1 Oe ta Ycôni, Phaulô xam Banaba mùt ta hnim tagop qyoh da mangai Juđa, wa capoch hnài qmòe dìq jaq, loh qmòe ka i bàc ngai Juđa xam mangai Gorec lùi tiaq. 2 Mahaq mangai Juđa ma qnhòq waq lùi xan toq patah rai baxrùq manoh cliac ƀài mangai cla gùng aih đòeq hu tablêq ka wì oh daq. 3 Yac ka qmang aih, Phaulô xam Ƀanaba oe ta aih dùnh diq wa bình manoh lùi, anoe Chuaq am ka wì, ùh lòm yùq qmòe cleq. Chuaq yŏc tì kŏng wa broq bàc kan halac, đòeq panhìn ka cajap trong loq waq da Haq. 4 Mangai ma oe ta phôq aih talah broq baiq: Qnah ngai tiaq pah magai Juđa, qnah ngai tiaq wa. 5 Jò mangai diac wì xam mangai Juđa hloe xam bài cwan mòeq manoh ti dabau yòng taƀlêq rai enh yŏc hmo đàp wa, 6 mahaq wa khoe loq adroe, wa hi wia enh aih lam puplech tagùng Lycôni aih phôq Lit tro, Đetbo, xam ƀài gùng ten aih, 7 rai hnài Bàu lem.

8 Oe ta Lit tro i mòeq ngai pen, liap qmòe enh jò baxèm hauang, ùh jah cadiang. 9 Haqngui tamàng bàu Phaulô hnài. Phaulô ngan mat haq, hnoq haq i manoh lùi đòeq jah broq brêh, 10 Phaulô hi capoch cadêh: “Ìh yòng beq, yòng ma hnhoh haq.” Haq aih aplôh mòeq qmang, khoe aih hi cadiang lam.

11 Wì ta aih hnoq yiniq Phaulô khoe broq, wì tapoch xam bàu Lycôni: Ƀài kiac khoe yŏc chac mangai đòeq loh ti bèn. 12 Wì creo ka Ƀanaba aih kiac Jupite, Phaulô aih wì creo kiac Mecuro, majah qmang aih haq mangai broq gàu yòng hnài. 13 Craq pajàu da kiac Jupite i hnim tadreo ajang qmang ngo mùt ta phôq, aràng mòeq toq ƀo qnìq xam riang trùh ajang trong qmang, enh pajùm mòeq manoh ti wì ta aih hu dèch mòeq ramènh tadreo. 14 Mahaq jò Ƀanaba xam Phaulô aih mangai tiaq cla, tàng qmang aih, wa haq hit deh eo rai tùh loh ta mangai bàc, rai doe cadêh: 15 Wùih oh daq! gleq majah broq qmang qmat? Ma hadai mangai tìah ka oh daq, ma aràng Bàu lem am ka pì, dôq pì cađac ƀài kiac ùh loh cleq tau, hu hlài ti Boc Plình rìh halình mòeq đòe, Haq aih ma broq loh plình crŏng taneh, diac raxìq xam rìm yiniq ta aih. 16 Qnhòng calah nèh, haq dôq rìm diac mangai leq mangai meh tiaq deh hra trong, 17 mahaq dua haq patô rađeh yôt ka wì, aih la haq am xôq ramot, caqnìh mè enh plình, jò mùa am ka wì jah qmau jah plì, dahwèq acaq ùh dìq, xam kan lem bùi. 18 Mahaq yac ka wa anoe qmang aih, bu qnang lem tàt wì ùh hìaq dèch ka wa ramènh tadreo.

19 Khoe ka aih, i mangai Juđa trùh enh Antiôt xam Ycôni lam padô wì ta aih, wì yŏc hmo hibùq Phaulô, xoh dèh haq khoe cachìt, wì hua qnoh haq enh gùng ka phôq. 20 Mahaq jò mangai tiaq hŏc ta aih qnang tagop dabau oe dudan ka haq, haq padinh yòng mùt ta phôq. Hì atìq, haq lam ti Ƀanaba trùh ta Đetbo.

21 Wa anoe Bàu lem ta aih, broq ka bàc ngai wìh wìa mangai tiaq hŏc, wa hi hlài ta Litro, Ycôni xam Antiôt. 22 Pariaq mangai tiaq hŏc ep cajap manoh lùi, anoe ka wì loq qmòe adroe ep glàm bàc kan xalep men jah mùt diac Boc Plình. 23 Jò wa khoe ràih ƀài mangai đòeq hu broq gucraq ka rìm Tagop Hadròeh ta aih, khoe ka apàm ka acaq rai waiq khàn, dèch wì aih ka Chuaq wa haq ma khoe lùi dèh. 24 Khoe aih, wa lam catech ka gùng Bisiđi, trùh tagùng Bamphily. 25 Atìq ka hnài ta Betjê, wa hi loh ta Atali. 26 Enh aih, wa lam boang hlài ta Antiôt, aih raq nòe wa ma khoe loh lam, ma khoe jah jao am ka kan loq waq Boc Plình, đòeq hu broq rìm yiniq wa neo broq gêh. 27 Trùh nòe, wa creo ka Tagop Hadròeh tagùng aih, wa hi taqmon rìm yiniq Boc Plình khoe broq ajang tì kŏng wa, Boc Plình khoe pèh mòeq toq qmang kan lùi am ka mangai diac wì qmang leq cadèh. 28 Mangai tiaq hŏc ta aih bàc hì.