4
Dindi mana ko ngaru hame lolene nawigo ogo
1 Tí lai lalu gungu bialu kamigo agiha howa tagira ibagabe. Tíni mini ko ngamigoha howa tagira ibaga ndobe.✡Lm 7.23, Ga 5.17, 1 Pi 2.11 2 Tígua mbirale ngago hame lowa henge lalu nayido agini homelo baramili. Marume mbirale yu karunaga henge lowa lai lalu gungu bialu kami. Anigo Ngode Datagaliwabehondo ngi nalarimigome nayi kamigoni. 3 Tígua ngi lalu howa mini ko wuwa tíni hangu mitangi bialu Ngode Datagaliwabehondo ngi larimigome nayi kamigoni.✡Iba 66.18, Ais 1.15, Mai 3.4, Seg 7.13, 1 Yo 3.22 4 Tí wali agali mini tigabiwi ndo mini kirawi kami. Dindi mana ko ngaru nenege hinalu kamiyagua Ngode Datagaliwabela waitigi tínime haru anda eberamigo nahende kamibe. Halu mende laro. Tí dindi mana ko ngaru nenege hinalu kamiyagua Ngode Datagaliwabela waitigi tínime haru anda eberamigoni.✡Yo 15.19, 17.14, Lm 8.7, Ga 1.10, 1 Yo 2.15 5 Anduane Homogonaga mbugani bi o lo ngago bame lo ngabe, Ngode Datagaliwabehanda dinini inanaga bu habaneha helayagome ina henge lalu hamelo ka, lalu gilibu nga.✡Pig 6.5, Har 20.3-5, Dag 11.29, Min 21.10 6 Anigo Ngode Datagaliwabehanda ina biamogo bulene nawi howa guaileore biamogo biahaga ka. Anduane Homogonaga mbugani bi lo ngago ogo, Mine haga karu Ngode Datagaliwabehanda ti he̱la dai biaga ka. Tini mo dindiha haga karu ibugua biamogo biaga, lalu gilibu nga.✡Iba 138.6, Min 3.34, Lg 14.11, 1 Pi 5.5
7 Anigo tígua Ngode Datagaliwabehanda bia laradagua bilimu. Tígua dama Heyolabehondo, Mangaba, larimiyagua ibugua tí wahalu ibida polebira.✡Eb 4.27, 6.11-12, 1 Pi 5.7 8 Ani buwa Ngode Datagaliwabe kagoria kaware hapara ho harimiyagua ibugua tí kamigoria kaware hapara ho holebira. Mana ko biaga kamigo wahai halimu. Tombene hondo kihe kamirume bu mini wále wu hole ko ngamigo wahai halimu.✡2 Bit 15.2, Ais 1.16, Seg 1.3, Mal 3.7, Ya 1.8, 1 Yo 3.3 9 Ko birimigo mitangi bialu dara halu dugu bilimu. Oba halu kamiru dugu bia aribia holene nga. Turu ho kamigo dara ho aribia holene nga. 10 Tígua Anduane Homogo deni howa tíni mo dindi halimu. Ani beramigola ibugua tí mo yaraga holebira.✡Yob 5.11, 22.29, Md 23.12, 1 Pi 5.6
Keriso hameigini maru karume birago daba ki bulene nawigo ogo
11 I̱ hamene mbaliniru-o tíni guraga guraga nabilimu. Mbiralime Keriso hameigini gurayaguabi ibugua birago daba ki biyaguabi ogonime Mosese heneyangi Mana lowini ngago guralu daba ki bialu ka. Mana lowini ngago daba ki birimiyagua tígua Mana lowini ngago hale halu biaga ndo tí daba ki biaga kami.✡Lg 6.37, Lm 2.1, Eb 4.31, 1 Pi 2.1 12 Ngode Datagaliwabe ibu mana lowini ngago tenebi daba ki biagabi ibu dege ka. Ibuni degeme holene ngiagabi holene yamiagabi ka. Tígua wali agali tale bialu dabaga agalime daba ki biagadagua beramigo tí ai kama manda bidamibe.✡Md 10.28, Lm 2.1, 14.4, 14.13
Mine holene nawigo ogo
13 Áyu yawibi i̱na dindi mbiraha puwa biyinaya bialu mali mbira hondo holebero, lalu kamiru tíhondo bi larogo hale hadaba.✡Lg 12.18-20✡Min 27.1 14 Yawi agi bialu holedabe tí manda nabi kami. Ginu ngago tígua de handaramigola abale ereba hagagobi tí kamigoni.✡Iba 39.5, 39.11, 102.3, Ya 1.10, 1 Pi 1.24 15 Tígua ogodagua labehe. I̱na ogobi mendebi bialu holiya Anduane Homogo ibugua hame ledayagua nde ani bialu holebero, laramine.✡Ab 18.21, 1 Ko 4.19, Hi 6.3 16 Ani ndo tínime mine halu kudaga bi lagimbu bialu kamigo ko berami. 17 Mbiralime bayale bulene mbira ngago manda buwa bia nabi hayagua nde ko bialu ka.✡Lg 12.47, Yo 9.41, 15.22, Lm 1.20-21, 2.17-18, 2.23
✡4:1: Lm 7.23, Ga 5.17, 1 Pi 2.11
✡4:3: Iba 66.18, Ais 1.15, Mai 3.4, Seg 7.13, 1 Yo 3.22
✡4:4: Yo 15.19, 17.14, Lm 8.7, Ga 1.10, 1 Yo 2.15
✡4:5: Pig 6.5, Har 20.3-5, Dag 11.29, Min 21.10
✡4:6: Iba 138.6, Min 3.34, Lg 14.11, 1 Pi 5.5
✡4:7: Eb 4.27, 6.11-12, 1 Pi 5.7
✡4:8: 2 Bit 15.2, Ais 1.16, Seg 1.3, Mal 3.7, Ya 1.8, 1 Yo 3.3
✡4:10: Yob 5.11, 22.29, Md 23.12, 1 Pi 5.6
✡4:11: Lg 6.37, Lm 2.1, Eb 4.31, 1 Pi 2.1
✡4:12: Md 10.28, Lm 2.1, 14.4, 14.13
✡4:14: Iba 39.5, 39.11, 102.3, Ya 1.10, 1 Pi 1.24
✡4:15: Ab 18.21, 1 Ko 4.19, Hi 6.3
✡4:17: Lg 12.47, Yo 9.41, 15.22, Lm 1.20-21, 2.17-18, 2.23