3
Onene agalinilanaga ogo
1 Agali oneru tígua tí agalinime bia laradagua hale halu bilimu. Ani birimiyagua tí agalini Ngode Datagaliwabe bi mana yu tiga nabi karume wali tígua mana bayale dege beramigo hondowa mini beregedolene manda bulebira. Ani bilo wali tígua bi lolene nawulebirago✡Md 18.15, 1 Ko 7.14-16, Eb 5.22, Kl 3.18, Ta 2.5 2 irane tígua tí agaliniore ka manda buwa mana tigabiore bialu bedamigo tí agalinime de hondolebira. 3 Wali tí bayaleore holenaga tínaga tinginini yári uru ale nabilimu. Mandari mo yári bia holenebi mbirale muni timbunime miaga gurubu gele gi pagidaru wulenebi dongoneni aga bidamirumebi tínaga tingini mo bayale hole lalu nabilimu.✡1 Ti 2.9, Ta 2.3 4 Ani nabi tínaga bayale holene teneore tí mini tigabiore wu birulenebi hogorale bialu biraabo holenebi mana uruni de hondowa Ngode Datagaliwabe ibugua, Baya gibioreda, lolebira.✡Iba 45.13, 2 Ko 4.16 5 Ogonidagua wali maru bamba berenerume Ngode Datagaliwabe mana yu tiga buwa ibuhondo mini dunubia ho berene. Uruni tigua ti agalinime bia layadagua biyagome tini mo bayale ho berene.✡Pig 18.12 6 Wali Sara ibu ogonibi bialu berene. Ibugua ibu agalini Abarahamahanda bia layadagua bialu, I̱naga haguane ogoni ka, laga berene. Tí bedamirume gi nahe biruwa mana bayale dege birimiyagua tí Saranaga wane biruleberami.
7 Ogonidagua dege agalini kamiru tí one ibu tí hongohe kamigobi ndo bedagoni manda bilimu. Ani bialu tí one mo yo handa nabi bayale mitangi bialu halimu. Tí one baba howa Ngode Datagaliwabehanda haabobo holene bame ngirago libu ogobi labolabo yule manda buwa ogonidagua bigi bialu halimu. Tígua Ngode Datagaliwabehondo bi laramigo mbirale mbirame ha pai nahelonaga ani bialu halimu.✡1 Ko 7.3, 12.23, Eb 5.25, Kl 3.19, 1 Te 4.4
Mini mbiraore ho holenenaga ogo
8 Bi lamaro bialu ogo laro. Keriso hameiginiru tí bibahendeme minibi mitangibi mbiraore howa tíni hamene mbalini kama lalu gubalini ho hagahaga bialu tíni mo dindi halu miniha dara howa biamogo bigibigi bialu halimu.✡Md 5.44, Lm 12.10, Pb 3.16, Kl 3.12, 1 Te 5.15, 1 Pi 2.17, 2.23 9 Marume tíhondo ko biragola tígua nde ko bia dai nabi halu ha haragolabi ha hadai nabi halimu. Ogonibi biragola tígua turu holene bi ladai bilimu. Irane Ngode Datagaliwabehanda tí olayangi tí mo turu holene mbira nguleberoore lalu lowini.✡Md 25.34, Lm 12.14, 1 Te 5.15 10 Anduane Homogonaga mbugani lo ngagome agua leda,✡Iba 34.12-16
Mbirali ibu turu ho hangu hole hame lalu
mbirale turubi hangu handama pole hame layaguabi
ibugua bi kobi nale ke̱bi naheore holene nga.✡Ya 1.26, 1 Pi 2.1, 2.22
11 Ko bulene ngaru erembira mialu mana bayaleore bulene nga.
Ibunaga gubalinime mo palia holene henge tai bima puabo halu holeneore nga.✡Ais 1.16-17, Lm 12.18, Hi 12.14
12 Irane Anduane Homogo ibugua wali agali mini tigabiwi karu handaya ho halu✡Yo 9.31
tigua ibuhondo bi lamirago ibugua hale haga kagoni.
Anigoyu ibugua ko biaga karu hondowa turu nahaga kagoni,
lalu gilibu nga.
