1 Ina garabaya ale hemaria Keriso ibugua ina golopeore hene. Ani binigo manda buwa golope holene ogoni hongo howa yu halimu. Maru karume tí lone garabaya biabe ale bia haga helelo henge namilimu.✡Yo 8.32, 8.36, Ab 15.10, Lm 6.18, Ga 2.4, 5.13, 1 Pi 2.16

2 Bayuwa hale hadaba. I̱ Polo i̱na tí langerogo ogo. Tí dongone podo mabu biagane mana bilo e̱ larimiyagua Keriso ibu tínaga biamogo biaga ndo holebira. 3 Bi ogoni galoneore ngago lone larogo. Dongone podo mabu biagane mana bilo agali mbiralime e̱ layagua Mana lowinigo ngadagua bibahende ibugua biai holene nga.✡Ga 3.10 4 Tígua Mana lowinigo beramigome Ngode Datagaliwabehanda, Tí mini tigabiwi kami, lolebira manda bu kamiru Kerisoha ho gimbu bu harimiru tínime yu wahalu pirimi. Tí Ngode Datagaliwabenaga biamogo bia holene ngagoria nahe tagirahayagi kami.✡Lm 9.31-32, Hi 12.15 5 Ina nde Ngode Datagaliwabe Dinini ibugua ina mo hongo haragola Yasuhondo mini mbiraore wirimagome Ngode Datagaliwabehanda inahondo. Tí mini tigabiwi kami, lolebira. Ani lolebirago manda buwa mini dunu bia ho kama.✡Lm 8.24-25, 2 Ti 4.8 6 Ina Keriso Yasuha ho gimbu bu howa dongone podo mabu biagane mana bini nabiniyaguabi ta nabi howa iname Ngode Datagaliwabehondo mini mbiraore wuwa gubalini holene walia haga bialu kamago galoneore ogoni.✡1 Ko 7.19, Ga 6.15, Kl 3.11, Ya 2.18-22

7 Ala tí Kerisonaga harigani bayale pialu harimigo tígua henene bulene ngago nabilimulo aiwa hangai hayabe. Ibugua agigo bia lalu hangai hayabe.✡1 Ko 9.24, Ga 1.6, 3.1 8 Ngode Datagaliwabe tí olaga kagome hangai haya ndo. 9 Yidi emeneme mberedi mo timbu haga ani lagane nga.✡1 Ko 5.6, 15.33 10 Ina Anduane Homogoha ho gimbu bu kamago mitangi bialu i̱na tí mini tara nawuleberamilo manda bu ko. Mbirali tínaga mini mo kira haga kago ibu aibe tobarago Ngode Datagaliwabehanda ogoni ibuhondo pani mulebira.✡2 Ko 2.3, 8.22, 10.6, 11.15, Ga 1.7

11 I̱ hamene mbaliniru-o tígua lalu, Polo ibu dongone podo mabu biagane mana bulene nga lalu lawai halu ka, lagago ogoni heneneyagua i̱ mo tandaga haabo harago irane aginagabe. Mana ogoni bulene ngale Keriso ira bangani homayagonaga lawai harogome tí mini mo burugula nakale.✡1 Ko 1.23, 15.30, Ga 6.12, 6.17 12 Tínaga mini mo burugula halu karume tininaga wangabe nahe hole mo wahai helo hame ledo.

13 I̱ hamene mbaliniru-o tí nde golope hene halimulo Ngode Datagaliwabehanda tí dabo heledagoni. Ina golope hene kamago lo mitangi bialu inanenaga minime ko hame ledadagua ta nabi bulene nga manda nabilimu. Ani nabi gubalini holeneme tíni biamogo bia haga haga bialu halimu.✡1 Ko 8.9, 9.19, 1 Pi 2.16, 2 Pi 2.16-19 14 Mana lowinigo bibahende bimaga howa bi mbiraore ogo, Í̠na í̠ni gubalini harilidagua maru karu ta nabi gubalini ho habe.✡LBM 19.18, Md 5.43, 7.12, Lm 13.8-9, Ya 2.8 15 Tí nogo gabua tara tararume gungu biagadagua birimiyagua tíni bo wahalu togo lolemeni de hondo halimu.

16 I̱na bi larogo ogo. Ngode Datagaliwabe Dinini ibugua tí haru helo helalimu. Ani haru helo helarimiyagua tínaga mini ko ngagome dimagoli hara ale nabuleberami.✡Lm 6.12, 8.4, 13.14, Ga 5.25, 1 Pi 2.11 17 Inanaga mini ko ngagome hame larago Ngode Datagaliwabe Dinini ibugua hame nalaga ka. Ngode Datagaliwabe Dinini ibugua hame ledago inanaga mini ko ngagome hame nalaga howa libu waitigi kagoni. Ani birago manda bialu tíni bua biradagua bibe nahe kami.✡Lm 7.15-23, 8.6-7, 1 Pi 2.11 18 Ngode Datagaliwabe Dinini ibugua tí haru hayagua Mana lowini ngago andaneha naholeberami.✡Lm 6.14, 8.2, 8.14

19 Mini kowi kagonaga mana ogobi nga. Wali agali dimagoli holenebi kayu bulenebi mana ko bulenebi✡1 Ko 3.3, 6.9-10, Eb 5.3, Kl 3.5, Ya 3.14-15 20 mbirale tarahondo bi pupu wulenebi hambu bolenebi nga. Wali agali handabe manga hagabi gungu biagabi henge lagabi keba hagabi ibuni hangunaga mitangi biagabi ka. Ani bialu tini mini mbiraore nahagabi haga haga biagabi 21 mendealinaga ngago dimagoli hagabi lulu yule lulu iba nagabi dawe hagabi mana ko uruni ale tara tara biaga ka. I̱na bi ala langirudagua halu mende langerogo mana urunibi bialu karume Ngode Datagaliwabehanda Handame Ho Kagoria naholebiraore laro.✡1 Ko 6.9, Eb 5.5, Kl 3.6, Mo 22.15

22 Anigo Ngode Datagaliwabe Dinini ibugua lini ogobi daga. Gubalini holenebi turu holenebi mo palia holenebi ema nabi howa hibu lolenebi biamogo bulenebi bayale dege bulenebi mini bilinahe holenebi✡1 Ko 13.7, Eb 5.9, Kl 3.12, Ya 3.17 23 mo dindiha holenebi mini haru holenebi Ngode Datagaliwabe Dinini ibugua lini urunibi daga ka. Urunibi bulene ngago mana lo ngagome hangai habe nahe nga.✡1 Ti 1.9 24 Yasu Kerisonaga wali agali karume mini kobi mini konaga hame laganebi dimagoli haganebi ira bangani ba para hai hene.✡Lm 6.6, 13.4, Kl 3.5, 1 Pi 2.11 25 Ngode Datagaliwabe Dinini ibugua inahondo holene gahenge ngiyago ibugua ina haru heloorebi helami̱ya.✡Lm 8.4-5, Ga 5.16

26 Ina mine nahe hami̱ya. Inane keba haga haga nabi hami̱ya. Mendealinaga ngago i̱ nayido agini henge nale hami̱ya.✡Pb 2.3