2
1 I̱ waneiginiru-o tí ko nabilimulo i̱na bi ogoni bebani gili bialu lawia haro. Ai ina mbiralime ko mbira birimayagua mini tigabiwi Yasu Keriso kagoni ibugua ibu Abahondo inanaga bi la haga ka.✡Lm 8.34, 1 Ti 2.5, Hi 7.25, 9.24 2 Iname ko birimagonaga hangu ndo wali agali bibahende karume ko biyarunagabi domo waholene Keriso ibuniore ka.✡Yo 1.29, 11.52, Lm 3.25, 2 Ko 5.18, Kl 1.20, 1 Yo 4.10, 4.14
3 Ngode Datagaliwabehanda mana lowini ngago iname hale halu birimayagua ina Ngode Datagaliwabe kago mandabiore kamagoni. 4 Ngode Datagaliwabehanda mana lowini ngago iname hale halu bia nabi howa, Ngode Datagaliwabe kago manda bido, larimayagua ina ke̱ howa lalu kamago henene lolene inaha nawiore howa larama.✡1 Yo 1.6-8, 4.20 5 Ngode Datagaliwabehanda, Bia, laradagua hale halu bialu kagome Ngode Datagaliwabenaga gubalini holene baya buruguleore ibuha ngagoni. Iname Ngode Datagaliwabeha hogimbu bu harimadabe manda buluma̱yanaga ogo.✡Yo 13.15, 14.21-23, 15.4-5, 1 Pi 2.21, 1 Yo 4.12-13, 4.17, 5.3 6 Mbiralime, I̱ Ngode Datagaliwabeha hogimbu bu ko, lalu kagome Yasu Kerisohanda bialu henedagua bialu holene nga.
Mana gahenge bulene ngago ogo
7 I̱ nenege turubiru-o Ngode Datagaliwabehanda mana lowini ngago iname buluma̱yanaga lowinigo i̱na tíhondo gilibu wia harogo ogoni gahenge ndo gilibu wia haro. Mana ogoni bamba piganengi lowini ngago iname tí langirimagola tí hale hai harimi.✡1 Yo 2.24, 3.11, 2 Yo 5-6 8 Ai áyu lone gilibu wia harogo mana gahenge winidago mana ogoni henene ngago hendelo Kerisohanda biyagomebi tígua birimigomebi walia harimi. Anidagua bialu harimigome aruma holene ereba halu wá holene heneneore abale tagira íbu kagoni.✡Yo 1.9, 8.12, 13.34, Lm 13.12, Eb 5.8, 1 Te 5.5, 5.8
9 Mbiralime, Wá holeneha kogo, lowa ibu Keriso hameigini karuhondo gubalini nahe kayagua nde ibu aruma holeneha haabo ka.✡1 Ko 13.2, 2 Pi 1.9, 1 Yo 3.10, 3.14-15, 4.20 10 Mbirali ibu Keriso hameigini karuhondo gubalini ho kayagua ibu wá holenehayagi ka. Anigo ibugua marume mana ko bilo mo bia holene ibuha nawiore.✡Yo 11.9, Lm 14.13, 2 Pi 1.10, 1 Yo 3.14 11 Mbiralime Keriso hameigini gubalini nahe kayagua ibu aruma holeneha ibaga bialu ka. Ani ibaga bialu howa aruma kagome ibunaga de mo ndibula kagola ibu ogoha poro lalu ndo ibu pupe halu ka.✡Yo 11.10, 12.35
Ko bulene tara tara ngaru mo tene ho karume Ngode Datagaliwabe gubalini habe nahe kago ogo
