5
1 Ogonigo áyu ina dindinaga tingini balai anda ale bu kamago goba haragola Ngode Datagaliwabehanda dahuliya andagani haabobo holene tingini anda ale agalinaga gime wabini ndo ibunime wabinigo inanaga ngule wia kago manda bu kama.✡2 Ko 4.7, 2 Pi 1.13-14 2 Inanaga tingini anda ale dahuliya andagani ngago áyu ogoni ina karulo hole hame timbuniore lowa karuore loliyago lalu hondo ho kama.✡Lm 8.23 3 Tingini anda ale ogoni iname karulo howa ina tingini nahe naholeberama. 4 Ina dindinaga tingini balai anda ale ogoniha kamago howa genda halu u̱lu̱ lalu haramali. Ogonidagua beramaligo irane ina dindininaga tingini wahoa howa ndo dindinaga homagane tingini dahuliya andaganinaga tingini holene gahengeoreme ina karulai helo hamelo kama.✡1 Ko 15.53-54 5 Tara ogonibi holoma̱ya Ngode Datagaliwabe ibugua inanaga mo manda manda bia howa inahondo bibahende ngulebiraru ngulebiraore manda buluma̱ya manane ibu Dinini ngidagoni.✡Lm 8.16, 8.23, 2 Ko 1.22, Eb 1.14, 2.10
6 Ani bidagonaga iname turu halu hongo ho haabo kama. Ina tingini anda ale áyu kamago howa Anduane Homogonaga andaga nahende kama manda bidama.✡Hi 11.13-16 7 Irane iname áyu bialu kamago deme hondowa ndo mini mbiraore wuwa kamagoni.✡Lm 8.24-25, 1 Ko 13.12, 2 Ko 4.18, Hi 11.1 8 Iname turu halu hongo ho howa tingini anda ale áyu kamagoni wahalu Anduane Homogo heba hole poa ho kama.✡Pb 1.23 9 Áyu dindini howayaguabi dahuliya andagani howayaguabi iname Anduane Homogo turu helo ibu hame ledadagua bua kama.✡Kl 1.10, 1 Te 4.1 10 Ogonigo ina bibahendeme bialu harimadagua Kerisohanda ina dabelo ibunaga deni ha pani hai holeberama. Ha pani howa inane dindini howa hangu hangu bayale bialu heneyaguabi kagua bialu heneyaguabi inane bialu harimadagua degedege ngulebira.✡Aga 12.14, Lm 2.16, 14.10, Ga 6.7, Kl 3.24-25, Mo 22.12
Kerisoni howa ina Ngode Datagaliwabe heba nenege hinu kamago ogo
11 Ina Anduane Homogohondo gi holene irane ngago manda buwa iname wali agali ibuhondo mini mbiraore wilonaga mo wua haramali. Ngode Datagaliwabehanda ina manda biaiore ho ka. Ibugua ani manda bidadagua tíguabi tínaga bu miniha i̱ kogobi manda bidamilo hamelo ko.✡2 Ko 4.2, Hi 10.31, Yu 23 12 Iname tíhondo, Ina bayale kama, lalu lone larama ndo. Tígua ina mitangi bialu turu holene iraneorego yu halimulonaga laramagoni. Irane ogonigo marume mbiralinaga miniha ndo tingini daliga hondowa mini yaraga halu bi larago hale howa tígua ladai bibehe halimulonaga larama.✡2 Ko 1.14, 3.1 13 Ina lulu ale kamayagua ina Ngode Datagaliwabe mitangi bialu biabe ogonibi kamagoni ndobe. Ina lulu ndo miniwi kamayagua ina tí mitangi bialu biabe ogonibi kamagoni ndobe. 