4
Mana bulene ngaru ogo
1 I̱ hamene mbaliniru-o i̱na tí gubalini halu de hondole lalu ko. Tígua i̱ mo turu haramiligonagabi i̱na biabe birugonaga lini tí kamigo hondowabi i̱naga mini yanga ledagola ko. Ani bidago i̱naga nenege turubiru-o tí Kerisoha howa ema nabi mini bilina ho halimu.✡1 Te 2.19-20
2 Yuodia Sindigila libuhondo bi mbira loa kogo ogo. Libu Keriso hamewane biruwa mini mbiraore nahe bedabigo mini mbiraore ho biralibu laro. 3 I̱ hamene heneneore kego í̠na wali ogoni labo biamogo bia habe. Bi mana debenenaga biabe buliya libugua i̱ biamogo bia haya. Libugua biyadagua Kelemendi ibuguabi maru kamirumebi ina haru biabe mandagi birimagoni. Tinaga mini Ngode Datagaliwabenaga mbugani haabobo holene yu kamarunaga mini bilibu ngagoria bilibu ngagoni.✡Iba 69.28, Lg 10.20, Mo 3.5, 20.12
4 Tí Kerisoha ho gimbu bu kamigonaga turu haabo holene nga. Lone loyane berogo turuore ho halimu.✡Lm 12.12, Pb 3.1, 1 Te 5.16, 1 Pi 4.13
5 Wali agali bibahende karume ti mini baya gibiwi gedaore kamigo manda bilo mini baya gibi wuwa halimu. Anduane Homogo dai bulene tu kaware ngagoni.✡Hi 10.25, 10.37, Ya 5.8-9, 1 Pi 4.7, 2 Pi 3.8 6 Tí mini burugu lo nahe howa mbirale nayi kamiru Ngode Datagaliwabehanda ngilo bi lamiaabo halimu. Ibuhondo ngi lalu howa gubaliniore howa ka̱i̱ lalu ngi lalimu.✡Min 16.3, Md 6.25-34, Lg 12.22-31, Kl 4.2, 1 Pi 5.7 7 Ani larimiyagua tí Keriso Yasuha ho gimbu bu kamigo Ngode Datagaliwabenaga mo palia holene dindi agalinaga manda buleneme mitangi nabibehe ngago ogonime tínaga gubalinibi minibi haru holebira.✡Ais 26.3, Yo 14.27, Lm 5.1, Kl 3.15
8 Bi ogo lamaro bialu laro. Hamene mbaliniru tínaga miniha bayale bulenebi mana bayalenaga mini yaraga holenebi henene lolenebi mini daliga wulenebi mini tigabi holenebi mini gahenge holenebi bayale holenebi mini lene holenebi urunibime tínaga miniha to̱lai helo halimu.✡Lm 12.17 9 I̱na bi larugobi mana birugobi handalu mo yu harimigodagua bu manda bialu halimu. Ani birimiyagua mo palia holene ngiagane Ngode Datagaliwabe kago ibu tí heba holebira.✡Lm 16.20, 1 Ko 14.33, Pb 3.17, 1 Te 5.23, Hi 13.20
Tigua i̱hondo ngirimigonaga ka̱i̱ laro, lenego ogo
10 Bambaore tígua i̱ mitangi bialu biamogo birimidagua áyubi lone mitangi bialu biamogo bulene wiaria handa walia harimigonaga i̱ Anduane Homogoha howa turu ho kogoni. Tígua i̱ mitangi nabi harimi ndo mitangi biaabo howa biamogo bulene henge dege handa walia nahe harimi manda bido. 11 Ani birimigola i̱ buru pale harugo lalu ndo larogoni. I̱ni yidogoniore yuwa holenego karulapeoreyane handa walia kogoni.