1 Yôi oh daq da au, kô aih yàng baiq au achìh jàiq ka oh daq. Ta jàiq kô xam jàiq ma adroe, au àu chaq trong đòeq bahmàng rai pariaq manoh lem da oh daq, 2 au enh pì hmàng hlài dìq ka bàu pajàu hadròeh khoe anoe calah nèh xam bàu thê da Chuaq, aih la Chuaq dèch bèn haq khoe thê ƀài mangai tiaq cla da haq khoe anoe hnài.

3 Angoe aih ep loq rameh, taqnhòng atìq lùch èh i bàc ngai loq halê patah, yŏc bàu do racaih, rìh tiaq dèh kan loq ònh da manoh cla, 4 trùh doe: Aleq bàu Chuaq ma doe haq trùh hlài, bàu aih taleq? Majah qmang aih enh qnhòng ƀài boc yaq nhèn cachìt enh nèh trùh manòeq, rìm yiniq dua oe raq qmang ka jò baxèm i plình crŏng taneh? 5 Wì haq to ùh hmàng, canòm ka bàu Boc Plình men i plình i crŏng taneh, taneh wìa enh diac, khoe loh enh qne diac, 6 crŏng taneh qnhòng aih hadai khoe raliang ka diac aih, haq khoe cram ka diac kàn. 7 Mahaq plình crŏng taneh qnhòng aih hadai canòm ka bàu aih men oe trùh mamòeq, hu đòeq padon am ka ùnh, ùnh jah baxù cađac haq ta hì tah hadrah đòeq raliang đac mangai dù. 8 Mahaq oh daq da au, apaq hèt mòeq yiniq kô, enh ngèa Chuaq mòeq hì budiang mòeq muàn hanam, mòeq muàn hanam budàng mòeq hì. 9 Chuaq ùh batrò dèh bàu haq ma khoe anoe qmang ka wì tau ma xoh, mahaq Haq khoe chìuq àt ka oh daq, ùh enh mòeq ngai leq cachìt hnhung, mahaq enh ka rìm ngai loq raxach wìh hlài. 10 Mahaq hì da Chuaq tìah ka mangai atùng. Jò aih èh, i atêh gruàng mòeq qmang ka dêh, èh ƀài caqnàm plình hi hnhung dŏng, rìm yiniq ta aih ùnh bùh dŏng, taneh xam rìm yiniq enh crŏng taneh hadai ùnh bùh dìq dŏng. 11 Rìm yiniq dìq ep palùng cađac qmang aih, ha oh daq kô èh ep rìh qmang leq? Oh daq kiang ep rìh hadròeh rai iu yùq Boc Plình, 12 jò oh daq qnang tangèh gòm hì da Boc Plình rênh trùh, aih hì ùnh ma bùh đac dìq dŏng caqnàm plình xam rìm yiniq ta aih dìq cheo wiac dŏng. 13 Mahaq tiaq bàu Haq ma khoe tèu, bèn tangèh gòm trŏc neo, taneh neo, aih nòe da kan taq atoq rìh oe. 14 Qmang aih, dìq ka oh daq da au, aih raq yiniq oh daq ma tangèh gòm, dài oh daq majah ep dìq ka padren wèq rađeh, đòeq Chuaq hnoq oh daq rìh acaq catèm ùh hìaq i xìt i habau, ùh i ajang leq ep cwò. 15 Khoe aih, ep ngan loq rameh Chuaq da bèn chìuq àt ka dùnh aih đòeq hu jah dèch oh daq, tìah ka Phaulô, oh daq ma haten hatìa da bèn, khoe yŏc kan rabiaq Boc Plình am ka rađeh hu achìh jàiq ka oh daq. 16 Ta rìm yàng achìh ka oh daq, haq hadai ràu trùh ƀài trong aih, ta aih i tang nòe xa ka loq tàng, dài ƀài mangai ma blùng ùh cajap manoh lùi, wì yŏc jang aih đoèq capoch patah đac taqnoeq, tìah ka wì haq khoe capoch lìq ajang noeq oe ta hset Hadròeh diq, taqmac yŏc ka rađeh kan raliang hnhung.

17 Qmang aih, oh daq da au, pàng oh daq khoe jah loq adroe, oh daq ep wèq rađeh ma rabiaq haq oq, yùq èh tabeq oh daq troq kan camìt enh ƀài mangai dù aih padô. Cađac hnhung kan cajap da rađeh. 18 Drah rai kàn ta kan tabàih dech xam ta kan loq ka Chuaq xam Chuaq dèch bèn, aih la Chuaq Jesus Christ.

Waiq kan ranhòm hlài dìq ta Chuaq enh qnhòng manòeq trùh hloe ta calah mòeq đòe! Amen.