14 Anigo wali agali bibahende homai holilono agali mbiralime homa henego ogoni wali agali bibahendenaga homa hene. Ogoni manda buwa Kerisonaga gubalini holeneme ina haru kagoni.✡Lm 5.15 15 Keriso ibugua wali agali bibahendenaga homa henego irane wali agali bibahende kamirume tíni hangu mitangi bialu bua biradagua bialu halimulo ndo. Keriso ibugua tí mitangi buwa homalu heyinigo tígua ibu hanguore mitangi bialu talima pialu halimulonaga bini.✡Lm 14.7-8, 1 Ko 6.19, Ga 2.20, 1 Te 5.10, 1 Ti 2.6, 1 Pi 4.2
16 Ogonigo wali agalime dindini howa tingini daliga hondowa dabagadagua áyu iname ogonidagua dabolene nawi. Ala iname tingini daliga hondowa Kerisobi ogonidagua dabarimago ibu áyu ogonidagua nadabaramali.✡Yo 6.63, 15.14, Pb 3.7-8, Kl 3.11 17 Mbirali ibu Kerisoha ho gimbu bu kayagua ibu gahenge ka. Ala hayago wahowa holene gahenge yu ka.✡Ais 43.18, Lm 8.1, 8.9-10, Ga 5.6, 6.15, Eb 2.15, Mo 21.5 18 Aguani mo ha hagane tene Ngode Datagaliwabe ka. Iname ibula waitigi ho hemaria ibugua ina mo ibunaga damene helene. Ibugua ani binigo wali agali marubi ibu damene dege helo mo hela holene biabe ogoni inahondo ngida.✡Lm 5.10, Eb 2.16, Kl 1.20, 1 Yo 2.2 19 Ani ngidago iname bi lamulene ogodagua, Ngode Datagaliwabehanda Kerisoha howa wali agali bibahende mo ibunaga damene hene, lalu lameramali. Wali agalime ko birimaru Ngode Datagaliwabehanda mitangi bu wiaabo nahaga. Ibugua ina ogodagua mo ibu damene haya lalu lamuluma̱ya inahondo lamulene ngiyagoni.✡Lm 3.23-25, Kl 1.19-20
20 Aguani bidago iname Kerisohanda bi la laradagua lalu kamagola Ngode Datagaliwabehanda iname bi langeramagoha howa tíhondo bi langialu ka. Anigo iname Kerisohanda laradagua bialu tí Ngode Datagaliwabela waitigi ho harimigo ibugua tí mo ibu damene helo halimulo hame lowa larama.✡2 Ko 3.6, 6.1, Eb 6.20 21 Keriso ibugua ko mbira nabiagaore howa Ngode Datagaliwabehanda ina mitangi bialu ina Kerisoha ho gimbu bu howa ibunaga mini tigabi wulene yu holoma̱yanaga iname ko birimago ibugua Kerisohondo miai hene.✡Ais 53.6-12, Yo 8.46, Lm 5.19, 1 Ko 1.30, Ga 3.13, Pb 3.9, Hi 4.14-15, 1 Pi 2.22-24, 1 Yo 3.5
✡5:5: Lm 8.16, 8.23, 2 Ko 1.22, Eb 1.14, 2.10
✡5:7: Lm 8.24-25, 1 Ko 13.12, 2 Ko 4.18, Hi 11.1
✡5:10: Aga 12.14, Lm 2.16, 14.10, Ga 6.7, Kl 3.24-25, Mo 22.12
✡5:11: 2 Ko 4.2, Hi 10.31, Yu 23
✡5:15: Lm 14.7-8, 1 Ko 6.19, Ga 2.20, 1 Te 5.10, 1 Ti 2.6, 1 Pi 4.2
✡5:16: Yo 6.63, 15.14, Pb 3.7-8, Kl 3.11
✡5:17: Ais 43.18, Lm 8.1, 8.9-10, Ga 5.6, 6.15, Eb 2.15, Mo 21.5
✡5:18: Lm 5.10, Eb 2.16, Kl 1.20, 1 Yo 2.2
✡5:21: Ais 53.6-12, Yo 8.46, Lm 5.19, 1 Ko 1.30, Ga 3.13, Pb 3.9, Hi 4.14-15, 1 Pi 2.22-24, 1 Yo 3.5