✡1 Ti 6.6-8 12 I̱ nayi buru pale howabi dewa yu howabi mini bilina ho kogoni. Mbira hangu ogodagua bulene wiaria handa walia haru. Mbiraha piruyaguabi haruyaguabi tomo karulape nowa haruyaguabi nane haruyaguabi emene yu haruyaguabi timbuni yu haruyaguabi i̱ turu haabo ho kogoni.✡1 Ko 4.11, 2 Ko 6.10, 11.27 13 Keriso ibugua i̱hondo hongo ngiragome i̱na bibahende bulenego hongo karulape ho ko.✡Yo 15.5, 2 Ko 12.9-10, 2 Ti 4.17
14 Tígua nde i̱ genda dewa yu hewago hondowa biamogo birimigo bayaleore birimigoni. 15 Ala i̱na Masedonia dindi wahalu Bi Mana Debene pigane lamima pialu hewaria biabe ogoni i̱na buliyanaga Keriso hameigini Pilibai tanoni kamiru tí degeme i̱ biamogo bialu muni ngirimigoni.✡2 Ko 11.9 16 I̱ Tesalonaiga hewariabi i̱ biamogo bialu harimigo halu mbira hangu ndo halu kibi biamogo birimigoni.✡Ab 17.1 17 Tígua i̱hondo mbirale ngilimulo hame lowa hangu ndo tínaga yu kamiru Ngode Datagaliwabehanda maru ngia tago helonaga hamelo ko. 18 Tígua i̱naga wia harimiyago mirugonaga laro. O biaruni dewaoreya maru ibira holene yu ko. Tígua Ebaborodaidasa ibuhondo i̱naga mbirale wia harimiyaru bibahende yalu ibalu ngiyago dewaore bolangua howa ngirimiya. Mbirale ngabi bayaleore Ngode Datagaliwabehondo miragola hondowa Ngode Datagaliwabehanda turu hagago ale tígua i̱ ngirimigoni.✡Har 29.18, Ese 20.41, 2 Ko 9.12, Eb 5.2, Pb 2.25, Hi 13.16 19 I̱naga Ngode Datagaliwabe kago ibugua ibunaga mbirale dewa baya gibi Keriso Yasuha ngaru tíhondo ngulene ngago karulapeore ngulebira.✡Iba 23.1, 2 Ko 9.8, Eb 1.7 20 Ngode Datagaliwabe ibu inanaga Aba kago ibunaga mini mo yaraga holene wiaaboboore bilo hamelo ko. Aniore bilo laro.✡Lm 16.27, Ga 1.5
Lamaro bialu bi lenego ogo
21 Ngode Datagaliwabenaga wali agali Keriso Yasuha ho gimbu bu kamiru hangu hanguhondo mitangi bu ko lalu lawia haro. Keriso hameigini i̱ heba karu tiguabi, Tí mitangi bu kama, lalu lawia hara. 22 Ngode Datagaliwabenaga wali agali maru ogoria karubi maru Lomonaga Kini andagaha karubi bibahendeme, Tí mitangi timbuni ho kama, lalu lawia hara.✡Pb 1.13
23 Anduane Homogo Yasu Kerisonaga biamogo bia holene tí bibahende kamigoha wiaabo helo hamelo ko.
✡4:3: Iba 69.28, Lg 10.20, Mo 3.5, 20.12
✡4:4: Lm 12.12, Pb 3.1, 1 Te 5.16, 1 Pi 4.13
✡4:5: Hi 10.25, 10.37, Ya 5.8-9, 1 Pi 4.7, 2 Pi 3.8
✡4:6: Min 16.3, Md 6.25-34, Lg 12.22-31, Kl 4.2, 1 Pi 5.7
✡4:7: Ais 26.3, Yo 14.27, Lm 5.1, Kl 3.15
✡4:9: Lm 16.20, 1 Ko 14.33, Pb 3.17, 1 Te 5.23, Hi 13.20
✡4:12: 1 Ko 4.11, 2 Ko 6.10, 11.27
✡4:13: Yo 15.5, 2 Ko 12.9-10, 2 Ti 4.17
✡4:18: Har 29.18, Ese 20.41, 2 Ko 9.12, Eb 5.2, Pb 2.25, Hi 13.16
✡4:19: Iba 23.1, 2 Ko 9.8, Eb 1.7