3
Jon Baptit
1 Hanam moeq jàt padam qnhòng Tibêro broq bùa kàn, jò aih Bônso-philat broq cla craq ƀài cwan ta gùng Juđê, Herôt broq bùa qyoh ta gùng Galili, Philip oh haq broq bùa qyoh ta gùng Yturê xam tracôni, Lysa-nia broq bùa qyoh ta gùng Abilen, 2 Anne xam Caiphe broq pajàu kàn, aih i bàu Boc Plình thê Jon kon Xacahri tanòe gùng hawit. 3 Jon ti lam dudan jàp ka rìm gùng cròng diac Jôđan, hnài wì broq ramènh ƀaptem da kan loq raxach cađac trong dù đòeq hu jah caqnaih yiniq lui, 4 tìah ka bàu khoe achìh ta hset pajàu Êsai:
I bàu creo tanòe hawit:
Drah palauq trong ka Chuaq, pajang trong da haq.
5 Nòe jrùq tàc dôq haq bình,
Roc bui wang, roc nòe haqnhèq qnoh dôq haq haqneq;
Trong tawech pajang dôq haq hnhoh,
Trong qnhèq qneq broq dôq haq tamang.
6 Dìq dŏng kon mangai jah hnoq kan dèch enh Boc Plình.
7 Jon anoe ka mangai bàc qnang trùh ta aih đòeq jah broq ƀaptem: Nang noe bìh tau, cabô ma hnài pì loq wia ka kan nòeh hì atìq? 8 Qmat èh, drah wìa malem dôq ùh qngwan ka pì khoe loq raxach, ùh dùh doe Apraham aih kan cadraq nhèn, majah qmang aih au doe ka pì Boc Plình broq ƀài hmo kô loh nang noe ka Apraham jah. 9 Chòng khoe roh qmòe ajang xèm long, waq toq long leq ùh loh plì lem, long aih èh koh đòeq hu bùh cađac.
10 Wì bòch Jon: Aih èh nhèn ep broq qmang leq? 11 Haq padreo bàu: Cabô i baiq blah eo, yŏc moeq blah am ka mangai chac dech, dahwèq acaq hadai qmang aih. 12 I bàc ngai yŏc thèq trùh hu broq ƀaptem, wì aih bòch: Ha nhèn ep broq cleq? 13 Haq doe ka wì: Apaq yŏc yeo bàc ka maneh khoe pajaq. 14 Ƀài mangai lình hanoh bòch: Ha nhèn kô hòm ep broq cleq? Haq doe: apaq tacaq ka cabô, apaq qnùt cabô, jèn baha pì pang leq, pì waq dèh pang aih.
15 Majah qmang aih wì qnang tagòm ngèh, wì hèm dèh ta manoh ahìaq Jon kô raq Christ, 16 aih ìq Jon majah doe ka wì: Au broq ka pì ƀaptem xi diac mahaq Mangai trùh atìq ka au cwìang yeo haqnhèq ka au, au mech qnhòq wìa broq đeh magai doeh da haq caxi jep. Haq aih èh ma broq ka pì ƀaptem xi Yiang Hadròeh xi ùnh. 17 Tì Haq wê cađap hu dè dèh qmau ta haneh ka hreo, lênh qmau haq tah ta hapom, manùh haq bùh ta ùnh ùh jò leq pat.
18 Jò Jon anoe Bàu lem, haq hadai hnài wì bàc trong qnoeq, 19 Mahaq Hêrôt bùa qyoh, Jon khoe i tapoch ùh lòh haq yŏc Hêrođia mai oh haq, hloe xam ƀài trong dù bùa ma broq, 20 haq broq tam moeq yiniq dù hòm, aih haq rùp clêh Jon ta hnim tù.
Broq ƀaptem ka Jesus
21 Jò dìq ka mangai ta aih khoe jah broq ƀaptem, Chuaq Jesus hanoh jah broq ƀaptem, plình tapèh qmòe jò haq qnang waiq khàn, 22 Yiang Hadròeh yŏc chac trù loh jràp ta chac haq, tajòe qmòe jò aih i bàu enh plình doe: “Ìh kô kon au, mangai au loq waq deh, kon lem ka manoh au rìm trong.”
Caxi noe Jesus Christ
23 Jò Chuaq Jesus baxèm broq dèh trong haq broq, jò aih haq bu jah qnah ta piq jàt hanam. Tiaq manoh wì hèm haq aih kon Jôsep, Jôsep kon Hêli, 24 Hêli kon Matat, Matat kon Lêwi, Lêwi kon Mên chi, Mên chi kon Jane, Jane kon Jôsep 25 Jôsep kon Mata-thia, Mata-thia kon Amôt, Amôt kon Nahum, Nahum kon Êt-li, Êt-li kon Na-gê, 26 Na gê kon Ma at, Ma at kon Mata-lia, Mata-lia kon Sê-me-in, Sê-me-in kon Jô-et, Jô-et kon Jô-đa, 27 Jô-đa kon Jô-anan, Jô-anan kon Rêsa, Rêsa kon Xôro-baben, Xôro-baben kon Sala-thien, Sala-thien kon Nêri, 28 Nêri kon Mênchi, Mênchi kon A đi, A đi kon Kôsam, Kôsam kon Ên-mađan, Ên-mađan kon Ero, 29 Ero kon Jêsu, Jêsu kon Êli-ese, Êli-ese kon Jôrim, Jôrim kon Ma-that, Ma-that kon Lêvi, 30 Lêvi kon Si-mê-on, Si-mê-on kon Juda, Juda kon Jôsep, Jôsep kon Jônam, Jônam kon Êli-akim, Êli-akim Mê-lea, 31 Mê-lea kon Mêna, Mêna kon Mata-tha, Mata-tha kon Nathan, Nathan kon Đawit, 32 Đavit kon Jêse, Jêse kon Jôbet, Jôbet kon Bo-ô, Bo-ô kon sala, Sala kon Nach-son, Nach-son kon Ami-na-đap, 33 Ami-na-đap kon Amin, Amin kon Arôni, Arôni kon Et-rôm, Et-rôm kon Pharê, Pharê kon Juda, 34 Juda kon Jacôp, Jacôp kon Ysac, Ysac kon Apraham, apraham kon Tharê, Tharê kon Nacô, 35 Nacô kon Sêruc, Sêruc kon Ragao, Ragao kon Phalet, Phalet kon Hêbe, Hêbe kon Sala, 36 Sala kon Canam, Canam kon Abasac, Abasac Sem, Sem kon Noê, Noê kon Lêmec, 37 Lamec kon Mêtu-sela. Mêtu-sela kon Hênoc, Hênoc kon Jaret, Jaret kon Mêle-le-en, Mêle-le-en kon Cainam, 38 Cainam kon Enot, Enot kon Sêt, Sêt kon Adam, Adam kon Boc plình.