2
Hauang Chuaq Jesus
1 Jò aih Auguto, bùa kàn qnoh bàu thê dìq ka Lamah, aih taneh diac kàn dìq jaq, ep ti rèn ngan hlài mangai ta aih jah toq leq. 2 Aih yàng baxèm wì ti rèn ngan hlài, wop qnhòng da Quiniri-u broq cla craq ƀài cwan tagùng Siri. 3 Mangai hlài đeh hra ta gùng cla đòeq achìh qmùt dèh yiniq.
4 Jôsep aih caxi noe Đawit, haq hanoh lam enh Naxaret, gùng Galili, loh ta gùng Juđê trùh ta Bêt-le-hem. 5 Hu achìh qmùt dèh yiniq rađeh xam yiniq Mari, mangai khoe òq bàu yŏc haq, qnang oe jiang. 6 Jò wa qnang oe ta aih, khoe trùh hì Mari ha-uang. 7 Haq ha-uang kon calô ramua, yŏc mù taqmàn deh kon, ta qngùi ta atong nhat, majah qmang aih ta hnim padài khoe dìq ka nòe.
8 Hadai gùng aih, i ƀài mangai ban trìu oe tagùng, rìu qngah ka mang đòeq wèq dèh trìu. 9 Moeq ƀình plình da Chuaq trùh ten ka wì, kan ranhòm Chuaq qngah qngiang dudan wì haq, wì crè pi cajaq 10 Ƀình plình doe: Ùh yùq cleq! Hacô au bahìa ka pì moeq Bàu lem, aih raq kan lem bùi am dìq ka mangai oe ta crŏng taneh; 11 Hì cô ta plài Đawit khoe ha-uang ka pì moeq Ngai dèch mangai, aih Christ, aih Chuaq pì. 12 Kô oq kan hadro dôq pì hu canau ka Haq, pì hnoq moeq ngai kon qyoh taqmàn xi mù, kùi ta atong nhat. 13 Tajòe qmòe jò aih, raya rayùc lình plình xam ƀình plình aih calêu manè apôi Boc Plình rameh:
14 Qngah yiniq Boc Plình oe taplình haqnhèq,
Catèm tanòe haqneq am ka bài mangai haq loq waq!
15 Jò wì bình plình khoe talah ka wì haq hu wìh hlài ta plình, ƀài mangai ban trìu doe ka dabau: Beq bèn lam ta Bêtlehem hu ngan yiniq neo loh kô, Chuaq ma khoe doe ka bèn loq. 16 Qmang aih wì haq drah lam ka nhet, hnoq Mari xam Jôsep xam kon qyoh qnang kùi ta atong nhat. 17 Jò khoe hnoq wì anoe hlài bàu ƀình plình anoe trùh kon qyoh, wì haq ma khoe jah tàng. 18 Dìq ka mangai tamàng hamàih đeh hra ka bàu ƀài mangai ban trìu anoe ka wì haq. 19 Mahaq Mari wê dìq dŏng ƀài bàu aih rai hèm yôt dèh ta manoh. 20 Ƀài mangai ban trìu tawìh hlài, rai broq qngah yiniq rai manè apôi Boc Plình trong wì haq khoe tàng xam yiniq wì haq khoe hnoq joq tìah ka bàu ma khoe anoe ka wì haq.
21 Trùh rahem hì, aih hì ep broq ramènh kat akia ka kon qyoh, wì yiniq ka haq Jesus, aih yiniq ƀình plình ma khoe yiniq adroe qmòe ka jò hadràp.
Dèch Jesus ka Boc Plình
22 Khoe dìq ka hì basròeh, tiaq ranenh Moise, Jôsep xam Mari atŏc kon qyoh ta Jêrusalem đòeq dèch ka Boc Plình, 23 qmang ka khoe achìh ta hset ranenh haq: “Rìm ngai kon calô ramua, ep dèch ka Chuaq”, 24 dèch tam baiq toq trù braih ùh meh baiq toq kon trù qyoh, qmang ka ranenh Chuaq khoe thê.