12 I̱ waneiginiru-o Kerisohanda biyagome tínaga mana ko birimiru domo wahai hayagonaga i̱na tíhondo beba gilibu wia haro.✡Lg 24.47, Ab 4.12, 13.38, 1 Ko 6.11, 1 Yo 1.7 13 Wali agali wahe mini bogabiru-o mbirali ibu ala haluhe haabobo henego ha ho wiaabo kago tí manda bidamigo i̱na tíhondo beba gilibu wia haro. Wandari igiri daliaheru-o tígua Ko Bulene Anduane kago bope halu tí wayali kamigo i̱na tíhondo beba ogo gilibu wia haro.✡1 Yo 1.1
14 I̱ waneiginiru-o tí Aba kago manda bidamigo i̱na tíhondo beba gilibu wia haro. Wali agali wahe mini bogabiru-o mbirali ibu haluhe haabobo henego ha ho wiaabo kago tí manda bidamigo i̱na tíhondo beba ogo gilibu wia haro. Wandari igiri daliaheru-o tí hongohe kamigo Ngode Datagaliwabenaga bi lolene tínaga bu habaneha ngagome tígua Ko Bulene Anduane kago bope halu tí wayali kamigonaga i̱na tíhondo beba ogo gilibu wia haro.✡Eb 6.10
15 Dindini ko biaga karunaga manabi ko bulene tara tara ngarubi mo tene nahalimu. Mbiralime dindini ko biaga karunaga mana mo tene halu kayagua ibu Aba Ngode Datagaliwabe gubalini nahaga ka.✡Md 6.24, Lm 8.7, 12.2, Ga 1.10 16 Dindini ko bulene tara tara bibahende ngarubi mini kome de hondowa dimagoli holenebi mbirali ibuninaga mini mo yaraga holenebi uruni Aba Ngode Datagaliwabeha howa ibini ndo dindini ko biaga karunaga manaha howa ibini nga.✡Lm 13.14, Ya 4.16, 1 Pi 2.11 17 Dindini ko biaga karunaga mana ngarubi dimagoli holene bibahende ngarubi ereba hai holebira. Ani biragola Ngode Datagaliwabehanda, Bia, ledadagua bialu karu ti dege haabo holebira.✡Md 7.21, 1 Ko 7.31, Ya 1.10, 1 Pi 1.24
Kerisonaga Waitigi íbu kago ogo
18 I̱ waneiginiru-o horo hamaro bulene tu kaware nga. Horo hamaro bulene tu kaware wiragola Kerisonaga Waitigi ibulebira layago hale harimadagua ibu waitigi dewa áyu íbu kago hondowa iname horo hamaro bulene tu kaware nga manda bidama.✡Md 24.5, 24.24, 2 Te 2.3, 1 Ti 4.1, Hi 1.2, 1 Pi 4.7, 2 Pi 2.1, 2 Yo 7 19 Uruni ti ina kamaru aria ndogo ti ina helalu tagira piyiya. Ti ina aria heneneore kale ina baba mandagi mo mbiraore ho kamale. Ti bibahende ina kamaru aria ndo howa walia holenaga ti ina helalu tagira piyiya.✡Md 24.24, Yo 6.37, Ab 20.30, 1 Ko 11.19
20 Kerisohanda tíhondo Ngode Datagaliwabe Dinini ngiyago tí bibahendeme henene lolene mandabu kami.✡Yo 10.4, Ab 3.14, 1 Ko 2.15, 2 Ko 1.21, Hi 1.9, 1 Yo 2.27 21 Tí henene lolene manda nabi kami lalu ndo tí henene lolene mandabu kamigobi henene loleneha howa ke̱ holene tagira ibabe nahe manda bidamigobi ogoninaga lalu i̱na tíhondo beba gilibu wia haro.
