1 Korindi
Polohanda Keriso hameigini Korindini hearuhondo beba mbira ogo gilibu wia hene.
Mbuga ogoha gilibu ngarunaga nemandi ogo
Polohanda Keriso hameigini Korindini hearuhondo beba mbira ogo gili binigo irane Keriso hameigini Korindini hearunaga genda dewa nga layago hale howa ibugua, Agua bilimu, lalu gilibu wia hene. Polo heneyangi Korindi tano dunini timbuniore winigoria wali agali ko bayalebi ta nabi dindi tara taraha howa ngoai haga wini. Korindi tanoni biyinaya bulenebi mamali mana ilili bulenebi dama tara tarahondo bi pupu wulenebi uruni ale gibiore bu yanga lenegome Korindi tano mini lene wini.
Polo ibugua beba ogo gilibu pelenego irane Keriso hameigini tini degeme hoba migimigi bu halu wali agali kayu bialu uruni ale bialu hearu mo tiga bulene nga manda buwa gilibu wia hene. Ani buwa Polohanda Keriso hameiginirume bulene nabulenerunaga lalubi Ngode Datagaliwabe Dinini ibugua mugube taratara ta haganerunaga lalubi homeneru Yasu dai birangi heyulenenaga lalubi uruni mitangi bialu beba ogoni gilibu wia hene.
Be 13 howa gubalini holenego mugube maru ale ndo gubalini holene dunini timbuniore lo nga.
Bu̱lu̱ baga buwa kuni gilibu ngago
1.1-9
Gili binigonaga irane lo nga 1.10–4.21
Keriso hameigini tini degeme hoba migimigi bu henego 5.1–7.40
Wali agali kayu nabi holenenagabi dabu bulenenagabi nga 8.1–11.1
Keriso hameigini karubi Keriso hameigini ndo karubi nga 11.2–14.40
Keriso hameiginirume bialu holenenaga nga 15.1-58
Keriso homayagola Ngode Datagaliwabehanda mo heya henedagua wali agali mini mbiraorewi homeneru tibi mo heya holebira lenegonaga nga 16.1-4
Keriso hameigini Yudiani buru pale hearu mbirale wia henego 16.5-24
Lamaro bialu lenego
1
1 I̱ Polo. I̱ Keriso Yasunaga abosolo holiya Ngode Datagaliwabe ibuni hame leagome i̱ olene kogoni. I̱bi inanaga hamene Sosodenisibi iyame beba ogo tíhondo gilibu wia haraba.
2 Keriso hameigini Korindini kamiru bibahende Ngode Datagaliwabenaga loma bia hene halimulo ibugua tí olayaru Keriso Yasuha ho gimbu bu howa Ngode Datagaliwabenaga kami. Tíbi wali agali dindi bibahendeni karubi inabi ina bibahendenaga Anduane Homogo Yasu Kerisonaga mini olalu karume tí bibahendehondo✡Ab 9.14, 18.1, 18.17, Lm 1.7, 10.12, 1 Ko 6.11, 2 Ti 1.9 3 inanaga Aba Ngode Datagaliwabebi Anduane Homogo Yasu Kerisobi libugua biamogo bia holenebi mo palia holenebi ngilo hamelo ko.✡Lm 1.7, 2 Ko 1.2
Mo turu hagane Kerisoha ngaru ogo
4 Ngode Datagaliwabehanda Keriso Yasuha howa ibunaga biamogo bia holene tíhondo ngiyagonaga i̱na tí mitangi bialu i̱naga Ngode Datagaliwabehondo ka̱i̱ laabo halu ko. 5 Ani buwa tí Kerisoha ho gimbu bu howa mbirale bibahende karulapeore yu kami. Bi lolene bibahendebi manda bulene bibahendebi heba karulapeore yu kami.✡1 Ko 2.1-2, 12.8, 2 Ko 8.7, 2 Ti 1.8, Mo 1.2 6 Kerisohanda biyago lamulene mana tígua hongo howa yu tiga bialu 7 Anduane Homogo Yasu Keriso lone ha pani helo hondo kami tambu turu holene mbira nayi ndo bibahendeore yu hai ho kami.✡Lg 17.30, Pb 3.20, 2 Te 1.7, Ta 2.13, 2 Pi 3.12 8 Anduane Homogo Yasu Kerisonaga Horo haragola tí mbiralime ko birimi nalelo ibugua tí hongo haabo halimulo haru halu hamaro bulebira.✡Pb 1.6, Kl 1.22, 1 Te 3.13, 5.23 9 Ngode Datagaliwabehanda ibu Igini inanaga Anduane Homogo Yasu Keriso heba tí mo mbiraore howa halimulo olayago Ngode Datagaliwabe ogoni ibu mini bilinaheore kagoni.✡Ais 49.7, Yo 17.21, 1 Ko 10.13, 1 Te 5.24, 1 Yo 1.3
Keriso hameigini biaru ti talebu baga binigo ogo
10 I̱naga hamene mbaliniru-o Anduane Homogo Yasu Kerisonaga hongoni howa i̱na tí bibahendehondo bilimulo hame ledogo ogo. Tí talebu baga nabilimu. Tí bibahendeme bi laramigo mini mbiraore howa bi lolene nga. Mitangi bulenebi hame lolenebi mo mbiraore haiore howa holene nga.✡Lm 12.16, 2 Ko 13.11, Pb 2.2, 3.16, 1 Pi 3.8 11 Kalowi ibunaga damene marume, Tí lai lagalaga bialu kami, lalu i̱hondo bayuwaore langiai haya. 12 Ani langiyadagua langero. Tí hangu hangu howa bi tara tara lalu kami laya. Mbirame lalu, I̱ Polo aria kogoni, larimiya. Mendeme lalu, I̱ Aboloso aria kogoni, larimiya. Teboneme, I̱ Pida aria kogoni, larimiya. Maneme lalu, I̱ Keriso aria kogoni, larimiya lalu langiya.✡Yo 1.42, Ab 18.24-28, 19.1, 1 Ko 3.4 13 Keriso ibu dewa talebu baga bu kabe. Polohanda ira bangani ba para howa tínaga homa henebe. Tí Polonaga talima piaga howa baboraya birimibe.
