1 Au kô Phaulô, tiaq manoh Boc Plình thê broq mangai Tiaq cla da Chuaq Jesus Christ, đòeq hu lam anoe bàu kan rìh ma khoe tèu am enh dalam ka Chuaq Jesus Christ, 2 achìh ka Timôthê, aih kon au ma ha-och dèh dìq jaq: Waiq dôq kon jah kan tabàih dech, kan loq waq, kan catèm enh Boc Plình, aih Baq, xam enh Jesus Christ aih Chuaq da bèn.

3 Au manè apôi dèh Boc Plình au ma patìh xi manoh hliang lem qmang ka qnhòng boc yaq au khoe broq, xam dahì xam damang au ùh hêq ka hmàng trùh kon jò au waiq khàn. 4 Majah qmang aih au hmàng qmòe ka diac mat kon, enh toq lam hmàih ka kon, đòeq manoh cliac au jah lem bùi. 5 Au hadai hmàng trùh manoh lùi joq qnàng da kon, aih manoh lùi nèh haq khoe oe ta Lo-it, yaq apah miq da kon xam enh dalam Ônit, aih miq da kon, au loq manòeq kô joq qnàng haq hadai oe ta dalam kon.

6 Taiq aih au majah pariaq kon trùt hlài ƀài kan tabàih Boc Plình khoe am, kon ma khoe jah jò canòm ka au roh tì enh qnhèq chac kon. 7 Majah qmang aih Boc Plình ùh i am ka bèn manoh toq crè camaih ka rađeh, mahaq am ka bèn manoh hagau hagình, kan loq waq, kan loq ƀàt rađeh. 8 Qmang aih, kon apaq camaih ka ep anoe trùh Chuaq, hadai apaq yŏc nen wì khoe rùp clêh au hu camaih, mahaq ep canòm ka cwìang itai Boc Plình đòeq hu wiang chìuq xalep ti Bàu lem. 9 Boc Plình khoe dèch bèn, khoe yŏc kan hadròeh hu creo ka bèn, ùh xài tiaq ƀài bìac broq da bèn, mahaq tiaq manoh cla haq ma khoe dì dèh, tiaq kan tabàih haq khoe am ka bèn enh dalam ka Chuaq Jesus Christ enh calah calinh nèh raq, 10 trùh manòeq kô men ja paqnoh canòm ajang Jesus Christ aih Chuaq dèch bèn loh crŏng taneh, haq khoe raliang đac kan cachìt, yŏc Bàu lem hu aràng kan rìh xam kan ùh cachìt hòm loh taqngah.

11 Taiq Bàu lem aih au ma khoe jah dì đòeq broq mangai lam bahìa, mangai Tiaq cla, hloe xam mangai hnài, 12 aih ìq dài au majah chìuq xalep. Mahaq au ùh xep, majah qmang aih au loq đeh khoe lùi cabô, au loq dèh joq qnàng haq aih i cwìang wèq dìq dŏng rìm yiniq au ma khoe jao trùh ta hì aih.

13 Drah ep yŏc manoh lùi xam kan loq waq enh dalam ka Chuaq Jesus Christ đòeq hu wèq tiaq dua ƀài bàu hnài joq qnàng, kon khoe jah tamàng enh au. 14 Ep canòm ka Yiang Hadròeh qnang oe enh dalam bèn đòeq wèq ƀài yiniq lem ma khoe jao ka kon.

15 Kon loq wì ma oe ta cròng Asia khoe cađac au, ta aih i Phigen xam Hetmôghen. 16 Waiq Chuaq tamèt ka hnim da Ônêsi-phôro, majah qmang aih haq khoe bàc yàng alòng au, ùh hìaq camaih yac ka hnoq wì rùp kàt au. 17 Èh hòm, jò bu trùh ta Rôma, haq khoe drah chaq waq qmòe ka hnoq au. 18 Waiq Chuaq am ka haq jah hnoq kan tamèt da Chuaq ta hì aih èh! Kon loq ùh hnau ka mangai qnoeq, jò oe ta Êphêsô haq aih khoe patìh ka au rìm yiniq.