1 Jò ta tapèh ƀình plình ma wê doe chrŏng, aih i mòeq ƀình plình thia haten doe ka au: “Lam ajang kô, au hu patô am ka ìh hnoq kan hadrah ka mangai gucadrì tango kàn, haq ma haqngui enh qnhèq ka ƀài cròng diac kàn tau. 2 Ƀài bùa oe ta crŏng taneh tango ka haq, mangai ma oe ta crŏng taneh hadai bùbia ka alac tango haq.”

3 Khoe aih, ƀình plình hi aràng au lam enh dalam ka Yiang Hadròeh haq qnung trùh tanoè hawit; au hnoqmangai gucadrì haqngui enh crŏng moèq toq ngè rìh gòh tabrùng, ta chac haq achìh toq yiniq ƀài bàu capoch ùh hòq ka Boc Plình, i tapèh toq gàu xam mòeq jàt toq haki. 4 Mangai gucadrì aih caxùnh eo gòh ngùi. Anì toq ƀài wang, hmo canaq, ngŏc, ajang tì haq wê moeq toq doe chrŏng wang bình toq kan trùq, kan tango amùa. 5 Ajang ngòng achìh mòeq toq yiniq rameh:

aih miq ƀài mangai tango

xam ƀài kan amùa trùq ta crŏng taneh.

6 Au hnoq mangai gucadrì aih bùbia ka mahim ƀài mangai hadròeh xam mahim mangai cachìt ka Chuaq Jesus Christ; au hnoq loh ka hamàih.

7 Ƀình plình bòch au: “Gleq ìh majah hamàih? Kô au hu anoe ka ìh loq kan hlèp da mangai gucadrì xam ngè rìh ma chò haq, aih ngè rìh ma i tapèh toq gàu xam mòeq jàt toq haki. 8 Ngè rìh ìh ma khoe hnoq, adroe aih khoe i, yàng manòeq kô khoe pi i; kô èh haq jah tŏc enh hwinh jrùq khoe aih lam trùh ta kan lùng pac; ƀài mangai oe ta taneh aih ƀài mangai ma ùh i achìh yiniq ta hset kan rìh enh jò broq plình crŏng taneh, hnoq ngè rìh aih wì hamàih, majah qmang aih, nèh haq khoe i, manòeq kô pi i, yàng èh atìq aih ka doe haq jah trùh hòm. 9 Ajang kô ep i manoh rabiaq ka hèm: Tapèh toq gàu aih tapèh toq bui wang gucadrì aih ma haqngui enh qnhèq. 10 Aih hadai tapèh toq bùa; padam ngai adroe khoe taclìh, mòeq ngai aih qnang i manòeq, mòeq ngai hòm qnhòq trùh; jò haq aih hi jah trùh, haq hadai ùh oe dùnh pang leq. 11 Ngè rìh ma khoe i adroe yàng manòeq pi i, aih raq bùa ma rahem; haq aih hadai mòeq bua ka tapèh bùa tau, haq hadai lam trùh ta kan lùng pac. 12 Mòeq jàt toq haki aih mòeq jàt toq bùa qnhòq jah waq deh diac; mahaq wì haq wiang broq bùa pajùm ti ngè rìh dù tau ta mòeq jò raq. 13 Wì haq pajùm moeq manoh đòeq jao dŏng deh cwìang am ka ngè rìh dù xòc. 14 Wì tajêh ka Kon Trìu, Kon Trìu blêq wì haq, majah qmang aih haq aih Chuaq da ƀài chuaq, Bùa da ƀài bùa; ƀài mangai ma khoe jah crêu, mangai khoe jah ràih xam ƀài mangai ma ùh tablòq manoh dìq jah oe pajùm ti Kon Trìu, hadai jah wiang blêq.

15 Khoe aih, ƀình plình doe hòm ka au: “Ƀài cròng diac ìh ma khoe hnoq i mangai gucadrì tango haqngui enh qnhèq, aih ƀài nang noe, ƀài mangai bàc, ƀài diac xam ƀài bàu capoch. 16 Cla ngè rìh xam mòeq jàt toq haki ìh ma khoe hnoq atìq èh wì hi git ka gucadrì tango, wì haq wìh hlài raliang đac rai broq ka haq loh ka talùch, nhah jam haq rai bùh haq ta ùnh. 17 Majah qmang aih Boc Plình khoe dôq wì aih broq tiaq manoh Haq ma enh, jò Haq broq ka wì aih mòeq manoh ti dabau đòeq jao dŏng deh cwìang am ka ngè rìh tau, trùh jò bàu da Boc Plình jah xìt. 18 Mangai gucadrì ìh ma khoe hnoq, aih raq plài kàn wèq cwìang enh qnhèq ka ƀài bùa ta crŏng taneh.