HSET LUCA
1
Bàu lem tiaq Luca taqmon
1 Wì craq Thêopilo, i bàc ngai khoe dìq ka manoh achìh hu taqmon hlài ƀài yiniq broq ma khoe gêh oe taqne nhèn, 2 tiaq wì ma hnoq qmòe enh baxèm, manòeq khoe loh mangai ma patìh ka Bàu lem khoe anoe hlài ka bèn, 3 qmang aih jò khoe ngan hlài ka rabiaq rìm trong enh jò baxèm, au hèm khòh tiaq qmòe tang cadiang hu achìh hlài ka ìh, 4 dôq ìh loq qmoè ka cajap bàu ìh ma khoe jah hŏc aih joq qnàng.
Bình plình bahìa ka Xachari
5 Qnhòng Hêrôt broq bùa diac Juđê, i mòeq ngai pajàu yiniq haq Xachari, tiaq dèh apah Abija, Êlisabet mai haq hadai nang noe Arôn. 6 Boc Plình ngan hnoq dìq baiq ka wa aih mangai taq atoq, wèq gêh geo rìm ranenh hloe xam rìm ramènh Boc Plình thê. 7 Wa ùh i ka kon majah qmang aih Êlisabet haq xon, èh dìq baiq ka wa khoe bàc hanam.
8 Jò Xachari tiaq dèh wì ma ta axong, khoe troq jò da haq broq pajàu dèch ramènh tadreo am ka Boc Plình. 9 Tiaq dèh trong ƀài pajàu kàn xan broq, Xachari pàih panàih troq ka haq mùt ta hnim kùh waiq đòeq bùh gahnàu xua thùm ka Boc Plình. 10 Trùh jò bùh gahnàu, ƀài mangai bàc oe dìq enh gùng waiq khàn. 11 Moeq ƀình plình loh enh ngèa ka Xachari, yòng enh pah qma ka nòe prang bùh gahnàu. 12 Jò Xachari hnoq ƀình plình, haq loh ka lèt rai yùq crè. 13 Mahaq ƀình plình doe ka haq: Xachari, ùh dùh yùq, bàu ìh waiq khàn khoe jah tamàng, Êlisabet cadrì ìh, haq aih èh ha-uang ka ìh moeq ngai kon calô, ìh yiniq ka aih Jon. 14 Kon calô aih èh broq ka ìh jah lem bùi, bàc ngai qnoeq hadai manè jò ha-uang qnoh haq. 15 Enh ngèa Boc Plình, kon qyoh aih wìa gucraq, yac ka alac plì nho, yac ka cleq ma loq bù dua haq ùh ôq, haq aih jah bình halùih Yiang Hadròeh jò haq oe raq ta cliac miq. 16 Haq qnung bàc ngai Isorali wìh hlài trùh ti Chuaq aih Boc Plình wì haq. 17 Èh haq lam enh ngèa ka Chuaq tiaq manoh xam kan itai qmang da Êli, đòeq broq manoh baq wìh hlài dèh ta kon, èh mangai ùh qnì iu wìh hlài ta kan rabiaq da mangai taq atoq, hu padon đòeq ka Chuaq moeq nang noe khoe palauq đòeq ta manoh. 18 Xachari bòch ƀình plình: Broq qmang leq au ma loq ka bàu ìh aih joq qnàng? Au khoe craq, mai au khoe bàc hanam. 19 Ƀình plình doe: Au kô Gapriên, yòng enh ngèa ka Boc Plình. Haq khoe thê au trùh bahìa kan lem bùi kô. 20 Manòeq kô, ìh loh ka làu, pi hloh tapoch trùh hì loh ƀài yiniq qmang bàu au khoe anoe, majah qmang aih ìh ùh lùi bàu au, aih la bàu trùh dèh jò hi xìt.
21 Jò aih dìq ka ƀài wì mangai bàc oe enh gùng gòm Xachari dìq jaq hamàih, majah qmang aih haq oe ta hnim kùh waiq dùnh hrìn. 22 Jò Xachari loh enh gùng, haq tapoch ùh jah, aih wì ma hi loq haq i hnoq kan mahno tanòe hnim kùh waiq, haq yŏc tì ti patìah ka wì, mahaq oe raq làu. 23 Jò haq khoe dìq dèh ka hì patìh, haq hlài dèh ta hnim. 24 Toq biaq atìq ka aih, Êlisabet, mai haq hi hadràp, haq cadoc rađeh padam khê 25 haq doe: Chuaq khoe broq yiniq kô ka au, haq khoe haqmiang ngan au, đòeq lêh kan camaih au oe taqne mangai bàc.
