1 Yiniq ma khoe i dèh enh adroe dìq dŏng, aih yiniq nhèn ma khoe tàng, yiniq mat nhèn ma khoe hnoq, yiniq nhèn ma khoe hamrìh ngan èh tì kŏng nhèn khoe jah bèq: aih nhèn anoe trùh Bàu kan rìh; 2 majah qmang aih kan rìh khoe jah mahnu qnoh, nhèn i hnoq, èh nhèn qnang anoe hlài dôq pì loq, nhèn bahìa ka oh daq loq kan rìh halình mòeq đòe ma oe dèh ti Baq mahaq khoe jah patô am nhèn hnoq; 3 nhèn yŏc yiniq nhèn ma khoe hnoq hu bahìa ka oh daq đòeq oh daq jah taqmùt pajùm ti nhèn. Joq qnàng nhèn i kan taqmùt pajùm ti Boc Plình aih Baq xam Kon da haq aih Chuaq Jesus Christ. 4 Nhèn achìh ƀài yiniq kô ka oh daq, đòeq kan lem bùi nhèn jah gêh geo.

5 Kô raq bàu hnài nhèn ma khoe tàng enh cla haq, nhèn anoe hlài ka oh daq loq: Boc Plình aih kan qngah, enh dalam haq ùh i ka kan clam. 6 Tàng joq bèn doe đeh kô taqmùt pajùm ka haq, mahaq oe raq cadiang lam ta kan clam cluiq, aih bèn capoch qnùt, ùh broq tiaq trong joq qnàng. 7 Mahaq tàng bèn lam ta qngah tìah ka cla haq oe ta qngah, aih bèn taqmùt pajùm ka dabau, mahim Chuaq Jesus Christ kon da haq broq hreo dìq dŏng yiniq lui bèn. 8 Tàng bèn doe đeh kô ùh lòm i ka yiniq lui cleq, aih bèn qnùt cla rađeh, kan joq qnàng ùh oe enh dalam ka bèn. 9 Tàng bèn paqnoh deh yiniq lui. Haq aih la mangai ùh tablòq manoh mangai taq atoq đòeq lêh caqnaih yiniq lui bèn rai broq bèn hreo dìq dŏng kan ùh taq atoq da bèn. 10 Tàng bèn doe đeh qnhòq lah broq cleq i yiniq lui, aih bèn broq ka haq wìa mangai loq amòng, bàu haq ùh oe ta bèn.