4
Kan padô aluàn
1 Chuaq Jesus bình Yiang Hadròeh, hlài enh cròng diac Jođan, Yiang Hadròeh aràng haq mùt tagùng hawit. 2 Ta aih kiac padô aluàn haq pôn jàt hì, Ta ƀài hì aih haq ùh lòm acaq qmòe cleq, dìq dèh ka jò haq loh qmòe ka hrah. 3 Kan kiac doe ka haq: Tàng joq ìh kon Boc Plình, thê hmo kô wìa ƀênh beq. 4 Chuaq Jesus padreo bàu: “Khoe i bàu achìh, kon mangai rìh ma xài canòm toq ka ƀênh.” 5 Kiac atŏc haq tanòe haqnhèq, qmoeq rahyàc raq haq khoe patô ka Chuaq Jesus dìq dŏng ka ƀài diac ta crŏng taneh; 6 haq doe ka Chuaq Jesus: dìq dŏng ka cwìang xam ka ranhòm taqmat, khoe am dŏng ka au, au enh am ka cabô leq am. 7 Tàng ìh kùh waiq au, aih hi jah ìh. 8 Chuaq Jesus pareo bàu: “I bàu achìh rameh: ìh ep kùh waiq Boc plình ìh rai patìh toq ka haq raq” 9 Kiac aràng haq trùh ta Jêrusalem rai dèch atŏc haq oe tanòe dìq jaq haqnhèq ta bui hnim kùh waiq, haq doe: Tàng joq ìh kon Boc plình, hadrùc beq, 10 majah qmang aih khoe i bàu achìh:
Haq thê dèh ƀình plình wèq ìh,
11 Wì aih dèch ìh tŏc taxŏng wì haq,
aih èh dôq jènh ìh ùh hìaq catoeh ka hmo.
12 Chuaq Jesus padreo bàu: “I bàu khoe achìh: Ùh khòh qnhro Chuaq aih Boc Plình ìh”. 13 Kan kiac dìq ka trong đòeq hu padô Chuaq Jesus, haq hi wia đò hòeq.
Hlài ta Naxaret
14 Chuaq Jesus jah bình cwìang atai enh Yiang Hadròeh, haq wìh hlài ta Galili, jàp gùng dudan aih khoe hìa tàng yiniq haq. 15 Haq hnài tanòe hnim tagop qyoh, mangai mannè đeh hra. 16 Haq trùh ta Naxaret, nòe haq yòng kàn. Tìah dèh Haq hmaq broq, trùh hì Sabat haq mùt hnim tagop qyoh, èh hi yòng đŏc. 17 Wì am ka haq hset pajàu Êsai, haq pèh jang nòe khoe achìh:
18 Yiang Boc Plình oe ti au;
Majah qmang aih haq khoe xùt dàu ka au, đòeq hu anoe Bàu lem ka mangai pa;
19 Haq khoe thê au trùh paclaih mangai oe ta hnim tù jah loh enh gùng,
Mangai ùh xau jah hnoq,
Mangai wì tacaq ka haq jah claih;
Rai bahìa hanam catèm da Chuaq.
20 Khoe aih haq don hlài hset padreo am da ka mangai patìh ta aih khoe èh haq hi hangui. Rìm ngai ta hnim tagop qyoh aih dìq haqmiang ngan haq. 21 Haq doe ka wì: Bàu hset hadròeh pì ma tamàng aih, hì kô khoe xìt.
