Philemon iñiñ güdraw Polus üsam
Ĝiw
He kako í ĝiw braw ye Polusme. He kako ha a Polus i Filemon í i Unesimus i ichi ge kitchojomeñe che sünda Kulu 4:9 ge Unesimus i Tukikus üddra Kulusse ge jimkoi sese Tulukus i Filemon i Polus ichi kako i djü. He ye ŝüvzüw ñume Polus i he kako i nudzo ügzü yo ĝidaw ichi gõ vyow na shetsüjoñe.
Ĝiw übraw ichi dzaga
Oje 60 kuw.
Filemon í he kako ĝingkoi ñeto ge Polus i Rom go pache ge shü veda.
Lajovo
Paulus i he kako ye Filemon í ĝida, Arkippus í girja ñe ge sünda ñi ñum Apphia í. Kako ĝidaw í holyeñe vemeje he kako ye Filemon í ĝibadabi.
Ha ma a vew
He kako í ĝiw ge Polus i Unesimus í i übraw ye ichi ge lakutchoweñe ve ĝidame (Unesimus ye Filemon ichi kulo tsaksulalye kaksudaw ye) sünda í sojai djudjüwe. (10-12, 17). Sünda sesüyo, Polus i Filemon í kulo veduw mowdaye “nudzo uñuw” veduw veweñe veda. (15-16). Unesimus i yaje Filemon ichi bo-luko ubo go lubi seyo Polus i ubo ĝabo davoĝoñ ve hado chemeje Filemon í lajovowene veñe. Polus i shi-ñu truw ubo sa Unesimus i Tawgyew í ĝaksüla. (File. 10).
Ñustu gow
Kahuahuw.
Udrüla
1. Abiwadan ___ 1:1-3
2. Abarokti ___ 1:4-7
Unesimus ubo ñu chegüdraĝiw ki ___ 1:8-22
Damdzualai shi-ñu ___ 1:23-25
1
Daŝüvzüw
1 Polus ichi go bó, se Jisu Masi ichi pache ge shüdáw nüna, seyo ñuw Timotiyus ichi ve go ñichi nülvo chiĝadam Filemon, 2 Seyo ñum Afiya seyo ñidra yo shipashi Arkipusñe Filemon ichi ñe go ñeŝü na ñiñi. 3 Ñichi Tawgyew awuñe Tawgyew Jisu Masi naksü naksüchi vye go ĝüdzüw ye bá pangudruwe.
Ŝüvzütroi ñe Küĝüw
4 No shüwa Tawgyew í ŝüvzütrojome; seyo nudzo küĝülai ge je bá vyehuwme. 5 Hado cheme no bachi sé nülvo seyo vyemso chi shi-ñu na dzühulye, se Tawgyew Jisu dru ge seyo vyew güdraw nüna nadra. 6 No küĝüjome se vyemsodaw ge bachi üdra ayo na hadamje uw ñu ge danghusajo dawe ha ye Jisu Masi ichi yo ñidra dusama. 7 Hado cheme noñuwwa, nó bachi nülvo yo ŝüpyo lüshüw seyo ĝüdzüw padame, sündada, ba yo dañe güdraw nüna nadrü-nalu hu je adjüdjüw no je aĝimiw pajome, uñuw nawa.
Unesimus ibó küĝüw
8 Sündada sedamje noje Jisu ge ŝüpyo bolu duda, se ha ñu ye udama, se í bá dügyejo. 9 Sedamje no vyeduw mukro Polus i se yabó Jisu Masi ibó pache ge ĝyow nüna babi, se ayoje ŝüpyo nülvo yo ibó küĝüjolu. 10 No nosaw Tawgyew go Unesumus ibó no yo nochi sülyeñtchü ge sakülye dame no yo küĝüime. 11 Se ibó ahuge ha madaĝiw a ba, se yabó ba ñe seyo nochi dew chiĝa tsüwbaba. 12 Se í ñe seyo dju nolu ge kadama, no se í bachi ge djütülütchowba. 13 Í no nochi ge vyejoñe vyehomacha se í bó bachi vye go shüdabi shi-ñu ibó yo sülyeñtchü sumbo, nó datunowe. 14 Sé no ba mahusüw haje madaĝoñ se bachi he nülvo djüdo ye datüdalüw yo mow lüshüw dawe. 15 Hado chemeje ha danghuñda i ba yo ksühua dzühua kuw he ibó utro lyadawa shüwa bañisa ge ĝyojoñe. 16 Seŝo ayogo kulo mavyeduw, kulo yo je dewfo, seyo ñuw vyeduw ĝyowe se nochi drü-lü ge duw süna nülvobó seŝo, se yabó usofu ge je seyo ĝulo ge je, bachi je drü-lu ge sünda Tawgyew ge.
Filemon ichi dügyew dzüw lüshüljow
17 Senameje ba nó bachi nudzoĝ dakyetunowñe vyedameje, se na vyeduw yo shutrolajodawe. 18 Chemeje se nó bachi ha damje damdalyoama semome sa a bachi ha damje a kakuw, se í nochi üñiñi ge ĝiwe. 19 Polus no nó gzü yo ĝijome, se i no bá ĝigujome; seyo ichi chejoje ha madaĝi, se no añawa he daado na badru me se i babamme. 20 He no ñuwwa, he lüshüw nó bachi Tawgyewwa nó bachi go pawe, Tawgyew ge nodrü nolu ye hu je adjüdjüw no je aĝimiw daiwe. 21 No bachi dügyew dafiw dajo umsow vyyeñe, bá ĝimkoime seyo he ana danghuwme, se no ha cheima, ba se í foje lübzüw daijo. 22 Seyo he i je, nobó ĝyojo buĝo dashütrüvowe; no süna umsow vyedame, se bá küĝüw trüdu yo noje no bachi ügzü ge djüjome.
Mülüñ ŝüvzüw
23 Ifras se Jisu ge nodra pacheshüw ge 24 Seyo se Markus ñe Aristikurs seyo Demas seyo Luka seyo no chiĝadam. 25 Ñichi Prabu Jisu Masi nülvow ye bachi ĝulodra duwe. Amin.