15
1 Ogonigo i̱naga hamene mbaliniru-o i̱na Bi Mana Debene tíhondo langirugo hale howa tígua yu tiga birimigobi mini mbiraore wuwa mini bilinahe kamigobi ogoninaga i̱na tí lone mo mitangi bua kogoni.✡Lm 5.2, Ga 1.11 2 Mana langirugoni hongo howa yu kamiyagua Ngode Datagaliwabehanda tí pele ngiragoni. Be ani ndo tí bame irane nahende howa yu tiga bu kamibe.✡Ga 3.4
3 Galone timbuniore i̱hondo langiyadagua i̱na tíhondo langirugo ogo. Anduane Homogonaga mbugani gilibu ngadagua Keriso ibugua iname ko birimagonaga homa hene.✡Iba 22.15, Ais 53.5-12, Dan 9.26, Seg 13.7, 1 Ko 11.2, 11.23, Ga 1.12 4 Anduane Homogonaga mbugani gilibu ngadagua dege ibunaga tingini hora hayagola horo teboneni Ngode Datagaliwabehanda ibu ho dai bilo mo heya hene.✡Iba 16.8-10, Md 12.40, Lg 24.26, 24.46, Ab 2.24-32, 13.33-35 5 Heyu howa ibu Pida de hendelo ala ha pani halu mani abosolo agali homberiali (12) biaru de hendelo ha pani hene.✡Md 28.16-17, Mg 16.14, Lg 24.34-36, Yo 20.19 6 Ani buwa ibu haruru ibaga biaga dewaore handari duria (500) agima ti mandagi hearia ibugua tibi de hendelo ha pani hene. Haruru ibaga biaga odaruni dewaore áyu kago mbira mbira dege homene. 7 Ani bialu ibu Yamese de hendelo ha pani howa abosolo maru bibahende hendelobi ha pani dege hene.✡Lg 24.50, Ab 1.3-4
8 Maniore i̱ Polo nakarulape ko waneigini hono wahene ale hewaria ibugua i̱ de hondoliyabi ha pani haya.✡Ab 9.3-6, 22.14, 22.18, 1 Ko 9.1 9 Abosolo agali bibahende karu helowa i̱ niraore kogoni nde i̱na Ngode Datagaliwabenaga wali agali heneru mo tandaga haga harugonaga i̱ abosolo agali ka labe nahe harugoni.✡Ab 8.3, 9.1, Ga 1.13, Eb 3.8, 1 Ti 1.13-15 10 Anigoyu Ngode Datagaliwabenaga biamogo bia holeneme i̱ áyu kogodagua holiya mo heya hayago kogoni. Ngode Datagaliwabehanda ibunaga biamogo bia holene i̱hondo ngiyago yuwa bame hope nahe howa i̱na biabe timbuniore bialu abosolo agali bibahende i̱na biabe birugome bu bolangua haru. Ani birugoni i̱ninaga hongome ndo Ngode Datagaliwabenaga biamogo bia holene i̱ha heagola birugoni.✡Ab 8.3, Lm 15.18-19, 2 Ko 3.5, 6.1, 11.5, 11.23, Pb 2.13 11 Ogonigo mana ogoni i̱na langiruyaguabi tigua langiyaguabi ina bibahendeme mana mbiraore hangu dege langeramaligo tígua hale howa yu tiga bidami.
Ina homali howa heyu holeberamago ogo
12 Anigo iname mana lamulene tene Keriso ibu homalu Ngode Datagaliwabehanda mo heya henego kagonaga lameramaligo tí marume wali agali homenego naheyulebiraore laramiligo irane agibe. 13 Ogoni henene larimiyagua Ngode Datagaliwabehanda Keriso mo heya nahe laramida. 14 Ngode Datagaliwabehanda Keriso mo heya nahenedale nde iname mana mbira lamulene nangale. Tíguabi nde mana yu tiga bulene nangale. 15 Ogoni dege ndo. Mende larogo wali agali homeneru Ngode Datagaliwabehanda mo heya nahagayagua iname ibugua Keriso mo heya hene larimago mo heya naheneyagua nde tigua ina ke̱ haga ka labehe holebira.✡Ab 1.22, 2.24-32, 4.10, 4.33, 5.32, 13.30 16 Wali agali homenego Ngode Datagaliwabehanda mo heya nahagayagua Kerisobi mo heya nahenedagoni. 17 Ngode Datagaliwabehanda Keriso mo heya naheneyagua tígua ibuhondo mini mbiraore wirimigo bame wuwa ko birimigo nadome ko bialu haabo kami. 18 Ani mitangi bu kamiyagua wali agali Kerisohondo mini mbiraore wu howa homeneru tibi hariga koha piya labehe kamagoni. 19 Iname dindini holene hangunaga Kerisohondo mini dunu bia ho kamayagua wali agalime maruhondo dara hagadagua ndo tigua inahondo dara timbuniore holene wulebira.
