69
Mbiralime Ngode Datagaliwabehondo biamogo bia lalu bi lenego ogo
1 Ngode Datagaliwabe-o i̱ gi mibe.✡Iba 69.2, 69.14-15, Yna 2.5
Iba birama irayagola ai ibame namu lelo ma paho kogonigo gi mibe.
2 Waru lumburani hewaria unura waruha yalu anda porane kogoni.✡Iba 40.2
Ge hade holene dindi giambe mbira nawida.
Iba uli bereagoha ge hape halu ko.
Ani bialu koria iba yaribu bu yu ibalu i̱ bu dambi haragola
iba nalu homole kogoni.
3 Ai homaore biruda handala Ngode Datagaliwabe-o
í̠na i̱ biamogo bibelonaga i̱na í̠ o dege lalu hewane ai i̱naga kembobe pu kagoni.
Í̠ eberebe hondole lowa
de handayaho wia dege biwane
ai i̱naga de tandaga bialu hongo bibahende pirilipe kagoni.
4 Wali agalime irane nawioreni i̱ bame handabe manga haga karu
ti dewaore daga labe nahe kagoni.
I̱naga haguaneni mandari li bu karuni goyane lowa
ti dewaore daga labe nahe kagoni.
I̱naga waitigi urunime tindule i̱na agua biya lalu ti bi degeme mo para halu kagoni.
Tigua hongo gibi howa i̱ bo waore hole manda bialu kagoni.
Ti bi degeme i̱ kayu nabini wiwago tindule, Í̠ kayu biri, lalu ka.
Ti bime mo para hayagola mbirale i̱naga wiwago irane nawini bameore ti mirugoni.
5 Ngode Datagaliwabe-o i̱na i̱ ko nabiaga kogoni lalu ndo laro.
I̱ ko biaga dege ha kogonigoyu nde i̱na ko biruruni mbira í̠ deni wia do hene nawi
tigatiga binigobi lapani hai harugoni ndobe.
I̱ mini nawi howa birurubi í̠ manda biai ho kegoni.
6 Anduane Homogo í̠ Hongo Haiheore howa Bibahende Haru Haame Ho Haga kegoni.
I̱na mana ko mbira berogome wali agali í̠ni hana ho karu taga helo mbira buligo
í̠naga gime i̱ yaniore habe.
Isaraele wali agalinaga Ngode Datagaliwabe í̠ kegonigo
i̱na mana ko berorume wali agali í̠ mitangi bialu lotu laga karu
taga halu de handa dindi hai helo i̱na mbira buligo
í̠na i̱ mamage habe.
7 I̱na í̠ talima ibalu kogonaga wali agalime i̱ lo guralu mege bialu i̱ mo taga halu kagoni.
8 I̱ninaga hameneorerume i̱ kogoni agali tara dindi tarali ka manda bidagola kogoni.
I̱ninaga aba ai̱ya hamene mbalinirume i̱ kogoni tiha howa tagira peneda ndo
agali tara mbira dindi kaundiali íbu kagoni ledaha kogoni.
9 Í̠naga anda bayale haabo helo i̱na hame timbuni lalu kogome✡Yo 2.17, Lm 15.3
i̱naga bu habaneha ira daradagua biragola haruli.
Wali agali karume í̠ mege bialu bi laga biragoni i̱ni laba halu kagoni.
10 Í̠naga deni i̱nime i̱ni mo dindiha halu tomo nane haruli.
Ani berogola wali agalime hondowa i̱ mege bialu lo guraga.
11 Dara howa duguanda howa aga biaganedagua bu kogola
tigua i̱ hondo oba halu lo guraga.
12 Ti hariga hariga mo mogobu kago howa i̱ kedalu dege lalu kagoni.
Lulu iba nowa tibaga lowa karumebi
ti ne harigaha howa iba gana ende haga bialu laga birago
i̱ lo guralu hangu laga biragoni.
13 Ti ani lo helowa i̱na Anduane Homogo í̠hondo bi lolebero.
Ani larogo hale halu Ngode Datagaliwabe-o í̠nime ogoangi ladai bule lo manda bidengi ladai bibe.
Í̠na hale halu ladai bulebeda lo manda bidogo irane
í̠na i̱ gubalini timbuniore ho kego manda bidogome.
Ani bialu í̠ ke̱ nahagaore kego manda buwa
heneneore i̱ pele ngulebereda lo manda bu kogoni.
14 Waru lumburani kogola ge namulai halu i̱ni waruha anda piai habehe bu hinarago
í̠na i̱ gi mibe.
I̱naga waitigirume i̱ bo waholigo
í̠na i̱ de hondo habe.
Iba uli ngagoha i̱ ibaha namulai holigo
í̠na i̱ de hondo habe.
15 Iba li timbuni ibiragome i̱ namu lalu hilu yalu poligo
í̠na i̱ de hondo habe.
Iba uli bedagoha i̱ namu lolani
í̠na i̱ de hondo habe.
Homalime i̱ mo mbedogo buligo í̠na i̱ de hondo habe laro.
16 Anduane Homogo í̠na i̱ horo bibahendengi gubalini haho wiaaboore haga kegome
i̱na bibe larogo hale halu ladai bibe.
Í̠naga gubalini haho wiaabo holene ogoni mana bayaore gibi ogoniya.
Í̠naga dara holene gibi ngegome i̱ handaya halu
i̱na bibe larogo hale halu ladai bibe.
