Segaraia
Mbuga ogoha gilibu ngarunaga nemandi ogo
Anduane Homogonaga bi mana latagi haga agali Segaraia ibu Hagaila biabe mbiraorego ale dege biaga hene. Ibunaga mini hongohe howa Yuda wali agalime Anduane Homogonaga anda biago lone biadai bialu wali agalime mana bayale tigabi ngaru hangu bialu haga helo hamelo hene.
Anduane Homogohanda ti bayale holene mo wia holebira lalu Segaraia ibugua latagi halu hene.
Be 1-8 ngagoha howa mbirale mani bulebirarunaga mbiwia halubi Anduane Homogonaga bi mana latagi halubi ibugua bamba Anduane Homogonaga bi mana latagi haga agali Esegiele Danielelame latagi hene ngagobi dege nga. Segaraia ibugua de gandeba tara tara handaga binigoha manane tara tara dewaore mo walia haga biniru latagi halu hene.
Be 9-14 ngagoha howa mani Anduane Homogohanda wali agali bibahendeme tininaga mana bialu hayadagua mo talebu ki holebiragonagabi agali mbira Anduane Homogohanda ibunaga biabe bialu helo ibilolebiragonagabi ibugua mbiwia halu latagi hene. Bi manane maru mbuga ogoha gilibu wini ngaru Yasuhanda dindini howa bialu hayaru ibugua ogodaguaore bulebira lalu lo bambaho ngelenego nga.
Bu̱lu̱ baga buwa kuni gilibu ngago (1.1–8.23)
Mo ko holenebi biamogo bulenebi mana ngago 9.1-8
Hameigini dewa dindi tara taraha Isaraele dindi kaware palima pedaruhondo pani mulene nga lenego 9.4–14.21
Pele Miaga Mbirali ibulebiragobi mo palia holene wulebiragobi mbiwia halu lenego
1
Anduane Homogohanda ibunaga wali agali ibuni karia dai bulene nga lenego ogo
Kini Dariusu ibu Pesia dindiha kini heane dege mali mbira howa mendegonaga ege halini Esr 4.24–5.1, 6.14 hayagola Anduane Homogohanda ibunaga mana latagi haga Segaraiahondo bi ogo lamini. Segaraia ibu Beregaia igini howa Ido aguane hene. Anduane Homogo Hongo Haiheore kago ibugua Segaraiahondo lalu, Bi ogo i̱naga wali agali bu karuhondo lamibe, lalu lamini. Ibugua lalu, I̱ Anduane Homogo kogoni howa i̱na tínaga mamaliruhondo keba timbuniore ho haru. Anigo áyu i̱na tíhondo ogodagua laro. I̱na tí mo wialu biamogo buliyanaga ibalu tígua i̱ni kogoha dai bilimu. Yar 25.5, Mai 7.19, Mal 3.7, Lg 15.20, Ya 4.8 Tínaga mamalirume bialu henedagua nabilimu. I̱naga bi mana latagi haga agali hearume i̱naga bi mana lamialu, Tígua mana ko bialu kamiruni wahai halimu, lalu langiya tiraga tígua i̱naga bi mana ogoni hale naharimi. Ai tínaga mamali uruni tini homai halu i̱naga bi mana latagi haga agali urunibi homai dege haya. Anigo ogoaleore bulebirago lalu i̱naga bi mana latagi haga agali uruni tigua mbiwia hayadaruni tínaga mamali heangi tagira piyane de handai haya. Tigua i̱naga bi mana larugo hale nahayagome tiniha mo ko holene wiai haya. Ani biyagola mani lone tinaga bu mini beregedo howa lalu, Anduane Homogo Hongo Haiheore kago ibugua bule lalu lo wiyadaguaore henene mo ko halu minu bai hayagoni irane inaneme hadowa ho hemaria biya, laya lene.
Anduane Homogonaga bi mana latagi haga agali heagome de gandebaha howa nogo hosi hendenego ogo
Kini Dariusu ibu kini heane mali mendegonaga ege beane (11) hayagola ogoninaga horo pira kirani maria (24) tinaga ege mini Sebada laga winigo ogoningi Anduane Homogo ibunaga bi i̱hondo langiya. Mbiraga de gandeba handalu hewaria Anduane Homogonaga dahuliyali mbira nogo hosi hone mbirani berearia handaru. Nogo hosi ogoni ibu dindi ulini panda panda wiagoha irabu dombeneha heagola nogo hosi maru ibunaga erembirahayagi bu hea. Hosi maru hone halu maru pagabua halu maru honeni pagabua bu ngibingabule hea. Ani bu heagoria dahuliyali maru hosi uruninaga erekunini birai hea. Mo 6.2-4 Ani bereagola i̱na dahuliyali haguane heagohondo hale halu lalu, I̱naga Anduane-o de gandeba áyu hendedogonaga hosi biaru irane agibe lalu hale haru.
