2
Ngode Datagaliwabehanda ina pele timbuniore nginigo ogo
1 Galone ogoni heneneoreyane hale harimadagua hale ho dungu lo bayuwa yu ndibu lalu hami̱ya. Ani nabi howa yu hadogoea larimayagua inanaga pele mulene ngidagoni yu waholeore berama. 2 Inanaga mamali heneruhondo dahuliyaliruha howa mana ogoni heneneorego lalu Ngode Datagaliwabehanda lawia henego tihondo lamini. Ani lamialu heagola wali agali marume mana ogoni hale halu bia nabi mo wahayaru tini pani nolene wiadagua nelo mini.✡Iba 68.17 3 Ani bini ngago inahondo pele nginigo galone emene ndo timbuniore ngago lalu bayuwa hale nahe howa mo wahalu harimayagua nde ina yo polene nawulebiraore. Anduane Homogo ibunime pele ngulene ogoni pigane lope heneya. Ani lope hayagola wali agali hale hayarume heneneore walia halu inahondo langidagoni.✡Md 4.17, Mg 1.14, Lg 1.2, Hi 10.28-29, 12.25 4 Ani langidagonaga Ngode Datagaliwabe ibugua agalime nabiaga alerubi nahendene ale tara tararubi bini. Ani bialu ibu Dinini kagonaga mugube tara tara ngaru ibuni hame ledadagua mo ta hene. Wali agali biarume ibu iginime langiyago mo henene helobi ibugua nde ani bia tago halu walia hayadagoni.✡Mg 16.20, Ab 2.22, 14.3, 1 Ko 2.4, 12.4, 12.7, 12.11, Eb 1.5, 1.9
Iname pele mulene yu holoma̱ya Yasu ibuni haru kago ogo
5 Ngode Datagaliwabehanda wali agalinaga gahenge holene mani wulebiragonaga te lalu kamago ibugua dahuliyali karume wali agali uruni ti haru helo nahelolebira.✡Hi 6.5, 2 Pi 3.13 6 Ani nabulebiradagua Anduane Homogonaga mbugani bi ogodagua lo nga.✡Yob 7.17, Iba 144.3✡Iba 8.4-6
Ngode Datagaliwabe-o wali agali karu mitangi bu kegoni aginagabe.
Wali agali damene dege karu í̠na ti nenege hinalu mitangi bu kegoni aginagabe.
7 Í̠na wali agali uruni ina emene tigi mbiranaga hangu dahuliyali karunaga andaneha helalu
mani ina mo dunini helalu inahondo wá taraore holenebi mini lene lolenebi ngialu helarigoni.
8 Ani helalu bibahende karubi ngarubi í̠na urunime handame howa haru hai helo helarigoni,✡Md 28.18, 1 Ko 15.25-27, Eb 1.22
lalu gilibu nga.
Bi ogoni ogodagua lalu lo nga, Ngode Datagaliwabehanda karubi ngarubi bibahende wali agali karume handame howa haru helo uruni helene ledagoni ibugua karubi ngarubi bibahendeore manda bialu lene. Ani lenedagua uruni bibahende wali agali iname handame howa haru karia áyu de nahende kamagoni. 9 Ani bidagoyu iname Yasu ibu emene tigi mbira hangunaga dahuliyali karu ti daliga helowa ibu mo dindiha helayagoni manda bidama. Ogoninaga Ngode Datagaliwabehanda ina biamogo bulene nawi howa biamogo bia halu Yasu ibugua ina bibahendenaga homa aribia helo lowa ani bini. Ibugua tandaga timbuni nalu homa aribia hayagonaga Ngode Datagaliwabehanda Yasu mo daliga gibiore helalu ibunaga mini mo yaraga henego áyu kago manda bidamagoni.✡Yo 3.16, Lm 5.18, Pb 2.7-9, 1 Ti 2.6, 1 Yo 2.2, Mo 5.9 10 Ngode Datagaliwabehanda bibahende karubi ngarubi wabuwa ibuni handaya ho ka. Ibugua mbirale ogoni binigo Yasu mo baya buruguleore holenenaga ibu tandaga naragome ibunaga waneigini dewaore ibuninaga baya taraore holene yu helo lowa ani bini. Ani binigome Yasu ibunioreme waneigini o biaru pele mulene ngagoria haru pialu ka.✡Lg 24.46, Yo 20.17, Ab 3.15, Lm 8.29, 11.36, Hi 5.9, 10.10
11 Yasu ibugua wali agalinaga ko bibahendeore domo wahai halu mo gahenge helaga ka. Ani biagago wali agali tinaga ko domo wahalu mo gahenge hene karu tibi Yasu ibubi ti Aba mbiraore hangu ka. Irane ogoninaga Yasuhanda taga nahe howa tihondo hamene mbalini laga kagoni.✡Md 25.40, Mg 3.35, Yo 20.17, Ab 17.26, Lm 8.29, Hi 10.10 12 Yasuhanda Ngode Datagaliwabehondo ogodagua lo nga,✡Iba 22.22
Í̠na biriru agua biri lalu i̱na i̱naga hamene mbaliniru lamulebero.
