1 Juđe, hapŏng da Chuq Jesus Christ, oh da Jaco, achìh am ka ƀài mangai ma khoe jah creo, jah Boc Plình aih Baq bèn loq waq, jah Chuaq Jesus Christ wèq ban: 2 waiq kan tamèt, kan catèm, kan loq waq rai èh rai bàc ka oh daq!

3 Oh daq da au, au dìq jaq tangèh achìh ka oh daq trong bèn jah dèch claih pajùm ti dabau, yàng manòeq au hnoq rađeh ep achìh hu pariaq oh daq ep cajap manoh đòeq hu wiang tablêq ka manoh lùi da bèn, aih la manoh lùi khoe jah am ka mangai hadròeh mòeq yàng raq khoe tàu. 4 Majah qmang aih i ƀài wì tau ti achop mùt taqne oh daq bèn, wì haq aih la ƀàimangai khoe lah đòeq crài enh nèh raq đòeq padon pòq kan baxa, aih ƀài mangai ùh iu yùq Boc Plình, halìh kan loq waq da Boc Plình wìh wìa kan dù, aih ƀài mangai ùh lùi Chuaq dèch bèn aih Jesus Christ, toq haq raq Chuaq bèn.

5 Yac ka oh daq khoe loq, mahaq dua au enh bahmàng hlài ka pì, calah nèh Chuaq paclaih mangai da haq loh khoe ka gùng Êjiptô, atìq aih haq palùng dŏng ƀài mangai ma ùh lùi; 6 èh ƀài ƀình plình ma ùh wèq deh caloeh rai cađac deh teo nòe, aih haq khoe yŏc caxy datoeq kàt đòeq wì aih tanòe clam cluiq, gòm hì hadrah kàn. 7 Hadai qmang aih diq, gùng Sôđôm gùng Gômôro xam ƀài plài dudan aih hadai cađac rađeh ta kan tango lah halac, gucalô tango hadai gucalô, gucadrì tango hadai gucadrì. Manòeq kô wì aih qnang chìuq baxa ta ùnh ùh pat, đòeq broq dua am ka bèn hnoq. 8 Hanoh qmang aih, ƀài mangai ma ùh iu yùq ka Boc Plình kô, toq ti apô broq amùa dèh ka chac cla, jù lê đac cwìang ma haqnhèq hùa ratauq bàu ka wì craq. 9 Jaq Michen aih cla craq ƀài ƀình plình jò haq tablêq ka Kiac dù hu blah yŏc hanang Môise, aih dua haq ùh hùa i bàu hnap hnuq hadrah cleq; haq toq doe đeh rameh: Waiq Chuaq cwò ka ìh! 10 Yàng da wì kô aih, trong leq wì haq ma ùh qnì aih wì haq jù đac hloe; trong leq wì haq loq laiq đeh ka loq tìah ka ngè rìh ùh i ka manoh, wì yŏc trong aih raq đòeq broq raliang cla rađeh. 11 Joq haƀo ka wì haq qnàng, majah qmang aih wì haq tiaq trong da Ca-in, cadàu tiaq kan plai loh qmòe ka cađac rađeh clìh ta kan ùh troq da Bala-am; raliang hnhung tiaq kan gôpla da Côre.

12 Wì haq tìah ka habau ra-om oe taqne yiniang loq waq, qmang ka mangai ban trìu hèm toq ka ban rađeh ka panàc, ùh hèm yùq qmòe cleq; qmang ka yùc ùh i ka diac; cayeo tàih tacô tatau; qmang ka long prùng gàu ralìm, ùh loh plì, baiq yàng cachìt, tarèq riah; 13 qmang ka lai laq diac raxìq plôh dèh camùh amùa; tìah ka halŏng lac lai, kan clam cluiq mòeq đòe khoe palauq đòeq ka wì haq! 14 Taiq wì kô raq, Hênoc aih xau tapèh qnhòng da Ađam, khoe capoch pajàu rameh: 15 Hacô, Chuaq trùh xam bình ka muàn mangai hadroèh đòeq hadrah dìq ka mangai, đòeq hu taqmòq yiniq lui ka mangai ma ùh lùi, tiaq rìm trong wì haq ma khoe ùh iu yùq, hloe xam tang nà bàu ƀài mangai aih khoe capoch tablêq hlài ka haq. 16 Aih la ƀài mangai loq mamùc ma-uàng, loq wech goh, cadàu tiaq dèh kan loq ònh da cla, enh toq ti catèh, toq ra raheq pajìang bàu ka mangai qnoeq, đòeq hu jah lòeq ka rađeh.

17 Mahaq oh daq da au, pì khòh hmàng bàu ƀòe mangai Tiaq cla Jesus Christ bèn ma khoe doe. 18 Wì aih i doe, ta qnhòng pulùch kô èh i bàc ngai loq do halê oh daq, cadàu tiaq kan ònh dèh cla hu broq lìq làn. 19 Aih raq ƀòe mangai basrùq oh daq talah ka dabau, ƀòe mangai rìh tiaq xech akia, ùh i ka Yiang Hadròeh.

20 Mahaq pì aih oh daq da au, pì ep broq dèh ka cajap enh qnhèq ka manoh lùi ma dìq jaq hadròeh da cla, rai waiq khàn ta Yiang Hadròeh, 21 drah loq wèq rađeh oe ta kan loq waq Boc plình, rai gòm kan ha-och enh nòe Chuaq Jesus Christ am ka bèn kan rìh halình mòeq đòe. 22 Ep ha-och ka wì kô aih ƀài mangai qnang raqngòt, 23 drah dèch ƀài wì tau, hua qnoh wì haq claih ka ùnh, ka mangai ma qnoeq hòm thê pì i manoh loq ha-och rai loq crè, git trùh blah eo xech akia ma khoe broq ka haq loh đac ka trùq traq.