Ani hale harugola ibugua lalu, De gandeba ogoninaga irane langerogo ogo. 10 Anduane Homogohanda uruni dindi bibahendeha de handama ibaga biai helo pelene, laya.
11 Ani layagola dahuliyali biarume Anduane Homogonaga dahuliyali mbira biagohondo lamialu lalu, Iname dindi bibahendeha piai harimago ai wali agali dindi tara taraha bu hearu de handaiore howa tiha genda mbira nawi bayale dege hai hearia handarima, lalu lamiya.
12 Anidagua layagola Anduane Homogonaga dahuliyali biagome lalu, Anduane Homogo Hongo Haiheore kego-o í̠na mali pira karia (70) bibahendeni wali agali Yarusalemeha karubi tano maru Yuda dindiha bu karubi ti bibahende baba keba haho wiaabo kego ainde ti lone dara howa biamogo angi buleberebe, laya.
13 Ani layagola Anduane Homogohanda dahuliyali biagonaga bu miniha mo paliaho helonaga bi bayale lamiya. 14 Ani lamiyagola dahuliyali biagome i̱hondo lalu, Anduane Homogo Hongo Haiheore kago ibugua bi layago í̠na latagi habe lalu langiai haya. Anduane Homogohanda lalu, I̱naga tano timbuni Yarusalemebi Hari Saionobi hondowa i̱na dara ho howa mini dege dindiho kogoni. 15 Ani kogonigo ai hameigini dindi tara taraha bu karume tiha genda nawi bayale kago i̱na dege tihondo keba timbuni ho kogoni. Abale i̱naga wali agaliruhondo keba emene dege ho hewagola hameigini dindi tara taraha karu tigua i̱naga wali agali uruni mo tandaga nde emene dege holene winigoria ibalu bibahende bo hilo wahai halu mo ko timbuniore haya. Anigo i̱na tihondo keba timbuni ho kogoni. 16 Anigo áyu i̱na Yarusaleme wali agali bu karu dara howa biamogo bulenaga daibu kogoni. I̱naga anda biago lone biadai bialu Yarusaleme tanobi lone mo tiga bialu arema bulebira laya, lene.
17 Ani lowa dahuliyali biagome i̱hondo bi mende langialu lalu, Anduane Homogo Hongo Haiheore kago ibugua lalu ibunaga tano ngaruha mbirale bayale damene ngago hangume mo to̱lai helarogola wali agali ti bayaleore holebira. Ani bialu Yarusaleme tano lone ibunaga tanoore ngelalu Yarusaleme wali agaliru tinaga bu miniha mo palia holene karulo howa ema nabi holebira laya, lene.
Segaraiahanda de gandebaha howa nogo bulumaganaga ne gayane ale hendenego ogo
18 Segaraia ibugua lalu, I̱na de gandeba mende handalu hewaria nogo bulumaganaga ne gayane ale maria hearia handaru. 19 Ani hondowa ai dahuliyali abale i̱la bi lalu haribago ibiyagola i̱na ibuhondo hale halu, Mbirale áyu hendedogoni irane agibe, laru.
Ani hale harugola ibugua ladai bialu lalu, Nogo bulumaganaga ne gayane ale maria uruni abale Yuda dindibi Isaraele dindibi Yarusalemebi bibahende mo ko halu bo gialahole biaga hongo maria biarunaga manane heleda, lalu langiya.
20 Ani layagola Anduane Homogohanda biabe biaga agali marialime hama timbuni yu hearu mo walia haya. 21 Ani yu hearu hondowa i̱na ibuhondo hale halu lalu, Agali uruni tigua biabe agi bule ibirabe, lalu hale haru. Ani hale harugola ibugua ladai bialu lalu, Agali uruni tigua dindi tara taraha bu karume Yuda wali agali mo ko howa bo wahai halu maru dindi tara taraha bo giligalalo purogo lelaga biaru mo gi howa mo durula halu tinaga hongo ngaru bo ereba hai helole ka laya, lene.

1:1: Esr 4.245.1, 6.14

1:3: Yar 25.5, Mai 7.19, Mal 3.7, Lg 15.20, Ya 4.8

1:8: Mo 6.2-4