Simêon calêu manè, Anne mangai pajàu cadrì
25 Jò aih, ta Jêrusalem i moeq ngai rìh lem rìh taq atoq, yiniq haq aih Simêon, haq aih toq gòm kan alòng trùh ka Isorali, Yiang Hadròeh oe ti haq. 26 Yiang Hadròeh khoe anoe ka haq loq haq ùh cachìt adroe ka jah hnoq Christ da Boc plình. 27 Qmang aih, haq tiaq Yiang Hadròeh qnung, haq mùt ta hnim kùh waiq wop troq jò wa miq baq aràng Chuaq Jesus ta aih, hu pagêh ka haq rìm trong ramnenh khoe thê. 28 Haq aih hi caqmìn kon qyoh aih, haq manè apôi Boc Plình rameh:
29 Waiq Chuaq! Manòeq kô Ìh am au jah cachìt ka catèm tiaq troeq bàu Ìh;
30 Majah qmang aih mat au khoe hnoq kan dèch kon mangai trùh enh nòe Ìh,
31 Ìh ma khoe palauq qmòe dèh, đòeq broq kan qngah enh ngèa rìm diac,
32 kan qngah sreo jàp ka phù cròng, broq ka Isorali Ìh jah kan ranhòm.
33 Wa miq baq kon qyoh aih dìq jaq hamàih ka bàu wì anoe trùh dèh kon. 34 Simêon waiq xôq ramot am ka wa ŏng mai, haq doe ka Mari miq kon qyoh aih rameh: I bàu khoe tèu đòeq am ka Kon qyoh kô, haq broq nen ka bàc ngai Isorali tacro, èh hadai broq ka bàc ngai jah yòng, khoe tèu đòeq dôq haq wìa teo ka bàc ngai tarahen; 35 da ìh hòm, i moeq pla chang pàc hlùh ta cliac ìh. Aih èh bàc yiniq oe ta manoh bàc ngai jah paqnoh.
36 Èh hòm i mangai pajàu cadrì, yiniq haq An-ne, kon da Phanu-ên, caxi noe Ase, joq khoe bàc hanam. Enh jò haq oe raq adrùh sriu, atìq ka aih haq oe dèh ti ŏng jah tapèh hanam, 37 khoe aih haq hi hadrô. Jò aih haq khoe jah rahem jàt pôn hanam, oe toq ta hnim kùh waiq, dahì damang patìh ka Boc Plình, apàm ka acaq rai waiq khàn. 38 Hanoh jò aih diq, haq trùh ta aih, manè apôi Boc Plình rai anoe trùh kon qyoh ka bài mangai qnang tangèh gòm Jêrusalem jah dèch paclaih. 39 Jò Jôsep xam Mari khoe broq gêh ka trong ranenh Boc Plình thê, wa haq tawìh hlài ta Galili, trùh dèh ta Naxaret plài cla. 40 Kon qyoh aih yòng kàn, rai tadêh, jah bình kan rabiaq, xôq ramot Boc Plình oe ti Haq.
Jò Jesus jah moeq jàt baiq hanam
41 Rìm hanam wa miq baq Haq tŏc ta Jersalem, đòeq lam tagop ta hì ramènh Pancwa. 42 Jò khoe jah moeq jàt baiq hanam haq lam tiaq dèh wa miq baq tŏc ta aih hu hadai tagop ta hì ramènh qmang ka xan hmaq broq. 43 Khoe dìq ka hì ramènh, wì haq wìh hlài dèh tagùng, Chuaq Jesus oe hlài ta aih mahaq miq baq haq ùh qnì. 44 Hèm deh haq lam ti ƀài bua ta aih, khoe moeq hì lam trong aih men ti bòch wì oh daq xam ƀài mangai canau; 45 jò chaq haq khoe pi hnoq, wa wìh hlài ta Jerusalem đòeq chaq. 46 Piq hì wa men hnoq haq tanòe hnim Kùh waiq, qnang hangui taqne ƀài mangai hnài, rai tamàng rai bòch hlài wì aih. 47 Rìm ngai tàng bàu rai hnoq kan rabiaq haq wì dìq loh ka hamàih jò haq bòch wì. 48 Jò hi hnoq haq, wa miq baq dìq jaq hamàih. Miq haq doe: A kon! Hagleq ma jah haƀo ka ma qmang kô, ma khoe lèt oe i jaq cleq? 49 Haq bòch: “Aih chôp chaq dèh ka au? Chôp ma ùh loq au ep oe patìh dèh ta hnim Baq qmòh?” 50 Mahaq wa aih ùh tem bàu haq anoe ka rađeh cleq.
51 Khoe aih haq hlài ta Naxaret ti wa miq baq rai iu broq tiaq bàu wa, mahaq bàu da haq miq haq wê dŏng ta manoh. 52 Chuaq Jesus rai èh rai rabiaq tam, chac rai èh rai kàn, kiang èh kiang lem manoh Boc plình xam kon mangai.