HSET MAHNO
1
Bàu
achoh
1 Kan mahno da Chuaq Jesus Christ, Boc Plình ma khoe am deh ka haq đòeq hu paqnoh ka hapŏng haq jah loq rìm yiniq ma rênh trùh tangèa kô èh, qmang aih haq khoe thê deh bình plình loh patình ka Jon, aih hapŏng da haq, 2 aih la mangai anoe hlài bàu Boc Plình xam kan panhìn da Jesus Christ, taƀoe hlài rìm yiniq đeh ma khoe hnoq. 3 Xôq ramot am ka mangai đŏc xam mangai tamàng bàu pajàu kô, wèq tiaq rìm nà ma khoe achìh ta kô. Majah qmang aih khoe haqnap trùh dèh jò.
Bàu achìh am ka tapèh Tagop Hadròeh gùng Asia
4 Jon achìh am ka tapèh Tagop Hadròeh oe ta Asia: Waiq kan tabòeh dech xam kan catèm am ka oh daq trùh enh Mangai qnang i, khoe i, i yôt mòeq đòe, xam enh tapèh yiang oe enh ngèa gèq da haq, 5 xam enh nòe Chuaq Jesus Christ aih Mangai panhìn ùh tablòq manoh, aih Kon ramua khoe rìh hlài enh kan cachìt đòeq broq cla craq ƀòe bùa ta crŏng taneh.
6 Mangai loq waq ka bèn, khoe yŏc deh mahim qnheo hreo yiniq lui bèn, broq kabèn wìa diac da haq, wìa pajàu Boc Plình aih Baq da haq, kan ranhòm, kan i cwìang itai oe dìq ta haq mòeq đòe! Amen.
7 “Ngan kô, haq wìh hlài tacô xam yùc plình,
rìm mat dìq jah hnoq,
yac ka mangai ma bìt haq ji hadai,
dìq dŏng ka nang noe ta crŏng taneh crò hmoe ka haq”. Joq qnàng qmang aih! Amen.
8 Chuaq aih Boc Plình, Mangai qnang i, khoe i èh i hloe moèq đòe aih Mangai i cwìang dìq dŏng, doe: “Au kô Anpha xam Ômega”.
Kan mahno am ka Jon jò oe ta pleo Bat mô
9 Au kô Jon, aih oh daq bèn, mangai mòeq bua ka pì ta kan ranàc, enh dalam ka Chuaq Jesus Christ hadai chìuq àt chìuq gòm diac plình, au khoe oe ta pleo Bat mô aih taiq bàu Boc Plình xam taiq anoe au panhìn ka Chuaq Jesus. 10 Wop hì da Chuaq, au jah Yiang Hadròeh qnung, au tàng dèh enh rù i bàu dêh tìah ka bàu ken, 11 doe rameh: “Achìh qmùt ta hset ƀòe yiniq ìh ma hnoq, èh gòe aràng ka tapèh Tagop Hadròeh oe ta Êphêsô, Simìacno, Betgam, Thia-tiro, Sađe, Phila-đenphi xam Laođi-sê.
12 Jò aih, au hwi enh rù đòeq hu ngan bàu capoch ka au aih ìq bàu cabô, 13 bu tawìh, au hnoq tapèh toq jènh đen broq xi wang, taqne ƀòe jènh đen aih i cabô meh tìah ka kon ngai, caxùnh eo yôh trùh ta jo, caxi qnam broq xi wang kàt ajang rada. 14 Xàc ta gàu haq taboc tìah ka xàc trìu, taboc qmang ka hiloc, mat haq qmang ka ùnh, 15 jènh chah qmang ka đùng khoe ram ta tanùh, bàu qmang ka bàu diac kàn. 16 Kŏng pah haq qma cadop wê tapèh toq halŏng, enh hacùng loh mòeq pla chang hin baiq màn, hadrò qmang ka mat mahì jò ma qngah dìq jaq.
17 Bu hnoq, au tabùng cro ajang jènh haq tìah ka mangai cachìt; mahaq haq yŏc tì pah qma bèq chac au, rai doe: “Apaq yùq cleq! Au kô Mangai ma adroe xam Mangai ma atìq dŏng, 18 Au Mangai rìh, au khoe achìt mahaq manòeq kô ngan beq au rìh mòeq đòe, wèq gahlòng da kan cachìt xam nòe mangai cachìt oe. 19 Qmang aih, drah achìh rìm yiniq ìh ma khoe hnoq, ƀòe yiniq ma qnang i manòeq xam ƀòe yiniq padon trùh ta atìq kô èh, 20 aih la ƀòe kan bahlèp da tapèh toq halŏng ìh khoe hnoq enh kŏng pah qma au, xam da tapèh toq jènh đen wang. Tapèh toq halŏng aih ƀình plình da tapèh Tagop Hadròeh, tapèh toq jènh đen aih tapèh Tagop Hadròeh”.