2
Iname wali agali talebu ki bulene nawigo ogo
1 I̱ hamene mbaliniru-o Anduane Homogo Yasu Keriso ibu mini daliga lowa Anduane Homogo kago ibuhondo mini mbiraorewi kamiru tígua wali agali tale bialu homogo karuhondo turu halu yagibano karuhondo handabe manga halu bulene nawi.✡Man 1.17, Min 24.23, Md 22.16, Ab 10.34, Ya 2.9 2 Agali kira mendego ibu gi magibi aga bayalebi biai howa mendego ibu yagibano aga ko buda pugubi buwa libu tínaga lotu lagane andaha ibiyagua 3 tígua agali aga bayalebi kagohondo lalu, Biragane bayale ogoria birule íbu, lalu agali mende aga budu pugubi biagohondo lalu, Í̠ kegoriani hoa biyagua nde habe. Biruabiyagua nde ogoriani birabe, 4 laramiligo tínaga mini ko ngamigome wali agali talebu ki bialu kami.
5 I̱ hamene mbalini turubiru-o tí hale halimu. Yagibano karume Ngode Datagaliwabehondo mini mbiraore wulene timbuni yu tiga bilobi Ngode Datagaliwabehanda handame ho kagoria ti helobi ibugua ti dabo helene. Ibuhondo gubalini ho karu ibugua handame ho kagoria ti holebira lalu lowini.✡Md 5.3, Yo 7.48, 1 Ko 1.26-28, 1 Ti 6.18, 2 Ti 4.8 6 Agali kira larugo yagibano biagohondo tígua handabe manga halu mo taga haramili. Homogo karume tí handabe manga halu, Godi lo ma, laga ndobe.✡Ab 13.50, 18.12, 1 Ko 11.22, Ya 5.6 7 Tigua tí Yasu Kerisonaga mini bayale karulo kamigo hondowa tí mege biaga ka ndobe.
8 Ngode Datagaliwabehanda Handame Ho kagonaga mana lowinigo ibunaga mbugani longago ogo, Í̠na í̠ni gubalini ho harilidagua maru karu ta nabi gubalini ho habe, lalu gilibu nga. Ani lo ngadagua bialu kamiyagua ogoni bayaleore berami.✡LBM 19.18, Md 19.19, 22.39, Lm 13.8-9, Ga 5.14 9 Mbirali kagohondo handabe manga ho kamiyagua Mosese heneyangi Mana lowini ngago pugualu ko berami.✡Man 1.17 10 Ngode Datagaliwabehanda bi mana lowini ngago mbiralime mana ogoni mbira hangu puguayagua ibugua bi mana bibahende ngago puguai haragoni.✡Man 27.26, Md 5.19, Ga 3.10 11 Ngode Datagaliwabehanda lalu, Wali agali kayu nayabe, lalu bi mende, Homelo nababe, lene. Tí wali agali kayu nabi howa mbirali homelo barimiyagua Ngode Datagaliwabehanda bi mana bibahende lowinigo puguai harimi.✡Har 20.13-14, Man 5.17-18, Lm 13.9 12 Ngode Datagaliwabe bi mana lowini ngagome wali agali golope hagago mana ogonime tí tale bulebirago tígua bi laramigobi mana beramigobi hondowa halimu.✡Ga 6.2, Ya 1.25-26, 1 Pi 2.16 13 Mbiralime wali agali maruhondo dara howa biamogo nabiyagua ogoninaga Ngode Datagaliwabehanda dabi ki birangi ibu dara naholebira. Anigo mbiralime wali agali dara halu biamogo bialu hayagua Ngode Datagaliwabehanda daba ki birangi ogoni ibu dara holebira.✡Min 21.13, Md 5.7, 18.32-35, 25.41-42, 1 Yo 4.17-19
Mini mbiraore wu howa bulene ogo