Mana tigabi bialu howa tandaga narimayagua turu holene ngago ogo
13 Tígua mana bayale bua ho kamiyagua aiwa tíhondo ko bulebirabe.✡Min 16.7, Lm 8.28 14 Anigo tígua mana bayale bialu kamiria mo tandaga hayagua nde tí turu holene nga. Wali agali hondowa gi halu mini dege dindi nahalimu.✡Ais 8.12-14, Yar 1.8, Md 5.10, Ya 1.12, 1 Pi 2.20, 4.14 15 Ani nabi tígua miniha Keriso mo yaraga howa, I̱naga Anduane Homogoore ka, lalu halimu. Mbiralime tí mini dunubia ho kamigo hondowa, I̱ nde manda buliya langi, laragola tígua aguaore lamule lowa tíni ala manda manda bu halimu.✡Ab 4.8, Kl 4.6, 2 Ti 2.25 16 Bi lamialu howa hendore bayuwa lamilimu. Tínaga miniha tigabi hole ko birimigo do nahalimu. Ani do nahe harimiyagua tí Kerisonaga talima piaga howa mana bayale beremigo hondowa marume mege bialu mana ogoni bayale ndo koda lararu mani tini taga pani nolebira.✡Ta 2.8, Hi 13.18, 1 Pi 2.12 17 Tígua mana bayale bialu kamiria marume tí mo tandaga helo Ngode Datagaliwabehanda hamelo kayagua ogoni karulapeore nga. Ko bialu kamiria marume tí mo tandaga hayagua ogoni nakarulape.✡1 Pi 2.20
Yasuhanda inanaga ko mo yai halu homo aribia henego ogo
18 Wali agali bibahendeme ko birimagonaga homolene winigo Keriso ibuni homo aribia hene. Ina mini kowi hemago Ngode Datagaliwabe kagoria haru polenaga ibu agali mini tigabiorewi howa ibugua ina bibahendenaga halu mbira hangu homo aribia hene. Tigua ibu bayagola tingini homenego ibunaga dinini nahome hene.✡Lm 5.6, 6.10, 8.11, 2 Ko 13.4, Eb 2.18, Kl 1.21-22 19 Ibuni dinini howa dinini dege maru humbirini andaha dariba ho wiaru mana lamule pene.✡Pig 6.1–7.24, 8.18, Hi 11.7, 2 Pi 2.5 20 Ala Noahanda iba talu wabialu heneyangi bi mana lamialu hene. Noa ibugua lamialu heagola wali agali mini beregedelo Ngode Datagaliwabe ibugua hondo haabo henego ti marume hale howa mo wahayago biaru homenego uruninaga dinini hearu lamule pene. Wali agali halirali iba talu biagoha berearu ti hangu nahome yo pene. 21 Ogoni binigo irane baboraya beremagonaga walia ho nga. Ngode Datagaliwabe ibugua ina ibaha baboraya beramagome pele ngiaga. Ina baboraya bialu howa ibame tinaga tingini wayawaya biragola pele ngiaga ndo. Pele ngirago tene tígua mini beregedalu Ngode Datagaliwabehondo, Ko birimago domabe, lowa mani tínaga miniha ko do nahole ledamigola howa pele ngiaga ka. Ani bialu Keriso homowa heyiyagome tí pele ngiya lalu walia haga beramili.✡Lm 10.10, Eb 5.26, Ta 3.5, Hi 10.22 22 Áyu Keriso ibu dahuliya andaga puwa Ngode Datagaliwabenaga gi tigahayagi biruwa ibugua dahuliyalirubi hari daligaha haru haganerubi hongo holenerubi haru howa handame hai ho ka.✡Iba 110.1, Md 22.44, Lm 8.34, 8.38, 1 Ko 15.24, Eb 1.20-21
✡3:1: Md 18.15, 1 Ko 7.14-16, Eb 5.22, Kl 3.18, Ta 2.5
✡3:7: 1 Ko 7.3, 12.23, Eb 5.25, Kl 3.19, 1 Te 4.4
✡3:8: Md 5.44, Lm 12.10, Pb 3.16, Kl 3.12, 1 Te 5.15, 1 Pi 2.17, 2.23
✡3:9: Md 25.34, Lm 12.14, 1 Te 5.15
✡3:10: Ya 1.26, 1 Pi 2.1, 2.22
✡3:11: Ais 1.16-17, Lm 12.18, Hi 12.14
✡3:14: Ais 8.12-14, Yar 1.8, Md 5.10, Ya 1.12, 1 Pi 2.20, 4.14
✡3:15: Ab 4.8, Kl 4.6, 2 Ti 2.25
✡3:16: Ta 2.8, Hi 13.18, 1 Pi 2.12
✡3:18: Lm 5.6, 6.10, 8.11, 2 Ko 13.4, Eb 2.18, Kl 1.21-22
✡3:19: Pig 6.1–7.24, 8.18, Hi 11.7, 2 Pi 2.5
✡3:21: Lm 10.10, Eb 5.26, Ta 3.5, Hi 10.22
✡3:22: Iba 110.1, Md 22.44, Lm 8.34, 8.38, 1 Ko 15.24, Eb 1.20-21