Anoe adroe hì ha uang Jesus
26 Jò Êlisabet oe jiang khoe jah tadràu khê, Boc Plình thê ƀình plình Gapriên trùh ta plài Naxaret, gùng Galili. 27 Lam glàm mangai adrùh sriu yiniq haq Mari, khoe tèu bàu yŏc moeq ngai radam yiniq haq Jôsep, caxi noe Đawit. 28 Ƀình plình trùh ajang nòe mangai adrùh aih rai doe: Manè am ka ìh, mangai jah xôq ramot! Chuaq oe ti ìh. 29 Tàng bàu aih Mari haq hamàih, haq hèm bàu hangah qmang aih ìq qmang leq? 30 Ƀình plình doe: Mari ùh dùh yùq dèh, majah qmang aih ìh khoe jah kan tamèt enh nòe Boc Plình. 31 Kô èh ìh hadràp èh ha-uang loh moeq ngai kon calô, ìh yiniq ka haq Jesus 32 Haq aih èh wìa gucraq, jah creo Kon Yiang Dìq Jaq Haqnhèq. Chuaq aih Boc Plình jah am ka haq gèq enh kan cadraq haq aih Đawit. 33 Haq aih èh ma wèq cwìang enh qnhèq ka nang noe Jacôp trùh mòeq đòe, diac da haq ùh lùch. 34 Mari padreo bàu: Au qnhòq lah qnì ka gucalô leq, wìa ka i qmang aih? 35 Ƀình plình doe: Yiang Hadròeh trùh enh qnhèq ka ìh èh kan itai Yiang Dìq Jaq Haqnhèq taqmàn ìh tayàp haq, dài aih ìq raq, kon hadròeh aih ha-uang loh majah ep creo kon Boc Plình. 36 Hatau, Êlisabet mangai hadròng ìh, hanoh oe jiang jò haq khoe craq, rìm ngai khoe loq ka haq aih xon, yàng manòeq kô haq oe jiang khoe jah tadràu khê. 37 Majah qmang aih, ùh i cleq Boc Plình ma broq ùh jah. 38 Mari padreo bàu: Au kô mangai hapŏng Chuaq, waiq bàu ìh anoe ka au aih jah gêh! Khoe aih ƀình plình hi lam.
Mari lam hmàih ka Elisabet
39 Ta ƀài hì aih, Mari haq drah lam trùh ta plài ma oe ta wang nòe gùng Juđe, 40 ta aih haq mùt ta hnim Xachari rai dèch bàu manè lem bùi ka Êlisabet. 41 Êlisabet bu tàng bàu Mari, kon nga oe ta cliac khoe canhroh, Êlisabet khoe jah bình Yiang Hadròeh, 42 Haq dèch bàu anoe: Taqne dìq dŏng ka mangai gucadrì, ìh kô mangai i xôq ramot, kon qyoh oe ta cliac hadai jah xôq ramot. 43 Enh leq kô ìq au majah kan tamèt qmang kô, miq da Chuaq au trùh hmàih ka au? 44 Majah qmang aih don au butàng bàu ìh, kon nga ta cliac au khoe canhroh rai lem bùi. 45 Xôq ramot ka ìh mangai khoe lùi bàu Chuaq anoe, aih bàu trùh dèh hì jah xìt. 46 Mari doe rameh:
Manoh au manè apôi Chuaq,
47 Mahua yiang au lem bùi tanòe Boc Plình aih Chuaq dèch au,
48 Majah qmang aih haq khoe hqmàng hnoq kan hamoq au, mangai hapŏng haq.
Pang kô ta èh, rìm qnhòng dìq anoe au kô mangai i xôq ramot;
49 Majah qmang aih, Yiang dìq jaq haqnhèq, khoe broq bìac kàn ka au.
Yiniq haq aih hadròeh,
50 Haq loq waq ka mangai loq iu haq enh qnhòng kô trùh qnhòng tau.
51 Haq yŏc dèh tì kŏng đòeq patô qnoh deh kan itai;
Rai raliang đac trong da mangai i manoh loq padèch rađeh.
