18
Raliang đac Babilôn kàn
1 Atìq ka ƀài yiniq aih, au hnoq mòeq ƀình plình loh enh plình, haq i cwìang kàn, kan ranhòm haq srêu qngah qngiang ta crŏng taneh. 2 Haq creo ka dêh “Babilôn kàn khoe ralàih, khoe ralàih! Plài kàn aih khoe wìa nòe oe da kan kiac, nòe trom nòe kòp da jròng, kòp da ƀài adrech chìm qmèq qmac kon mangai ma cadròt ka hnoq, 3 majah qmang aih rìm diac khoe bù ka alac tango anang da haq, ƀài bùa ta crŏng taneh khoe tango ti haq, ƀài mangai padro ta crŏng taneh khoe jah padrŏng kan enh kan loq racaih da haq.
4 Au tàng i bàu qnoeq enh trŏc doe rameh:
“Dìq ka mangai da Au, drah loh ma khoe ka Babilon,
Tabeq rayeq èh pì loq wiang poh yiniq lui ti haq,
loq ep wiang pòq kan ranàc ti haq.
5 majah qmang aih yiniq lui da haq qmat haqnhèq khoe trùh ta plình,
Boc Plình khoe hmàng trùh kan dù da haq.
6 Pì broq hlài ka haq ƀài yiniq haq ma khoe broq ka mangai qnoeq,
patem chau ka haq loe baiq yàng,
clai ka haq loe baiq chrŏng haq ma khoe clai ka mangai qnoeq.
7 Haq catèh rai hnhè rađeh ta kan padrŏng cla haq dàng leq,
aih broq ka haq jìq xa chau dàng aih.
Majah qmang aih tacliac haq doe
“Au kô bùa cadrì haqngui dèh tagèq,
ùh xài mangai hadrô, ùh jò leq au hnoq kan crò hmoe”.
8 Aih ìq dài majah ta mòeq hì raq,
ƀài kan ranàc kô majah caqnìh enh qnhèq ka haq,
kan cachìt, kan crò hmoe, kan pangot hrah,
xam ùnh bùh chac haq;
majah qmang aih Boc Plình ma hadrah haq, aih Boc Plình I padren dêh haraya”.
9 Ƀài bùa ta crŏng taneh ma khoe tango khoe wiang jah waq kan padrŏng ti haq hnoq nhòe ùnh cheo haq aih èh wì toq crò hmoe. 10 Yùq loq ep wiang pòq kan xalep ti haq, wì toq yòng haqmiang enh hangai rai doe:
“Haƀo qnàng, haƀo qnàng, Babilôn aih plài kàn,
plài padrŏng tau! Bu mòeq jò raq, kan hadrah gè khoe trùh”.
11 Ƀài mangai padro ta crŏng taneh hadai mangò crò hmoe ka haq, majah qmang aih pi oe i cabô rot dahwèq rađeh hòm. 12 Dahwèq aih ƀài: wang, bac, hmu lem, ngŏc, bai habuàt, bai gòh, bai lùaq, bai drinh; ƀài long xua thùm; ƀài dahwèq broq xi bla roeh, long canaq, đùng, mem, hmo. 13 Cwèq, tìau, dàu, janh xua thùm, gahnàu, alac, dàu oliu, ƀài dàc lem, hmau phi, ƀo, trìu, axêh xam xê axêh, hapŏng dìc, hloe xam mahua yiang kon mangai. 14 Wì doe
“Ƀài plì manoh ìh ma toq tangèh chaq hnhung khoe dìq,
kan qngah padrŏng rahù ìh khoe lùch, chaq ma oe hnoq”.
15 Ƀaì mangai padro aih canòm ka Babilôn khoe loh ka padrŏng kan, dìq yòng enh hangai, wì yùq rađeh loq ep wiang xalep ti haq; wi crò hmoe rai mangò ka haq, wì doe: 16 “Haƀo hrình, haƀo hrình, ka plài kàn tau,
khoe hmaq atàc toq bai habuàt gòh ngùi, gòh drinh,
anì qngah qngiang toq wang, toq ngoc, toq hmu canaq!
Ta mòeq rahyàc raq, kan padrŏng rahù ranhòm aih hnhung dŏng khoe dìq!”
17 Mangai wèq boang, mangai lam trong diac, xam mangai oe ta boang, ƀài mangai padro ta diac raxìq, dìq yòng enh hangai, 18 jò wì hnoq nhòe ùnh cheo haq, wì cachech: “I plài leq kàn dàng plài kô!” 19 Wì haq yŏc blo raid deh tagàu, crò hmoe adênh ka haq, wì doe: “Haƀo hrình, haƀo hrình qnàng! Haq kô khoe yŏc kan padrŏng rađeh đòeq broq ka rìm mangai i boang ta diac raxìq jah padrŏng kan đeh diq, ta mòeq rahyàc raq khoe wìa nòe hawit.
20 “Diac Plình, Ìh drah bùi lem ka haq beq
Pì mangai hadròeh, lem bùi beq
Mangai pajàu, ƀài mangai tiaq cla, bùi beq
Majah qmang aih jò Boc Plình hadrah gucadrì aih.
Haq khoe broq kan taq atoq am ka pì”.
21 Khoe ka aih, mòeq ƀình plình dêh padren yŏc mòeq toq hmo qmang ka apau kàn khwênh caqnìh ta diac raxìq, haq doe
“Plài kàn Babilôn tau èh,
hadai ep khwênh caqnìh cadêh qmang kô èh diq,
aih èh pi cabô oe hnoq haq hòm. 22 Pi i cabô oe tàng bàu rawêh broc, bàu hlui ken bàu hlui taliaq enh nòe haq hòm.
Ta ìh kô yac ka padro cleq dua pi ka mangai patìh kaq kùng,
bàu apêh qmau dua pi tàng.
23 Qngah đen pi sreo ta ìh hòm,
wì pi oe tàng bàu ŏng mai neo taqnèp,
majah qmang aih ƀài mangai padro ti ìh aih dìq ƀài gucraq ta crŏng
taneh,
Canàìh ìh khoe pawè dŏng mangai rìm diac.
24 Tacô wì chaq hnoq mahim ƀài mangai pajàu, mangai hadròeh
xam dìq dŏng mangai ta crŏng taneh, ìh khoe jêh đac ka cachìt”.