1 I̱ hamene mbaliniru-o ina mamalime Mosese talima peneru tigua binigo te ogoni tígua mitangi bilimulo hamelo kogoni. Beralibame ti bibahende haru penegobi iba solowara mini Iba Daramabi bereagoha bayuwa haru penegobi mitangi bilimu.✡Har 13.21-22, 14.22-29, Dag 9.18, Neh 9.12, Iba 78.13 2 Ti bibahende beralibahabi iba solowarahabi Mosesenaga talima piaga howa baboraya ale bialu pene. 3 Ti bibahendeme tomo mbiraore Ngode Datagaliwabe Dinini ibugua minigo ogoni dege nalu✡Har 16.35, Neh 9.15, 9.20, Iba 78.24 4 ibabi mbiraore ibugua minigo ogoni dege nalu hene. Ngode Datagaliwabe Dinininaga ege to̱le̱ ti heba penego iba ogoniha howa minigo tigua nalu hene. Ege to̱le̱ ogoni Keriso ibuni henego ka.✡Iba 78.15 5 Ani bialu howa Ngode Datagaliwabehanda wali agali dewalime mana nakarulape bialu heago hondowa turu nahe howa tinaga tingini dindi ko yobi homo paya paya bu wilene.✡Dag 14.16, 14.29-30, Iba 106.26, Hi 3.17, Yu 5

6-7 O binidaruni bibahende iname manda buwa holoma̱yanaga bini. Iname wali agali uruni tigua mini ko tara wialu dimagoli hayadaguabi marume mbirale gime wabiniruhondo bi pupu wiyadaguabi mbira bulemini nabimi̱yanaga bini. Anduane Homogonaga mbugani ledadagua ogo, Wali agalirume biru ibira howa tomo ibabi nalu heyuwa dawe halu wali agali kayu bigibigi bialu hene, lalu gilibu nga.✡Dag 11.4, 11.34, Iba 106.14, 1 Ko 10.11✡Har 32.6, 1 Ko 10.14 8 Iname wali agali kayu nabimi̱ya. Ti marume ani bialu hearia horo mbirani hangu wali agali daosini dege pira kirani tebira (23,000) homai helene.✡Dag 25.1-18, Iba 106.29, Mo 2.14 9 Anduane Homogohanda inahondo agi birabe hondolenaga iname ko bulene nawi. Ti marume ani bialu hearia puyame hayalu homelai hene.✡Har 17.2, 17.7, Dag 21.5-6, Man 6.16 10 Iname Ngode Datagaliwabe la hirulene nawiore. Ti marume Ngode Datagaliwabe la hiralu hearia Mo Homa Hagane Dahuliyalime ti bo paya bini.✡Har 16.2, Dag 14.2, 14.29, 14.37, 16.41-49, 1 Bit 21.15, Hi 3.11, 3.17

11 Tihondo ani binigo te ogoni ina horo hamaro bulene tu kawareha kamarume nabuluma̱yanaga Anduane Homogonaga mbugani gilibu winigo nga.✡Lm 15.4, 1 Ko 10.6, Pb 4.5, Hi 10.25, 10.37, 1 Pi 4.7, 1 Yo 2.18

12 Mbiralime ibu hongohe ko lo manda bu kago ibuni piloligo de hondo holene nga. 13 Ko mo bia holene bibahende tí kamiria ibiragoni wali agali bibahende ti karia ogonibi dege ibaga. Anigo Ngode Datagaliwabe ibu buleore lowinigo biaga kago ibugua lalu, Ko ngagome í̠ ko mo bia hole ngagola ko nabibelo i̱na í̠ biamogo bulebero, leda. Ani bialu ibida polene hariga walia holebira.✡Yar 29.11, 1 Ko 1.9, 2 Pi 2.9

14 Anigo i̱naga nenege turubiruore-o mbirale gime wabiniruhondo bi pupu wiaga ngagoria ha para nahalimu.✡2 Ko 6.17, 1 Yo 5.21 15 Tí wali agali miniwi kamigo manda buwa i̱na tíhondo bi langerogo tíni dabalimu. 16 Iba be Ngode Datagaliwabehondo turu halu ka̱i̱ laramaligo ina iba be ogoniha howa naramangi Kerisonaga daramaha howa ina Keriso heba mo mbiraore haramali ndobe. Mberedibi gaibu baga beramaligo naramangi Kerisonaga tinginiha howa ina mo mbiraore haramali ndobe.✡Md 26.26-28, Mg 14.22-24, Lg 22.19-20, Ab 2.42, 2.46 17 Mberedi homane mbiraore hangugo ina dewali howa mberedi homane mbiraore ogoniha naramaligo inabi dewali howa homane mbiraore kama.✡Lm 12.5, 1 Ko 12.27, Eb 4.16