52 Haq khoe caqnìh qnoh mangai i cwìang clìh enh gèq cla wì haq,
Rai dèch atŏc mangai loq hamon rađeh
53 Haq khoe broq ka mangai pangot jah bình dahwèq jìang,
Hnan mangai kan hlài tì dech.
54 Haq khoe wiang ti Isorali, hapŏng haq
Đòeq bahmàng hlài dèh kan loq waq haq,
55 Tìah ka bàu haq khoe doe ka kan cadraq bèn.
56 Mari oe ti Êlisabet jah ta piq khê, khoe aih hi wìh hlài dèh ta hnim.
Ha-uang ka Jon Baptit
57 Jò khoe trùh dèh khê Êlisabet hi ha-uang, haq ha-uang moeq ngai kon calô. 58 Plài pla xam ƀài oh daq hìa Chuaq khoe dìq jaq tamèt ka Êlisabet wì wiang trùh lem bùi ti haq. 59 Trùh rahem hì, dìq ka wì lam ta aih đòeq broq ramènh kat akia, wì yiniq ka kon qyoh aih Xachari tiaq yiniq dèh baq. 60 Mahaq miq haq doe: Ùh, ep yiniq ka haq Jon. 61 Wì doe: Dìq dŏng ka nang noe ìh ùh i ka cabô leq i yiniq aih. 62 Wì yŏc tì ti patìah hu bòch baq haq enh yiniq dèh ka kon yiniq cleq. 63 Xachari thê wì yŏc capiac long ban qyoh, haq achìh: yiniq haq Jon. Mangai leq mangai meh hamàih đeh hra. 64 Wop hloe jò aih raq, rapet haq jah rađah, haq tapoch rai manè apôi Boc Plình. 65 Dìq ka wì taplài cadròt đeh hra, dìq ka gùng wang Galili wì anoe ka dabau toq trong aih. 66 Cabô tàng bàu aih hanoh wê đòeq ta manoh rai doe: Kon nga aih èh qmang leq cadèh oq? Majah qmang aih tì Chuaq oe ti haq.
Xachari calêu
67 Jò aih, Xachari baq kon nga aih jah bình Yiang Hadròeh, haq tapoch pajàu rameh:
68 Manè apôi Chuaq aih Boc Plình Isorali,
majah qmang aih Ìh khoe trùh hmàih, rai baxon yŏc hlài Isorali mangai da Ìh,
69 Ìh khoe paqnàng ka nhèn, ta hnim Đawit hapŏng Ìh,
moeq Ngai dèch nhèn i kwìang itai!
70 Tìah ka Ìh khoe yŏc bàu wì mangai pajàu hadròeh qnhòng calah nèh,
71 Ìh dèch nhèn khoe ka mangai tablêq, khoe ka nòe tì kŏng wì ma tagit ka nhèn;
72 Ìh paqnoh kan loq waq am ka kan cadraq nhèn, rai hmàng bàu tajap hadròeh cla Ìh,
73 Tìah ka Ìh ma khoe hapah ka Apraham kan cadraq nhèn,
74 Ìh khoe tèu bàu dèch nhèn claih enh tì kŏng mangai tagit ka nhèn,
Ìh am ka nhèn sôq ramot malem, ti ngèa Ìh.
75 Đòeq yŏc kan hadroèh, kan taq atoq hu patìh ka Ìh, dìq ka qnhòng cla ùh hòq qmòe cleq.
76 Kon oq! kô èh wì creo kon aih pajàu da Yiang Haqnhèq;
Kô èh kon lam enh ngèa ka Chuaq, padon trong ka haq,
77 Dôq ka mangai da haq ajang nòe yiniq lui wì haq jah caqnaih aih hu canau loq kan dèch am dech.
78 Majah qmang aih Boc Plình nhèn tamèt ta manoh,
Mat mahì enh qnhèq jah sreo qngah ka nhèn,
79 Đòeq sreo ka mangai hangui tanòe clam cluiq xam mangai hangui ta yàp qmù kan kachìt,
Rai qnung jènh nhèn lam ta trong catèm.
80 Kon qyoh aih yòng kàn, mahua yiang tadêh, rìh oe tanòe hawit trùh hì paqnoh rađeh ka mangai Isorali.