22 Anigo ke̱ haga ka aibe. Mbirali Dabo Helenego ibulebira lowinigo ibu Yasu ndo ka, laga karu ti ke̱ haga ka. Tigua Abahondobi Iginihondobi erembira miaga kago ti Kerisola Waitigi ka.✡1 Yo 4.3, 2 Yo 7 23 Mbiralime ibu Iginihondo erembira miaga kago ibu Abahondobi erembira dege miaga ka. Mendealime ibu Iginihondo mini mbiraore wiaga kago ibu Abahondobi mini mbiraore dege wiaga ka.✡Yo 5.23, 14.7-10, 15.23, 1 Yo 4.15, 5.1, 2 Yo 9
Yasu Kerisoha hogimbu bu haabo holene ngago ogo
24 Tí nde pigane Ngode Datagaliwabehondo mini mbiraore wialu harimingi ibunaga mana hale howa tínaga miniha yu tigabu harimigo yani ho haabo halimu. Ani yu harimiyagua tí Aba Iginilaha hogimbu bu haabo holeberami.✡Yo 14.23, 1 Yo 1.3, 2 Yo 6 25 Ogoninaga Kerisohanda inahondo, Haabo holene ngulebero, lalu lowinigo nga.✡Yo 3.15, 6.40, 17.3, 1 Yo 1.2, 5.11
26 Tigua tí mo hondo hole manda bialu karunaga i̱na tíhondo bi ogoni bebani gilibu wia haro. 27 Kerisohanda tíhondo ibu Dinini ngiya. Ibu Dinini tíha kagola howa mendealime tí lawai holene henge nawi. Keriso Dinini ibugua bibahende tí lawai halu howa ke̱ halu ndo heneneore hangu lawai haga ka. Ibugua tíhondo lawai halu kadagua hale halu bialu Kerisoha hogimbu bu haabo halimu.✡Yo 14.26, 16.13, Hi 8.10-11, 1 Yo 2.20
28 Anigo i̱ waneiginiru-o Keriso ibu hapani holene Horo harangi ina taga howa ha do holene irane nawilo mini dunubia ho halu dungulo howa ibuha hogimbu bu haabo holene nga.✡1 Yo 3.2, 4.17 29 Keriso ibu mini tigabiwi kago tí manda bidamigo wali agali mana tigabi bialu karu ti Ngode Datagaliwabe waneigini kago manda bidamini.✡Ab 22.14, 1 Yo 3.7, 3.10
✡2:1: Lm 8.34, 1 Ti 2.5, Hi 7.25, 9.24
✡2:2: Yo 1.29, 11.52, Lm 3.25, 2 Ko 5.18, Kl 1.20, 1 Yo 4.10, 4.14
✡2:5: Yo 13.15, 14.21-23, 15.4-5, 1 Pi 2.21, 1 Yo 4.12-13, 4.17, 5.3
✡2:7: 1 Yo 2.24, 3.11, 2 Yo 5-6
✡2:8: Yo 1.9, 8.12, 13.34, Lm 13.12, Eb 5.8, 1 Te 5.5, 5.8
✡2:9: 1 Ko 13.2, 2 Pi 1.9, 1 Yo 3.10, 3.14-15, 4.20
✡2:10: Yo 11.9, Lm 14.13, 2 Pi 1.10, 1 Yo 3.14
✡2:12: Lg 24.47, Ab 4.12, 13.38, 1 Ko 6.11, 1 Yo 1.7
✡2:15: Md 6.24, Lm 8.7, 12.2, Ga 1.10
✡2:16: Lm 13.14, Ya 4.16, 1 Pi 2.11
✡2:17: Md 7.21, 1 Ko 7.31, Ya 1.10, 1 Pi 1.24
✡2:18: Md 24.5, 24.24, 2 Te 2.3, 1 Ti 4.1, Hi 1.2, 1 Pi 4.7, 2 Pi 2.1, 2 Yo 7
✡2:19: Md 24.24, Yo 6.37, Ab 20.30, 1 Ko 11.19
✡2:20: Yo 10.4, Ab 3.14, 1 Ko 2.15, 2 Ko 1.21, Hi 1.9, 1 Yo 2.27
✡2:23: Yo 5.23, 14.7-10, 15.23, 1 Yo 4.15, 5.1, 2 Yo 9
✡2:24: Yo 14.23, 1 Yo 1.3, 2 Yo 6
✡2:25: Yo 3.15, 6.40, 17.3, 1 Yo 1.2, 5.11
✡2:27: Yo 14.26, 16.13, Hi 8.10-11, 1 Yo 2.20
✡2:29: Ab 22.14, 1 Yo 3.7, 3.10