14 I̱na tí baboraya nabi Karisabasa Gaiasala dege baboraya birugonaga Ngode Datagaliwabehondo turu haro.✡Ab 18.8, 19.29, Lm 16.23 15 Anigo tí mbiralime Polonaga talima piaga howa baboraya bini lolene nawi. 16 O mbira embeda harudago Sebanasabi ibu damenebi ti haru i̱na baboraya biru. Ani birugo maru baboraya birube be nabibe mitangi nabi ko.✡1 Ko 16.15 17 Kerisohanda i̱hondo, Baboraya bule í̠ pu, lene ndo. Ibugua, Ngode Datagaliwabe Bi Mana Debene lamima pobe, lene. Ani lowa Keriso ira bangani howa homa henegonaga hongo yu waholilono ibugua, Mini gigabiwi karume laralidagua ndo lalu Bi Mana Debene lamima pobe, lene.✡Md 28.19, Yo 4.2, 1 Ko 2.1, 2.4, 2.13, 2 Pi 1.16
Ngode Datagaliwabenaga hongo holenebi mini gigabi wulenebi Kerisoha ngago ogo
18 Keriso ira bangani howa homa henegonaga mana hale howa hariga koha pialu karume mana ogoni lulu mana ale manda biaga. Anigo ina Ngode Datagaliwabenaga pele mulene yu kamarunaga mana ogoniha Ngode Datagaliwabenaga hongo holene nga.✡Ab 17.18, Lm 1.16, 1 Ko 2.14, 15.2, 2 Ko 4.3 19 Anigo Anduane Homogonaga mbugani bi lo ngago ogo,
Mini gigabiwi karunaga mini gigabi wulene i̱na mo waholebero.
Mana manda timbunibi karunaga manda bulene i̱na mo emene holebero,
lalu gilibu nga.✡Ais 29.14, Yar 8.9 20 Anigo wali agali mini gigabiwi karu mitangi bialu galone agi manda bibehebe. Mana manda timbunibi karu dindi bibahendenaga bime wai biaga karubi ti mitangi bialu galone agi manda bibehe kamabe. Dindinaga mini gigabiwi holene galone ndo mini nawi ale ngago lalu Ngode Datagaliwabehanda walia kagoni.✡Yob 12.17, Ais 19.12, 33.18, 44.25, Md 11.25, Lg 10.21, Lm 1.20-21, 1.28
21 Ngode Datagaliwabehanda ibunaga mini gigabiwiore howa wali agali tininaga mini gigabi wuleneme ibuni manda nabibehe helo wini. Ani winigo irane iname lulu mana ale lameramaligome Yasu Kerisohondo mini mbiraorewi karu Ngode Datagaliwabehanda ti pele mule manda bini.✡Md 11.25, Lg 10.21, Lm 1.20-21, 1.28 22 Yu wali agalime lalu, Agalime nabiagane ale walia ha, laga. Girigi wali agalime mini gigabi wulene hai biaga.✡Md 12.38, Mg 8.11, Yo 4.48, Ab 17.18, 17.32 23 Anigo iname mana lamialu howa, Keriso ira bangani homa henego, lameramali. Mana ogoni hale howa Yu wali agalime irane mitangi nabiaga ka. Girigi wali agalime hale howa galone ndo lulu mana aleda laga ka.✡Ais 8.14, Md 11.6, Yo 6.60, 6.66, Lm 9.32, 1 Ko 2.14, Ga 5.11 24 Ngode Datagaliwabehanda Yu wali agalibi wali agali tara tarabi olo heleneru tigua mana ogoni hale howa Keriso ibu Ngode Datagaliwabenaga hongo holenebi ibunaga mini gigabi wulenebi mana ogoniha nga ti manda biaga.✡Lm 1.4, 1.16, 1 Ko 1.18, Kl 2.3 25 Tígua Ngode Datagaliwabe ibu mini nawi ale ka mitangi beramilibe. Mini nawi ale ka mitangi birimiyagua ogoni wali agalinaga mini gigabi wiaga ale ndo ibu mini gigabiorewi ka. Ngode Datagaliwabe ibu hongo nahe ka mitangi beramilibe. Hongo nahe ka mitangi birimiyagua ogoni wali agalinaga hongo ale ndo ibu hongo gibiorehe ka.✡2 Ko 13.4