18 Isaraele wali agali tigua biaganego mitangi bilimu. Mbirale mbira mbira Ngode Datagaliwabehondo loma bialu bo minigo nagarume tigua bo lomabu mulene dabunaga mana biagadagua bialu Ngode Datagaliwabe heba mini mbiraore ho haga ndobe.✡LBM 7.6, 7.15 19 I̱na larogoni ogo ale laralo manda bilimu. Mbirale bi pupu wule gime wabini ogoni galonebe be mbirale ogonihondo bo mulenego galonebe laro.✡1 Ko 8.4 20 Ani ndoore laro. Bi larogoni irane ogo. Ngode Datagaliwabe mitangi nabiaga karume bo lomabu mulene dabuni mbirale mbira bo miraru Ngode Datagaliwabehondo ndo damahondo bo miaga. Anigo tí kamiru damala mo mbiraore halimulo i̱ hame nale ko.✡Man 32.17, Iba 106.37, Mo 9.20 21 Tígua Anduane Homogonaga iba beha howabi damanaga iba beha howabi kirabaliha howa nabe nahe kami. Anduane Homogonaga dagiani howabi damanaga dagiani howabi kirabalinaga tomo ngago nabe nahe kami.✡Man 32.38, 2 Ko 6.15-16 22 Anduane Homogohanda inahondo keba helo iname mo keba hoa kamabe. Ibu hongohe kagobi ndo ina hongo timbuniorehe kamalo manda bu kamabe.✡Man 32.21, Ese 22.14

23 Marume lalu, Iname ta nabi bulene ngaru biai habehe kamagoni, laga. E̱ ani bibehego bulene bibahende ngaru bayale hangu ndo nga. Tígua, Iname ta nabi bulene ngaru biai habehe kama, laramiligo nde bulene bibahende ngarunime ina biamogo biai haga ndo nga.✡1 Ko 6.12 24 Mbiralime ibuni hangu bayale hole mitangi bulene nawi wali agali maru bayale helo bule mitangi bulene nga.✡Lm 15.1-2, 1 Ko 13.5, Pb 2.4, 2.21

25 Nogo mbirini magedini minigo nalu howa í̠ miniha damahondo bo minidalo manda nabi hariyagua ani tawebe nale howa nolene nga. 26 Anigo Anduane Homogonaga mbugani lo ngadagua ogo, Dindibi dindini ngaru bibahendebi Anduane Homogo ibunaga nga, lalu gilibu nga.✡Har 19.5, Man 10.14, Iba 24.1

27 Mbirali Ngode Datagaliwabehondo mini mbiraore nawi kagome í̠hondo lalu, I̱ andaga tomo nabiya ibabe, layagua pole manda biriyagua ibugua tomo ngiragola í̠ miniha damahondo bo minidalo manda nabi howa ani tawebe nale nolene nga.✡Lg 10.8 28-29 Ani bialu keria mbiralime lalu, Tomo ogoni mbirale bi pupu wule gime wabinigohondo mininaga nga, langiyagua nanabe. Ogoni nane waharegoni í̠ miniha damahondo bo minidalo manda birigome ndo agali biago ibugua manda buwa langiyagome ibubi ibu miniha manda biyagonagabi nane wahabe.

Ani biagago mbiralime lalu, Agali mende ibunaga miniha mitangi biragome i̱na bua harogo mo hangai haganego irane agibe.✡1 Ko 8.7✡Lm 14.16 30 I̱na Ngode Datagaliwabehondo tomo ngiragonaga turu halu ka̱i̱ laruyagua tomo o ngiyagonaga ka̱i̱ larugo mendealime, Nakarulape bialu ka, lalu i̱ gurayagua irane agibe.✡Lm 14.6, 1 Ti 4.3-4

31 Ani lolebirago tígua bulenegobi tomo nolenegobi iba nolenegobi ta nabi bibahende beramigo bialu howa Ngode Datagaliwabenaga mini yaraga hole hangu mitangi bialu bilimu.✡Kl 3.17, 1 Pi 4.11 32 Tígua Yu wali agali karubi Yu wali agali ndo tara tara karubi Keriso hameigini karubi ti bibahende mo pila nahe bayuwa bialu halimu.✡Lm 14.13, 1 Ko 8.13, 2 Ko 6.3, 1 Ti 3.5 33 I̱na birulidagua tíguabi bialu halimu. I̱na bibahende biruligo bialu howa wali agali ta nabi biamogo bulene nga mitangi bialu biruli. I̱ninaga holene bayale helo mitangi bialu ndo tinaga holene bayale helo mitangi bialu tigua Ngode Datagaliwabenaga pele mulene yu helonaga biruli.✡Lm 15.2, 1 Ko 9.20-22, 10.24