22 Dìq ka mangai ta aih maleq ma meh dìq anoe trùh haq, wì hamàih ka bàu rabiaq loh enh haq, wì doe: Haq qmat ajoq kon Jôsep? 23 Haq doe ka wì: “Canau pì yŏc bàu cachôi qmang kô hu anoe ka au: Mangai broq jreo, haqnauq dèh cla òeq, aleq ƀài yiniq ìh broq ta Cabênaum nhèn ma khoe tàng, broq nòe gùng cla kô beq.” 24 Haq doe ka wì: “Joq au doe ka pì, qnhòq lah i mangai pajàu leq jah gùng cla manè. 25 Au anoe qnàng ka pì, qnhòng Êli, jò trŏc pađang piq hanam qne, dìq dŏng ka gùng loh ka pangot hrah, tanòe mangai Isorali i bàc mangai hadrô; 26 yac ka qmang aih, aleq i thê Êli trùh hnim cabô taqne ƀài aih, mahaq thê haq lam ta hnim mangai cadrì hadrô oe ta Sarepta gùng Siđôn. 27 Qnhòng da pajàu Êlisê mangai Isorali loh ka bacùn ma i palap cleq, mahaq ma i mangai leq jah brêh, enh gùng ka Na-aman, mangai Siri.
28 Maleq ma meh oe ta hnim tagop qyoh tàng bàu aih, wì nòeh pi ka jaq cleq. 29 Wì padinh yòng, hua qnoh haq loh enh gùng ka plài, qnung haq tŏc ta bui wang nòe wì broq plài đòeq hu caqnhùt qnìh đac haq. 30 Yàng haq pagat ti ngèa wì èh hi lam taqnoeq.
Broq brêh ka mangai kiac mùt ta chac
31 Haq loh ta Cabênaum, oe ta gùng Gallili, hnài ta hì Sabat. 32 Rìm ngai tamèt ta manoh jò tàng bàu haq hnài, majah qmang aih bàu haq i ang. 33 Tanòe hnim kùh waiq i moeq ngai ta dalam chac haq i kiac mùt, breo cadêh: Jesus mangai Naxaret, 34 Ìh enh broq ka nhèn cleq kô ìq? Ìh trùh hu raliang cađac nhèn qmòh? Ìh qmat cabô, au loq: Mangai Hadròeh da Boc plình! 35 Mahaq Chuaq Jesus capoch nhang ka haq aih: “Oe ma hatinh haq! Drah loh enh mangai qmat”. Hloe jò aih, taqne mangai bàc kiac rapòt mangai aih ta haqneq, èh hi loh, ùh hìaq broq ka haq aih loh habau. 36 Mangai leq mangai meh haglènh đeh hra, wì ta anoe ka dabau: Ƀài bàu kô qmang leq ìq! Haq yŏc cwìang yŏc kan dêh enh leq ma drùh qnoh kiac, kiac ma loh hloe qmang meh. 37 Dìq dŏng gùng dudan ta aih wì loq đeh hra ka Haq.
Miq mai Phiero
38 Chuaq Jesus loh enh hnim tagop qyoh, haq lam ta hnim Simôn. Miq mai Simôn qnang tôq tanget hlàc raya. Wì canòm ka Chuaq Jesus broq brêh ka haq. 39 Chuaq Jesus cachình chac ta mangai aih, haq tapoch ka kan tanget, kan tanget hi dìq. Mangai aih hi padinh yòng patìh.
40 Jò mat mahì clìh, mangai yinìq qmang leq, mangai ùh hrŏc qmang leq wì aràng trùh dìq ta haq, haq yŏc tì bèq tang ngai hu broq brêh ka wì. 41 Bàc kiac cadàu loh enh bàc ngai rai cajiah: Ìh qmat kon Boc Plình. Mahaq Chuaq Jesus lech ùh am wì haq tapoch, majah qmang aih kiac loq ka haq aih raq Christ.
42 Buqngah, Chuaq Jesus loh lam tanoè hawit. Bàc mangai lam ti chaq haq. Jò hnoq haq, wì padràng haq oe, wì ùh enh dôq haq lam taqnoeq. 43 Mahaq haq doe ka wì: “Au ep lam anoe Bàu lem da Boc Plình ka wì ta qnoeq hòm, aih raq majah khoe thê au trùh.” 44 Haq ti hnài roc hnim tagop qyoh da mangai Juda.