Ti mo ngoai ho bedagoria
i̱na í̠naga mini yaraga halu iba gana lolebero,
leda.
13 Ibugua bi mendebi ogodagua lo nga, I̱naga mini Ngode Datagaliwabe ibunini paga ho holebero, lalu bi tebonebi ogodagua dege lo nga, Ngode Datagaliwabehanda waneigini i̱ baba holoma̱ya ngiraru heba kogoni, lalu gilibu nga.✡Iba 18.2, Ais 12.2, Yo 17.6, 17.9-12
14 Yasuhanda waneigini layaruni ti wali agali tinginihabi daramahabi howa hono winigo ibubi ogonidagua dege howa ibunaga mini tinginibi gali ibuniore bitagohe hene. Ogoni biyadagoni Yasu homayagome dama Heyolabe homanaga hongo yu kago bo wahole lowa ibugua ani bini.✡Yo 1.14, 12.31, Lm 8.3, Pb 2.7, Kl 2.15, 1 Yo 3.8, Mo 12.10 15 Ani biyagome wali agali homolenaga gi holeneme ti dariba ho haabo hayaru Yasuhanda golope hene.✡Lm 8.15, 2 Ti 1.7 16 Ogoni Yasuhanda biabe ogoni biyago dahuliyali karu biamogo bule ndo biyagoni. Ogonidagua Anduane Homogonaga mbugani lo ngago ogo, Yasu ibugua Abarahamanaga aguanene karuore biamogo biaga, lalu gilibu nga.✡Ais 41.8-9 17 Anigo Yasu ibu mini bilinahebi dara halu biamogo biagabi howa ibu Ngode Datagaliwabenaga biabe bialu inanaga loma binigo mo miaga haguane timbuni kago helonaga ibuni agali hamene hearu baba mo mbiraore halu ti heagobiore hene. Ogoni binigo irane ina wali agalime ko bibahende birimago domo waholene wilonaga ani bini.✡Pb 2.7, Hi 2.14, 4.15, 5.1-2, 1 Yo 2.2, 4.10 18 Yasu ibu agali baba bitago ho hayangi ko bibahende wiarume ibu ba handayagobi mo tandaga hayagobi ibunaga wali agali kamaru ko ngaru bibahendeme ba handaragola ibunime ina biamogo bibehe kagoni.✡Hi 4.15-16, 5.2, 7.25
✡2:3: Md 4.17, Mg 1.14, Lg 1.2, Hi 10.28-29, 12.25
✡2:4: Mg 16.20, Ab 2.22, 14.3, 1 Ko 2.4, 12.4, 12.7, 12.11, Eb 1.5, 1.9
✡2:8: Md 28.18, 1 Ko 15.25-27, Eb 1.22
✡2:9: Yo 3.16, Lm 5.18, Pb 2.7-9, 1 Ti 2.6, 1 Yo 2.2, Mo 5.9
✡2:10: Lg 24.46, Yo 20.17, Ab 3.15, Lm 8.29, 11.36, Hi 5.9, 10.10
✡2:11: Md 25.40, Mg 3.35, Yo 20.17, Ab 17.26, Lm 8.29, Hi 10.10
✡2:13: Iba 18.2, Ais 12.2, Yo 17.6, 17.9-12
✡2:14: Yo 1.14, 12.31, Lm 8.3, Pb 2.7, Kl 2.15, 1 Yo 3.8, Mo 12.10
✡2:17: Pb 2.7, Hi 2.14, 4.15, 5.1-2, 1 Yo 2.2, 4.10