26 Ogonigo hamene mbaliniru-o Ngode Datagaliwabehanda tí Kerisonaga halimulo olayangi tí abi harimibe mitangi bilimu. Dindialirume mitangi biagadagua tí mini gigabiwibi hongohebi mini lenebi dewa nahe mbira mbira hangu harimigoni.✡Md 11.25, Yo 7.48, Ya 2.1-5 27 Dindiali karume maru mini nawi ale ka laganego wali agali urunibi karu Ngode Datagaliwabehanda mini gigabiwi karu taga helonaga ti dabo helene. Dindiali karume maru hongo nahe ka laganego wali agali urunibi karu Ngode Datagaliwabehanda hongohe karu taga helonaga ti dabo helene.✡Md 11.25, Ya 2.5 28 Dindiali karume lalu, Wali agali maru ko mini nawi nakarulape habane nabulenebi ka, lagaru wali agali urunibi Ngode Datagaliwabehanda dabo helene. Ani binigo irane dindialime galonedalo mitangi biaganego tini galone ndodane hendelo ani bini. 29 Ani binigo wali agali bibahendeoreme Ngode Datagaliwabe deni howa mbiralime mine holene henge nawiore.✡Lm 3.27, Eb 2.9 30 Ngode Datagaliwabe ibunime tí Keriso Yasuha ho gimbu bu howa ibugua inanaga mini gigabi wulene tene Keriso ibu helo hela hene. Keriso Yasu minini howa Ngode Datagaliwabehanda inahondo, Tí mini tigabiwi kami, lene. Kerisohanda ina mo Ngode Datagaliwabenaga wali agali hela halu ina golope hene kama.✡Yar 23.5-6, Yo 17.19, 2 Ko 5.21 31 Ani binigo Anduane Homogonaga mbugani lo ngadagua ogo, Mbiralime mbiralinaga mini mo yaraga hoa kayagua Anduane Homogohanda biyago mitangi bialu ibunaga mini hangu mo yaraga holene nga, lalu gilibu nga.✡Yar 9.23-24, 2 Ko 10.17
✡1:2: Ab 9.14, 18.1, 18.17, Lm 1.7, 10.12, 1 Ko 6.11, 2 Ti 1.9
✡1:5: 1 Ko 2.1-2, 12.8, 2 Ko 8.7, 2 Ti 1.8, Mo 1.2
✡1:7: Lg 17.30, Pb 3.20, 2 Te 1.7, Ta 2.13, 2 Pi 3.12
✡1:8: Pb 1.6, Kl 1.22, 1 Te 3.13, 5.23
✡1:9: Ais 49.7, Yo 17.21, 1 Ko 10.13, 1 Te 5.24, 1 Yo 1.3
✡1:10: Lm 12.16, 2 Ko 13.11, Pb 2.2, 3.16, 1 Pi 3.8
✡1:12: Yo 1.42, Ab 18.24-28, 19.1, 1 Ko 3.4
✡1:14: Ab 18.8, 19.29, Lm 16.23
✡1:17: Md 28.19, Yo 4.2, 1 Ko 2.1, 2.4, 2.13, 2 Pi 1.16
✡1:18: Ab 17.18, Lm 1.16, 1 Ko 2.14, 15.2, 2 Ko 4.3
✡1:20: Yob 12.17, Ais 19.12, 33.18, 44.25, Md 11.25, Lg 10.21, Lm 1.20-21, 1.28
✡1:21: Md 11.25, Lg 10.21, Lm 1.20-21, 1.28
✡1:22: Md 12.38, Mg 8.11, Yo 4.48, Ab 17.18, 17.32
✡1:23: Ais 8.14, Md 11.6, Yo 6.60, 6.66, Lm 9.32, 1 Ko 2.14, Ga 5.11
✡1:24: Lm 1.4, 1.16, 1 Ko 1.18, Kl 2.3
✡1:26: Md 11.25, Yo 7.48, Ya 2.1-5
✡1:30: Yar 23.5-6, Yo 17.19, 2 Ko 5.21
✡1:31: Yar 9.23-24, 2 Ko 10.17