5
Jesus creo ka magai tiaq hŏc ma adroe
1 I mòeq hì, jò Chuaq Jesus yòng ti haqmai hlŏng Gêne-saret, ƀài mangai bàc raya oe dudan dahnen dabau hu tamàng bàu Boc Plình. 2 Haq hnoq i baiq toq boang oe ti haqmai diac, cla mangai ranang khoe loh qnheo hlàm ta diac. 3 Baiq toq boang aih haq hi tŏc ta moeq toq, aih boang da Simôn, thê haq qnoh tadrùq toq biaq, èh haq hangui ta boang đòeq hu hnài wì.
4 Jò khoe hêq ka hnài haq thê Simôn: “Chùng boang qnoh tanòe diac jrùq tau đòeq caqnìh hlàm hu rùp ka.” 5 Simôn padreo bàu: Mangai hnài, nhèn broq khoe lep qngah moeq mang ìq, ùh lòm jah qmòe cleq. Mahaq ìh khoe doe qmang aih, òq nhèn tang hlàm. 6 Wì caqnìh hlàm ta diac jah ka pi cajaq, hlàm wì haq ten tapot, 7 aih wì haq hi gwàih tì dèh ka bua oe ta boang qnoeq trùh, đòeq wiang ti wì haq, ka bình baiq toq boang, boang loh qmòe ka enh cram. 8 Jò Simôn hnoq qmang aih, haq hacùn cràng enh ngèa ka Chuaq Jesus: Chuaq au! Ìh wia hangai ka au beq, au kô mangai bình toq yiniq lui. 9 Majah qmang aih haq xam ƀài dèh bua oe ti haq, hnoq jah hrìn ka, maleq mameh loh ka crè dŏng. 10 Chuaq Jesus doe ka Simôn: “Apaq yùq cleq, pang kô ta èh, ìh jah wìa mangai tang hlàm mangai”. 11 Khoe ka atŏc boang tago, wì hi cađac dìq dŏng đòeq hu tiaq haq.
Jesus broq brêh ka mangai bacùn
12 Jò Chuaq Jesus qnang oe tanòe plài tau, i moeq ngai bacùn dìq tachac, trùh bla op dèh hadrò taqneq rai dang: Waiq Chuaq, tàng ìh ma waq broq, ìh broq au brêh. 13 Chuaq Jesus hnhu tì bèq haq aih, rai doe: “Au enh, brêh beq!” Tajòe hloe jò aih kan bacùn hi brêh. 14 Chuaq Jesus tanap ka haq: “Paq anoe ka cabô loq, mahaq ìh khoe brêh qmat drah lam patô rađeh ka ƀài pajàu, rai dèch ramènh tiaq bàu Môise khoe thê, đòeq patô ka wì hnoq.”
15 Yiniq Chuaq Jesus chàc rai èh rai hangai, bàc mangai trùh hu tamàng, rai đòeq haq broq ka wì jah brêh ka yinìq. 16 Mahaq Chuaq Jesus xan lam tanòe hawit đòeq hu waiq khàn.
