1 Oe ta Tagop Hadròeh Antiôt có bàc ngai pajàu xam mangai hnài, aih Basaba, Simeôn wì macreo dèh Nijê, Lusi-ut mangai gùng Syren, Manahem aih (oh ban da Hêrôt bùa qyoh), xam Saulo. 2 Jò oh daq qnang kùh waiq Chuaq rai apàm ka acaq, Yiang Hadròeh thê: “Lah đòeq crài Banaba xam Saulo đòeq wa hi broq trong Au khoe creo wa broq. 3 Atìq ka apàm ka acaq rai waiq khàn, oh daq roh tì enh qnhèq ka wa, khoe aih hi thê wa lam.

4 Qmang aih, Jò Yiang Hadròeh khoe thê Banaba xam Saulo lam, wa loh ta Sêloxi, enh aih wa tŏc boang lam ta pleo Chipro. 5 Jò wa khoe trùh ta Salamin, wa hnài trong Boc plình ta hnim tagop qyoh da mangai Juđa, Jon hadai lam hu wiang patìh ka wa. 6 Wa lam dìq ka pleo aih trùh hloe ta Ƀaphô, wa glàm mòeq ngai Juđa, mangai aih i canàih, aih mangai pajàu qnùt, yiniq haq Ƀajêsu, 7 oe ti mangai tình truàng yiniq haq Sêjut-Phaulut, mangai tình truàng kô khun rabiaq dìq jaq. Haq akhen ka Banaba xam Saulo trùh, haq enh bòch tamàng đeh trong Boc Plình. 8 Mahaq Êlima, mangai pajàu i canàih (aih ngìah yiniq haq), tàt wa aih, ti àu chaq trong dôq cwan tình truàng ùh lùi. 9 Khoe aih, Saulo wì ma loq creo Phaulô bình ha lùih Yiang Hadròeh, ngan tajang ka Êlima rai doe: 10 “Wùih, mangai bình bauq kan gôpla, kan dù meh, kon da kiac chŏc jròng, taƀlêq ka kan taq atoq, ìh ùh hêq ka enh toq troq đac trong jang da Chuaq qmòh? 11 Manòeq kô Chuaq dèch kŏng taƀlêq ka ìh, kô èh ìh jah lua mat, pi hnoq mat mahì toq ƀiaq hì.” Tajòe hloe jò aih raq, i kan clam cluiq gùp dŏng haq, haq ti tawìh dudan đòeq chaq mangai tìc rađeh. 12 Jò cwan tình truàng hnoq qmang aih, haq hi lùi, haq hamàih dìq cajaq ka bàu da Chuaq.

Oe ta Antiôt gùng Bisiđi

13 Phaulô xam deh bua tŏc boang enh Baphô lam ta Ƀetjê trong gùng Bamphi-li. Mahaq Jon cađac wa, đòeq hlài ta Jêrusalem. 14 Wa aih hòm, loh Ƀetjê wa ƀoe trong lam trùh Antiôt gùng Bisi-đi, Troq hì Sabat, wa mùt haqngui ta hnim tagop qyoh. 15 Bu hêq ka đŏc ta hset ranenh xam ƀài hset pajàu, wì craq wèq hnim tagop qyoh doe ka wa haq: “Wa daq! Tàng joq loq i ƀiaq nà bàu đòeq anoe hnài oh daq, anoe beq.”

16 Phaulô hi yòng, gwàih tì ka oh daq, haq doe: “Dìq ka oh daq Isorali xam mangai loq iu yùq Boc Plình, tamàng kô! 17 Boc Plình da mangai Isorali kô, khoe ràih kan cadraq bèn, broq ka wì aih chèch lòe jò wì haq oe đeh tanòe taneh diac wì, aih diac Êdip, yŏc cwìang itai kàn qnoh wì loh enh gùng aih. 18 Jah ta pôn jàt hanam, haq chìuq àt ka kan ùh wìa da wì aih nòe braih kàn. 19 Jò khoe raliang qnìh cađac tapèh diac ta Cana-an, yŏc taneh wì aih aq am dèh ka mangai da haq. 20 Khoe èh, qnah ta pôn hrinh padam jàt hanam tìa aih, Boc Plình am ka wì aih ƀài mangai hadrah trùh hloe ta qnhòng pajàu Samuên. 21 Jò aih wì bòch ka haq am ka wì mòeq ngai broq bùa, Haq am ka wì Saulo kon da Kit, nang noe Bênjamin, broq bùa wèq wì haq aih pôn jàt hanam. 22 Khoe èh haq cađac bùa aih, dèch Đawit broq bùa, anoe trùh Đawit Boc plình doe: “Au khoe chaq hnoq Đawit kon da Jêse, aih mangai lem ka manoh au, haq aih èh ma broq tiaq rìm yiniq au enh thê haq broq. 23 Tiaq qmang ka bàu khoe tèu đòeq adroe, enh nang noe haq aih èh Boc Plình ma hi padèch am ka magai Isorali mòeq Ngai Dèch, aih Chuaq Jesus Christ. 24 Adroe ka Chuaq Jesus trùh, Jon khoe hnài ranenh ƀaptem da kan loq raxach am mangai Isorali. 25 Jò Jon qnang pagêh dèh yiniq broq, haq doe: “Pì xoh au kô ìq cabô? Au ùh xài mangai pì qnang ti chaq. Mahaq i mòeq ngai trùh atìq ka au, au ùh tajì ka jah broq đeh mangai lêh caxy jep haq aih.”