14 I̱ hamene mbaliniru-o, Ngode Datagaliwabehondo mini mbiraore wu ko, lowa mana bayale biatagi naharimiyagua mana ogonibi beramigome tíni pele mibehedabe.✡Md 7.21, 7.26, Ya 1.23 15 Keriso hameigini marume agabi tomo nolenebi nawi kagola✡Yob 31.19-20, Lg 3.11, 1 Yo 3.17 16 o biaruhondo aga tomobi nami howa tihondo lalu, Tí tomo karulape nalu aga bayale bialu turu halu hondo halimu, larimiyagua bayale beramibe. 17 Tí Ngode Datagaliwabehondo mini mbiraorewi kamiyagua nde mana beramigome walia halu biatagi halimu. Ibuhondo mini mbiraore wu howa mana bayale biatagi naharimiyagua mini mbiraore wulene ogoni hangu galone naholebira.✡Ya 2.20, 2.26
18 Mbiralime lalu, Mbirali ibu Ngode Datagaliwabehondo mini mbiraore wu haga ka mendeali ibu mana bayale bialu haga ka, lolebira. Ani laragohondo i̱na agua ladai bero. Mbiralime Ngode Datagaliwabehondo mini mbiraore wu ko lowa mana bayale nabiyagua i̱na ibu mini mbiraore wu ka agua manda buleberobe. I̱ nde mana bayale berogome Ngode Datagaliwabehondo mini mbiraore wu ko, lalu walia holebero.✡Ga 5.6, Ya 3.13 19 Ngode Datagaliwabe ibu mbiraore kago manda biribe. Bayuwa manda birida. Dama karu ti nde anidagua dege manda bialu mogo lowa gi halu ka. Í̠ mini nawi kegoni.✡Md 8.29, Lg 4.34, Ab 16.17 20 Ngode Datagaliwabehondo mini mbiraore wu howa mana bayale biatagi nahayagua ogoni galone ndo berego manda nabi kebe. 21 Inanaga mamali Abarahamahanda ibu igini Aisaga Ngode Datagaliwabehondo bo lomabu miaga dabuni mule biyagola Ngode Datagaliwabehanda, Ibu mini tigabiwi ka, lene.✡Pig 22.1-14 22 Ibugua mini mbiraore wu howa Ngode Datagaliwabehanda bia layadagua biatagi hayagome Ngode Datagaliwabehondo mini mbiraore ogobi wu ko lalu walia hene.✡Hi 11.17-18 23 Ani biyagola Anduane Homogonaga mbugani bi lowinigo lola henego ogo, Abarahamahanda Ngode Datagaliwabehondo mini mbiraore wu heago hondowa Ngode Datagaliwabehanda, Ibu agali mini tigabiwi ka, lowa, I̱naga nenegeore ka, lalu gilibu nga.✡Pig 15.6, 2 Bit 20.7, Ais 41.8, Lm 4.3, 4.9, 4.22, Ga 3.6 24 Anigo mbiralime Ngode Datagaliwabehondo mini mbiraore wirago hangume ndo mana bayale birago hondowabi Ngode Datagaliwabehanda, Ibu mini tigabiwi dege ka, lolebira.
25 Bayanda wali mbira kayu bule muni ngi laga mini Lahaba berenego ibugua Isaraele agali kirali taya ibiyago labo yo pialu pelo lowa ibu andaga bira do helalu hariga tarani dai bilo walia hayagome ibubi mini tigabiwi holene yini.✡Yos 2.1-21, Hi 11.31
26 Anigo mbiralinaga tinginibi dininibi mandagi naheyagua nde ibu homene ka. Ogonidagua Ngode Datagaliwabehondo mini mbiraore wulenebi mana bayale bulenebi mo mbiraore nahayagua Ngode Datagaliwabehondo mini mbiraore wulene degego homene ale ka.✡Ya 2.17
✡2:1: Man 1.17, Min 24.23, Md 22.16, Ab 10.34, Ya 2.9
✡2:5: Md 5.3, Yo 7.48, 1 Ko 1.26-28, 1 Ti 6.18, 2 Ti 4.8
✡2:6: Ab 13.50, 18.12, 1 Ko 11.22, Ya 5.6
✡2:8: LBM 19.18, Md 19.19, 22.39, Lm 13.8-9, Ga 5.14
✡2:10: Man 27.26, Md 5.19, Ga 3.10
✡2:11: Har 20.13-14, Man 5.17-18, Lm 13.9
✡2:12: Ga 6.2, Ya 1.25-26, 1 Pi 2.16
✡2:13: Min 21.13, Md 5.7, 18.32-35, 25.41-42, 1 Yo 4.17-19
✡2:15: Yob 31.19-20, Lg 3.11, 1 Yo 3.17
✡2:19: Md 8.29, Lg 4.34, Ab 16.17
✡2:23: Pig 15.6, 2 Bit 20.7, Ais 41.8, Lm 4.3, 4.9, 4.22, Ga 3.6