Broq brêh ka mangai pen
17 I mòeq hì, Chuaq Jesus qnang hnài, i ƀiaq ngai Pharisi xam ƀài mangai hnài ranenh trùh hangui ta aih, wì haq loh enh ƀài plài tagùng Galili, gùng Juđê xam Jêrusalem. Cwìang itai Boc Plình oe ti Chuaq Jesus broq brêh ka mangai yinìq. 18 Jò aih, i wì tòng aràng moeq ngai pen kùi ta dradrah, chaq trong đòeq qmùt haq enh ngèa Chuaq Jesus. 19 Mahaq taiq mangai bàc hrình, pì qnì qmùt qmòe trong leq, dài wì majah àu atŏc haq aih ta crŏng hnim, doeh kùa po, qnhùa qnoh haq aih oe ta dradrah taqne wì mangai bàc ta aih, tajang hloe ka ngèa Chuaq Jesus. 20 Chuaq Jesus hnoq manoh lùi wì aih, haq doe ka mangai pen: “Yôiq kon, yiniq lui kon khoe jah caqnaih.” 21 Ƀài mangai hnài ranenh xam mangai Pharisi hèm dèh ta manoh: Cleq meh ìq cabô, mangai tapoch ùh hòq, enh gùng ka Boc Plình oe i cabô majah baclaih yiniq lui? 22 Chuaq Jesus loq ka manoh wì hèm cleq, haq bòch “Hagleq pì majah hèm qmang aih ta manoh? 23 Manòeq kô doe: Yiniq lui ìh khoe jah caqnaih, tàng ùh meh doe yòng lam beq, aih maleq ma yi hlàu ka capoch? 24 Mahaq au dôq pì loq Kon Mangai oe ta crŏng taneh i cwìang caqnaih yiniq lui.” Haq doe ka mangai pen “Au thê ìh, yòng, dèch dra drah qmat hlài ta hnim beq.” 25 Mangai pen padinh yòng enh ngèa ka wì hloe jò aih raq, binh dèh dradrah haq ma kùi hlài ta hnim, rai manè apôi Boc Plình. 26 Rìm ngai tadèch qmòe nòeh rai manè Boc Plình rai crè tarìt wì doe: Hì kô joq bèn khoe hnoq trong joq dìq jaq halac!
Jesus creo ka Lewi,
Acaq moeq qmang ti mangai i yiniq lui
27 Atìq ka aih, Chuaq Jesus loh enh gùng, hnoq moeq ngai, broq mangai yŏc thèq, yiniq haq Lêwi, qnang haqngui tanòe hnim yŏc thèq. Haq creo ka mangai aih: “Lam tiaq au.” 28 Lêwi cađac dìq dŏng, padinh yòng tiaq Chuaq Jesus.
29 Lêwi broq yiniang kàn ta hnim rađeh padon ka Chuaq Jesus, i bàc ngai yŏc thèq xam ƀài mangai qnoeq haqngui acaq pajùm. 30 Ƀài mangai Pharisi xam mangai hnài ranenh mamùc ka mangai tiaq hŏc Chuaq Jesus: Hagleq pì ma acaq pajùm ti mangai yŏc thèq xam mangai i yiniq lui? 31 Chuaq Jesus doe ka wì: “Mangai tadêh ma i nhet ka chaq mangai broq jreo, mangai ùh hrŏc ma nhet.” 32 Au ùh xài trùh đòeq creo ka mangai taq atoq, mahaq creo ka mangai i yiniq lui.
33 Wì anoe ka haq: Mangai tiaq hŏc da Jon xan apàm ka acaq đòeq waiq khàn, èh mangai tiaq hŏc da mangai Pharisi hadai, ùh xài qmang ka mangai tiaq hŏc da ìh toq acaq toq ôq. 34 Haq padreo bàu: “Jò cla kon ŏng oe raq dèh ti bua, trùh lem bùi hì yiniang haq, wìa ka pì ma thê wì apàm ka acaq? 35 Mahaq trùh hì wì ma qnung kon ŏng lam hangai ka wì, ƀài hì aih èh wì men apàm ka acaq.”
36 Haq alìah ka wì qmang kô: “Ùh i cabô hit mòeq calep eo neo đòeq clep ka eo dùnh. Tàng broq qmang aih, eo neo loh ka hyah, èh haqnech maneo hadai ùh tajì ka eo dùnh. 37 Hadai ùh i cabô ùc alac neo ta ƀau akia dùnh, broq qmang aih, alac neo broq ka ƀau akia dùnh hađah, alac taùc, ƀau akia hadai pi wìa waq. 38 Alac neo ep ùc ta ƀau akia neo. 39 Hanoh ùh i mangai leq khoe ôq alac dùnh èh bòch alac neo, majah qmang aih haq doe: alac dùnh yeo jìang”.