20 Ogonidagua nalabeheore. Manane Keriso ibu homalu Ngode Datagaliwabehanda heneneore mo heya henedagua wali agali bibahende homeneru ibugua mo heya holebira.✡Ab 26.23, 1 Ko 15.23, Kl 1.18, 1 Pi 1.3, Mo 1.5 21 Agali mbira ibuha howa homolene wali agali bibahendeni yu anda ibinidagua agali mende ibuha howa mo heya holene yu anda ibini.✡Yo 11.25, Lm 5.12, 5.17-18, 6.23 22 Wali agali bibahende Adamaha howa homolene winidagua wali agali Kerisoha howa mo heya holene wulebiraore. 23 Bulebirago ogo. Keriso ibuni ala heyiyadagua ibuni dai birangi ibunaga wali agali mo heya holebira.✡1 Te 4.15-17, Mo 20.5 24 Ani biragola hamaro bulene horo ibirangi Kerisohanda dama bibahende haru hagarubi hondo hagarubi hongoherubi ti bibahendenaga hongo bo podai holebira. Ani podai howa Keriso ibugua haru hayaruni ibu Aba Ngode Datagaliwabehondo miai holebira. 25 Ogoni irane Ngode Datagaliwabehanda waitigi bibahende biaru tinaga hongo bo podalu Kerisonaga geha mo ngelai helo Kerisohanda haru holene ngaore.✡Iba 110.1, Md 22.44, Ab 2.34-35, Hi 1.13 26 Ngode Datagaliwabehanda ibuni wayali halu maniore waitigi homanaga hongo bo podolebira.✡2 Ti 1.10, Mo 20.14, 21.4 27 Anduane Homogonaga mbugame ledago ogo. Ngode Datagaliwabehanda mbirale bibahende karubi ngarubi Kerisonaga geha ngelai ho ka, lalu gilibu nga. Mbirale bibahende lararu uruni heba Ngode Datagaliwabe ibuni bimaga naheore howa ibugua mbirale karubi ngarubi bibahende Kerisonaga geha mo ngelai kagoni lenego manda bimi̱ya.✡Iba 8.6, Md 28.18, Hi 2.8, 1 Pi 3.22 28 Ani bidagola Ngode Datagaliwabehanda mbirale bibahende karubi ngarubi Keriso ibugua haru helo ibunaga andaneha mo ngelai holebira. Mo ngelai kagola nde Keriso ibu Ngode Datagaliwabe Iginiore howa Ngode Datagaliwabenaga andaneha ibuni helolebira. Ala Ngode Datagaliwabehanda mbirale hayarubi wiyarubi Kerisonaga geha mo ngelenego bibahende Ngode Datagaliwabe ibugua ibuni hangu daligaore howa hondo hagimbu biai holebira.
29 Bi mbira laro. Wali agali maru karume wali agali homeneru mitangi bialu tinaga baboraya mo bia hagago ti aginaga biagabe. Ti marume lalu, Wali agali homeneru naheyulebira, laganego bi ogoni heneneyagua wali agali homenerunaga baboraya bu wia haganego irane agibe. 30 Ogoni heneneyagua inamebi homolene kaware ngagoria ha para haabo haramaligo irane agibe.✡Lm 8.36, 2 Ko 11.26, Ga 5.11 31 Hamene mbaliniru-o horo bibahendeni i̱ homolene kaware ngagoria ha para haabo haruli. I̱na tí mitangi timbuni biaabo halu inanaga Anduane Homogo Keriso Yasuha howa holene yu kamagonaga bi ogoni latagi haro.✡Lm 8.36, 2 Ko 4.10-11, 1 Te 2.19 32 I̱na Ebesani howa nogo gabua tara tara baba gungu birugo dindi holene hangu mitangi bialu biruyagua agi karulolenaga bialu harube. Bi mbira laganego ngago ogo, Iya yawi dege homami̱ya kamago tomobi ibabi áyu kamaore nama nalarama, laga. Wali agali homeneru naheyulebirago lalu heneneyagua bi ani lolene karulape ngagoni.✡Aga 2.24, Ais 22.13, Lg 12.19-20, 2 Ko 1.8, 4.10-11
