6
Mangai hapŏng
1 Dìq dŏng mangai broq đeh hapŏng ep loq hèm ka camaih iu dèh ka wì craq rìm trong, dôq yiniq Boc Plình xam bàu nhèn ma hnài ùh hìaq i cabô jah capoch racaih. 2 Cabô ma i cla craq tiaq Chuaq, aih apaq yŏc nen hadai oh daq đòeq ùh iu camaih ka haq, mahaq kiang ep patìh yeo bàc hòm, majah qmang aih mangai ma jah da bèn padren aih mangai tiaq Chuaq, mangai ten tìa ka bèn. Aih trong kon ma ep pariaq hnài wì.
3 Tàng loq i mangai hnài trong qnoeq, ùh tiaq bàu da Chuq Jeus Christ bèn ma hnài, aih bàu hnài dôq bèn loq iu yùq ka Boc Plình. 4 Mangai aih dèch catèh rađeh, ùh i qnì cleq, mahaq haq khoe dòeh enh toq tarahen, toq ti goh bàu capoch, dài aih majah loh kan tagit, tajênh, capoch patah, hèm qmèq ka dabau, 5 xam ƀài bàu tarahen ùh loh qmòe cleq da ƀài mangai i manoh qmèq, ùh dùh đeh ka i kan joq qnàng, wì ngan trong iu yùq ka Chuaq aih bu dàng trong chaq acaq diq.
6 Mahaq kan iu yùq xam manoh lem bùi, aih raq hang kàn. 7 Majah qmang aih bèn clìh enh cliac ùh i wê cleq, bèn cachìt hadai ùh jah aràng cleq. 8 Qmang aih waq toq bu lap ka acaq, lap ka atàc, aih ep lem bùi manoh, 9 da mangai ma enh toq ka padrŏng kan, ùh khoe ka taclìh ta kan padô qnùt, hlech rajôiq, cro ta kan plai daiq ùh troq qmòe trong, aih raq ƀài yiniq broq ka kon mangai cram ta kan lùng pac cachìt lùch. 10 Majah qmang aih kan plai ka bac jèn aih raq tagùq riah plôh loh ƀài trong dù, i ngai cadàu tiaq bac jèn dài majah loh ka cađac dèh manoh lùi, taqmòq yŏc ka rađeh kan xalep mangò.
Tanap ka Timothê
11 Mahaq kon, aih mangai da Boc Plình, drah wia ƀài trong aih, đòeq chaq trong taq atoq, iu yùq, manoh lùi, loq waq, loq kèm, kan laq alàng. 12 Yŏc manoh lùi hu tablêq qmòe ka lem, carùp yŏc kan rìh halình mòeq đòe, aih raq dài kon ma khoe jah creo, dài kon majah khoe paqnoh dèh chiac enh ngeà bàc ngai wiang hnoq. 13 Enh ngeà ka Boc Plình aih Mangai am kan rìh ka rìm yiniq, xam enh ngèa Chuaq Jesus Christ aih Mangai jah i bàu lem ajang Bônso-Philat, au pariaq kon, 14 ep wèq tiaq ranenh kô, acaq oe apaq loh xìt habau, dôq pi i qmòe ajang leq hu cwò, gòm hì Chuaq Jesus Christ da bèn trùh, 15 Haq trùh wop troq dèh jò Boc Plình ma khoe qnac đòeq, Boc Plình aih Cla Craq xôq ramot, i mòeq raq, aih Bùa enh qnhèq ka rìm bùa, Craq enh qnhèq rìm craq. 16 Mòeq ngai haq raq ma ùh cachìt, oe ta kan qngah ùh jah thia haten, qnhòq i cabô hmaq hnoq haq, hadai ùh i mangai leq jah hnoq haq, kan ranhòm kan itai mòeq đòe oe dìq ta haq! Amen.
Hnài mangai kan padrŏng
17 Drah hnài ƀài mangai ma kan padrŏng ta qnhòng kô, apaq loq dèch rađeh, èh hadai paq i manoh canòm ka kùng hang ùh cajap, mahaq canòm ka Boc Plình, aih Mangai ma rìm hì am ka bèn jah dahwèq ùh dìq ùh dài. 18 Hnài thê wì haq broq trong lem, broq ma bàc yiniq lem, loq axong dahwèq đeh ma i, 19 qmang aih wì haq chàu đòeq ka rađeh mòeq hapom hang canaq lem, broq đòeq ka rađeh nòe cachàt hagau hagình bla èh, đòeq jah kan rìh joq qnàng.
20 Timôthê, kon ep wèq rìm yiniq au ma khoe thê kon, wia ma hangai ka ƀài bàu taphò taphuàng, bàu tarahen broq đeh lech loq mahaq ùh loq cleq. 21 Taiq enh axràm ƀài bàu aih, dài majah i mangai cađac dèh manoh lùi.
Waiq kan tabàih dech enh Boc Plình oe ti oh daq.