17 Í̠naga biabe bia haga o kogo ko handala í̠ ha do nahabe.
I̱ genda timbuniore yu kogonigo
i̱na bi larogo hale halu áyu ogoni abale ladai bibe.
18 Áyu ogoni i̱ kogoria kaware ibalu i̱ gini mibe.
I̱naga waitigi karume ibalu i̱ yani nakaore
í̠na abale ibalu i̱ gini mibe.
19 Agali bu karume i̱ mege bialu lo guralu karu í̠ mandabide.
Tigua i̱ mo taga halu mo yo hondo wahalu ti ge waraha heledagoni í̠ de hendedegoni.
I̱naga waitigi bibahende karu í̠ de handaiore ho kegoni.
20 Tigua i̱ mege biyago mitangi bialu hewaria✡Yob 16.2, Iba 142.4, Ais 63.5
i̱naga miniha genda gibi halu i̱naga gubaliniore tumbudu bidagoni.
Hongo mbira hole ndo aiore hongo pirilipe haiho kogoni.
Ai i̱ darahe mbiraorebi nde holebira lo manda biwaria mbira naholeoreya.
I̱naga mini mo dungulo dai bulene bi lolene mbira holebirabe toba hewaria
mbiraoreorebi mbira naholeoreyane handaru.
21 I̱ tomo garibilo hewaria tomo kaubi tara mbira na lalu ngiya.✡Md 27.48, Mg 15.36, Lg 23.26, Yo 19.28-29
Iba noaho harugola waini iba ko kaubi na lalu hambu ngiya.
22 Ani biyago ti turu halu tomo timbuni dawa payabu nalu bedaria tini ogoningi homai nahara.✡Lm 11.9-10
Turu ogoriani hairi halu tomo loma bini ngaru narolo manda bidaria
bibahende homa hilai nahara.
23 Uruni bibahende arumaha luluyu helo ti bibahendenaga de mo ndibulai habe.
Ti bibahende ere pode ulahe helo
tinaga erene kuni mo gedaore haabo habe.
24 Í̠na tihondo keba timbuniore halu ti mini wilo mana halu mbira labe.
Í̠naga keba holeneme ti bo ereba hai helabe.
25 Ti balai anda karuha mbiraorebi mbira yu waheloleni.✡Ab 1.20
Bibahende bo mburi labe.
Balai andaru ti haradago bame dabulu ngelabe.
26 Agali maru ti ala ko biyagola í̠na ti pani mini hayaruni
ai agali ko biaga karume agali o biaruni lone áyu mo tandaga halu ka.
Ani bialu agali maru ala ko biyagola
í̠na ti pani mialu tinginini motudu wilarigo
agali biaruni áyu agali ko biaga karu tigua lone mege bialu mo tandaga halu ka.
27 Agali ko biaga uruni tigua ko biraru bibahende
í̠na baya hangu de hondo howa ilu wigi bibe.
Ko biaga uruni mbiraligo í̠naga waneigini pele miniyi karuhayagi anda ibulani.
28 Ko biaga uruni tinaga mini haabo holenenaga mbugani gilibu wulani domo wahabe.✡Har 32.32, Mo 3.5, 13.8, 17.8
Í̠naga wali agali mini tigabiwi karunaga mini gilibu ngegoria
ko biaga uruninaga miniore mbira mbuga ogoriani gilibu wulani.
29 Ai i̱ genda timbuniore yuwa tandaga nalu kogoni.
Ngode Datagaliwabe-o í̠na i̱ gini mialu lone mo heyu helabe.
30 I̱na iba gana mbira lalu Ngode Datagaliwabenaga mini mo yaraga holebero.
I̱na ibuhondo ka̱i̱ lalu ibu timbuni daligaore gibi ogobi ka lalu maru lamulebero.
31 Ogonidagua berogo hondowa Anduane Homogo ibu turuore holebira.
Nogo bulumaga dewaru bo lomabu merogo hondowa turu hagadagua ndo
ibugua turu timbuniore holebira.
Bulumaga wangabe habaheore timbunigo bo lomabu mialu delaruyaguabi hondowa
ibugua turu emene holebirago
o larogodaguaore biruyagua turu timbuniore holebira.
32 Wali agali gendayu karume ogonidagua berogo hondowa ti turu holebira.
Wali agali Ngode Datagaliwabe dunini kago mitangi bialu lotu laga karu
ti turu halu miniha elahe holebira.
33 Anduane Homogo ibugua wali agali mbirale buru pale karume
ibuhondo bi larago hale halu biamogo biaga ka.
Ibugua ibunaga waneigini garabaya andaha karubi embeda nahaga ka.
34 Hari daligabi dindibi iba solowarabi mbirale iba solowaraha bedarubi
tí bibahendeme Ngode Datagaliwabenaga mini mo yaraga hai halimu.
35 Ngode Datagaliwabehanda ibunaga Yarusaleme wali agali pele mialu
Yudanaga tano mo ko hene ngaru lone bia aribia holebiragonaga
tigua ibunaga mini mo yaraga holene nga.
Ibunaga wali agali ti turu halu tano odaruniha ho halu
dindi ogoni ti karulalu tinagaore holebira.
36 Ibunaga biabe biaga karunaga waneigini aguane mani hararume
dindi ogoni karulolebira.
Wali agali ibu gubalini heneneore haga karume
dindi ogoni karulowa haabo holebira.