33 Marume tí mo pila holigo manda bu holene bi lo ngago ogo. Wali agali mana ko biaga karu heba nenege hinu haabo harimiyagua tigua tí mo ko holebira, lagane lo nga. 34 Tí mini tigabi wiadai bialu ko bialu haramiligo yu wahalimu. I̱na tí tagaore halimulonaga larogo tí marume Ngode Datagaliwabe manda nabiore kami.✡Ab 26.8, Lm 13.11, 1 Ko 6.5, Eb 5.14, 1 Te 4.5
Homali howa heyuwa tingini ogobi holeberama lalu langidago ogo
35 Marume bi ogodagua lolebira, Wali agali homeneru agua bialu mo heya holobadabe. Tinaga tingini abi ale holobadabe, lolebira.✡Yo 12.24, 1 Yo 3.2 36 Tí mini nawi kamibe. Tígua mbirale egene dindiha hangaramigola egene ogoni togo buwa mani doai laga ndobe.✡Yo 12.24 37 Widi egeneyaguabi egene tarayaguabi hangaramiligo egene ibuni hangu hangaramili ndobe. Mani holebiragobi homane bibahende ndo hangarimi. 38 Ngode Datagaliwabehanda ibuni manda bidadagua egene ogoniha howa irane anda helo miaga. Ibugua egene tara tara uruni tinaga irane hangu hangu holene ngadagua miaga.✡Pig 1.11
39 Dindini kamaru bibahendenaga tingini mbiraore hangu ndo tara tara bu kama. Wali agalinaga tingini tara ale nogo tara tara karunaga tingini tara ale ega tara tara bedarunaga tingini tara ale wena tara tara ibaha bedarunaga tingini tara ale lowa bu kamagoni.
40 Hari daligani mbirale tara tara karu tinaga tingini nde tara halu dindini mbirale tara tara karu tinaga tingini nde tara halu bidagoni. Hari daligani karu tinaga yári nde daligani kagobi halu dindini karu tinaga yári nde dindini kagobi kagoni. 41 Nibi egebi yakundirubi tinaga wá holene mbiraore hangu ndo tínaga wá holene tara tara kagoni. Yakundi uruni tinibi tinaga wá holene mbiraore hangu ndo wá holene tara tara haga bigi bidagoni.
42 Ogonidagua wali agali homeneru Ngode Datagaliwabehanda ti mo heya holebirago ogo. Homene tingini hora haramagola togo biaga wiyagoni. Ngode Datagaliwabehanda mo heya haragola togo nabi haabobo bu holebira.✡Dan 12.3, Md 13.43 43 Homa hora halu howa de hondoa nabi hongobi naheore hora haramali. Ngode Datagaliwabehanda homali howa mo heya haragola hongohe baya gibiore heyulebira.✡Pb 3.20-21 44 Homa hora halu howa dindinaga tingini hayagobi hora haramaligoni. Ngode Datagaliwabehanda homali howa mo heya haragola dinininaga tingini holebira. Dindinaga tingini kamadagua dinininaga tingini nde holebira ndobe. 45 Anduane Homogonaga mbugani ogodagua leda, Agali mbira mini Adama Ngode Datagaliwabehanda pigane wabinigo ibu dindini holenehe hene, lalu gilibu nga. Ogonidagua ndo Adama mende mani henego ibu Dinini howa holene gahengeore miagane ka.✡Pig 2.7, Yo 6.33, 6.39-40, 6.54, 6.63, 2 Ko 3.4-6, 3.17, Pb 3.21 46 Dinini holene ala íbu haga ndo. Dindini holene ala howa mani dinini holene íbu haga. 47 Adama ala íbu henego Ngode Datagaliwabehanda ibu dindime wabu helene. Adama mende maha henego ibu dahuliya andaga howa dalini.✡Pig 2.7, 3.19, Yo 3.13, 3.31 48 Wali agali dindialinaga kamaru ina mbirali dindime wabini biagobi kama. Wali agali dahuliya andaganaga kamaru ina mbirali dahuliya andaga howa dalini biagobi holeberema. 49 Agali dindime wabu helenego ale kamadagua agali dahuliya andaga howa dalinigo ibu ale holeberama.✡Lm 8.29, 2 Ko 3.18, Pb 3.21, 1 Yo 3.2