26 Yôi oh daq bèn kô aih mangai kon xau da Apraham xam mangai ma loq iu yùq ka Boc Plình, bàu bahìa trùh kan dèch kô khoe anoe am ka bèn. 27 Majah qmang aih xam cwan xam mangai oe ta Jêrusalem ùh canau loq ka Chuaq Jesus kô, aih ìq raq jò wì ma tahadrah ka haq, wì haq khoe broq gêh bàu ƀài mangai pajàu wì haq ma loq đŏc ta hì Sabat. 28 Yac ka wì chèh chaq ta haq wì ùh loh qmòeq yiniq lui cleq ma troq ka cachìt, mahaq dua wì àu bòch dôq Philat jêh cađac haq. 29 Jò wì broq khoe xìt rìm trong ma khoe achìh trùh haq, wì hi qnoh haq enh long pagat, èh catùh hanang haq ta ralùng. 30 Mahaq Boc Plình khoe broq haq rìh hlài enh kan cachìt. 31 Ƀài mangai ma tiaq haq enh Galili tŏc trùh Jêrusalem jah hnoq haq bàc hì, wì aih manoèq kô qnang anoe hu panhìn haq am ka mangai bèn. 32 Da nhèn kô hòm, anoe am ka oh daq bàu lem, aih la bàu Boc Plình ma khoe tèu am ka kan cadraq bèn rameh: 33 Boc Plình khoe broq ka Chuaq Jesus rìh hlài, qmang aih khoe xìt bàu haq ma tèu am ka bèn, aih ƀài kon xau da kan cadraq bèn, wop qmang ka bàu khoe achìh ta hset Calêu Plình:

34 Boc Plình broq ka Chuaq Jesus rìh hlài enh kan cachìt, qmang aih dôq chac haq ùh jò leq om hnhung hòm, qmang ka Boc Plình khoe doe: “Au am ka pì bàu hadròeh cajap, am xôq ramot au ma khoe tèu ka Đawit.” 35 Ajang brong qnoeq hòm doe: “Ìh ùh dôq dèh Mangai Hadròeh ìh hnoq kan om taleq.” 36 Jò Đawit oe rìh, broq tiaq bàu Boc Plình thê, khoe aih cachìt, haq khoe jah catùh dèh ti kan cadraq, hanang haq khoe om. 37 Mahaq Mangai Boc plình ma broq ka haq rìh hlài enh kan cachìt ùh om taleq. 38 Qmang aih, oh daq au, bèn khòh loq rameh: Canòm ka Chuaq Jesus aih raq, kan baclaih yiniq lui khoe jah anoe am ka pì; 39 èh canòm ka haq aih raq waq toq cabô lùi aih hi jah kan taq atoq, rìm trong tiaq ranenh da Môise ùh broq ka mangai leq jah kan taq atoq. 40 Aih ìq, drah wèq rađeh dôq bàu khoe achìh ta hset pajàu ùh hìaq trùh ka pì:

42 Wa aih cadiang loh enh hnim tagop qyoh, wì akhen ka wa trùh hì Sabat atìq hnài tam bàu aih. 43 Jò khoe hêq enh tagop, i bàc ngai neo tiaq trong Juđa, tiaq Phaulô xam Banaba, wa capoch tuàng ti wì rai pariaq wì oe ma cajap ta kan loq waq Boc Plình.

44 Hì sabat atìq, wì ta aih tagop ten dìq ka dabau đòeq ta màng bàu Chuaq. 45 Yàng ƀài mangai Juđa hnoq mangai bàc qmang aih ta manoh wì bình chàu kan tagit, wì haq tàih cađac bàu Phaulô rai capoch qmèq hloe ka haq. 46 Phaulô xam Banaba hi doe hloe ka wì: Nhèn ep hnài bàu Boc Plình ka pì adroe òeq, mahaq pì khoe ùh tamàng, pì hnoq rađeh ùh tajì đòeq jah kan rìh halình mòeq đòe, kô èh nhèn tawìh ta mangai diac wì. 47 Majah qmang aih Chuaq i thê nhèn rameh:

48 Mangai diac wì tàng anoe qmang aih wì toq lem bùi manè apôi bàu da Chuaq, mangai leq ma khoe jah padon đòeq ka kan rìh halình mòeq đòe, dìq lùi dŏng.

49 Trong da Chuaq hlàng jàp gùng aih. 50 Mahaq mangai Juđa baxrùq ƀài mangai gucadrì padrŏng kan tagùng aih xam ƀài mangai ratauq, tirùp Phaulô xam Banaba, khoe aih hnan đac wa loh khoe dèh ka gùng. 51 Wa aih tangèa ta wì, hapùih caqnìh blo top ta jo wa, Khoe hi lam ta Ycôni. 52 Wì mangai tiaq hŏc jah ùc bình kan lem bùi xam Yiang Hadròeh.