loq qmang ka Chuaq khoe loq ka au.

13 Dài haq manòeq oe i piq yiniq kô: Manoh lùi, kan tangèh, kan loq waq, mahaq oe ta piq yiniq aih, kan loq waq aih ma yeo kàn dŏng.