50 Hamene mbaliniru-o bi larogoni irane tinginimebi daramamebi wabini karume Ngode Datagaliwabehanda Handame Ho Kagoria nakarulolebiraore. Togo biaga tinginime togo nabiaga ngagoria nakarulabehe ka.✡Md 16.17, Yo 3.3-5, 1 Ko 6.13 51-52 Galone mbira ala mo pani nahe ngelenego langerogo hale halimu. Ina bibahende homai nahe howa biguli mbira lamaro biragola ina abaleore de pandi mugu laradagua bialu Ngode Datagaliwabehanda ina mo tara holebira. Biguli ogoni laragola homene biaru bibahende ti Ngode Datagaliwabehanda mo heya howa haabobo bu holene tingini karulolebira. Ani bialu Ngode Datagaliwabehanda ina bibahende mo tara holebira.✡Pb 3.21✡1 Te 4.15-17✡Seg 9.14, Md 24.31, 1 Te 4.16 53 Ani buwa tingini togo biaga biaru wahalu togo nabiaga haabobo bu holenenaga karulo aribia holebira. Homagane tingini wiyaru wahalu nahomagane ngaru karulo aribia holebira.✡2 Ko 5.4 54 Tingini togo biaga wiyaru tingini togo nabiaga ngaru karulo aribia halu tingini homaga wiyaru tingini nahomagane ngaru karulo aribia hai holebira. Ani biai kagola Anduane Homogonaga mbugani lo wiyadagua, Ngode Datagaliwabehanda homagane mo wahai halu ibuni wayali haiore kagoni, lalu gilibu ngadagua heneneore lola holebira.✡Ais 25.8, Hi 2.14-15, Mo 20.14
55 Homa-o í̠naga wayali holene agiha ngebe.✡Hos 13.14
Homa-o í̠na bope holenego í̠ hongo agiha ngebe,
lenego gilibu nga. 56 Homa ibu hongo miagane tene ko buleneme. Ko bulenenaga hongo Mana lowini ngagoha howa miaga.✡Lm 4.15, 5.13, 6.14, 7.5, 7.13 57 Ani biagago áyu inanaga Anduane Homogo Yasu Kerisoha howa Ngode Datagaliwabehanda inahondo wayali holene ngidagonaga iname ibuhondo turu halu ka̱i̱ore laabo hami̱ya.✡Lm 7.25, 1 Yo 5.4-5
58 Anigo i̱naga hamene mbalini turubiru-o tí mini bilinahe howa ema nabi hongo hoore halimu. Anduane Homogonaga biabe bulene galone timbuni ngago manda bialu tígua ibunaga biabe bule manga nahe ebebe buwa biaabo halu halimu.✡2 Bit 15.7, 1 Ko 3.8, 2 Pi 3.14, Mo 14.13
✡15:3: Iba 22.15, Ais 53.5-12, Dan 9.26, Seg 13.7, 1 Ko 11.2, 11.23, Ga 1.12
✡15:4: Iba 16.8-10, Md 12.40, Lg 24.26, 24.46, Ab 2.24-32, 13.33-35
✡15:5: Md 28.16-17, Mg 16.14, Lg 24.34-36, Yo 20.19
✡15:8: Ab 9.3-6, 22.14, 22.18, 1 Ko 9.1
✡15:9: Ab 8.3, 9.1, Ga 1.13, Eb 3.8, 1 Ti 1.13-15
✡15:10: Ab 8.3, Lm 15.18-19, 2 Ko 3.5, 6.1, 11.5, 11.23, Pb 2.13
✡15:15: Ab 1.22, 2.24-32, 4.10, 4.33, 5.32, 13.30
✡15:20: Ab 26.23, 1 Ko 15.23, Kl 1.18, 1 Pi 1.3, Mo 1.5
✡15:21: Yo 11.25, Lm 5.12, 5.17-18, 6.23
✡15:25: Iba 110.1, Md 22.44, Ab 2.34-35, Hi 1.13
✡15:26: 2 Ti 1.10, Mo 20.14, 21.4
✡15:27: Iba 8.6, Md 28.18, Hi 2.8, 1 Pi 3.22
✡15:30: Lm 8.36, 2 Ko 11.26, Ga 5.11
✡15:31: Lm 8.36, 2 Ko 4.10-11, 1 Te 2.19
✡15:32: Aga 2.24, Ais 22.13, Lg 12.19-20, 2 Ko 1.8, 4.10-11
✡15:34: Ab 26.8, Lm 13.11, 1 Ko 6.5, Eb 5.14, 1 Te 4.5
✡15:45: Pig 2.7, Yo 6.33, 6.39-40, 6.54, 6.63, 2 Ko 3.4-6, 3.17, Pb 3.21
✡15:47: Pig 2.7, 3.19, Yo 3.13, 3.31
✡15:49: Lm 8.29, 2 Ko 3.18, Pb 3.21, 1 Yo 3.2
✡15:50: Md 16.17, Yo 3.3-5, 1 Ko 6.13
✡15:51-52: Seg 9.14, Md 24.31, 1 Te 4.16
✡15:54: Ais 25.8, Hi 2.14-15, Mo 20.14
✡15:56: Lm 4.15, 5.13, 6.14, 7.5, 7.13
✡15:58: 2 Bit 15.7, 1 Ko 3.8, 2 Pi 3.14, Mo 14.13