1 Mbuga ala tawe ngagoha howa bi ogodagua leda. Agali Anduane Homogonaga bi mana latagi haga Yaremaiahanda wali agali garabaya hearuhondo ira dene hedo do hene lalu te ayu hale harimago dege lene nga. 2 Ani bialu bi mana lo wini ngago embeda nahalimu lalu ibugua lawai halu hene. Ani bialu tigua mbirale bi pupu wule bigiya gime wabini yari bayaleru ngolo silibarume mo yaribia howa ngeledago deme hondowa dimagoli holene nawi. Ani bialu bigiya urunime tinaga miniha mo luluya helo holene nawi. 3 Ani bialu ibugua bi hongo howaore tihondo lamialu bi mana lo wini ngagoore embeda holomini nahalimu lalu lamini.

4 Ani bialu mbuga ogoniha te maru ledagome Yaremaia ibu mini Ngode Datagaliwabeha howa ibini mo yu howa ibugua latagi halu lalu tigua Ngode Datagaliwabenaga balai anda kago gialo yalu Habo Nalolene Bi lo winigonaga Mbogoyi ngagobi mo yalu ibu talima ibalimu leneya. Ani puwa hari nene bamba Mosese ibu irigi howa dindi Ngode Datagaliwabehanda Isaraele tí ngulebero lene biago handa amu halu hendene biagoria irigi heneya. 5 Ai Yaremaia ibu hari nene biagoha irigi howa handalu hearia ege gundu mbira ona wiaria hendene. Hondowa ibugua balai anda gialo yayagobi Habo Nalolene Bi lo winigonaga Mbogoyi biagobi ira hagua nga bilo inisenesi lomabu delaga dabu gialo yaygobi bibahende egeanda ogoniha mo do howa ege to̱le̱ mbirame panga payadai biniya.

6 Mani howa agali maru Yaremaia heba mandagi haga hearume hariga penedadagua pialu tigua mbirale uruni taya binigoyu tigua handa walia nahe dege hene. 7 Mani howa Yaremaia ibu hale halu hearia tigua mbirale uruni taya biyago handa walia nahe ka layago hale howa ibugua ti baba keba howa tihondo lalu, Wali agali mbirame mbirale uruni handa walia nahe dege kane Ngode Datagaliwabehanda ibunaga wali agali dara halu lone mo mogo bu heledangi handa walia holebira. 8 Horo ogoni birangi Ngode Datagaliwabehanda mbirale uruni panaga mo batagi ho ngelolebira. Ani bialu Ngode Datagaliwabenaga wá hongoheore tara bamba Mosese ibugua hendenegobi Kini Solomonohanda Anduane Homogonaga anda loma biahe kago ibunihondo mo loma bialu howa bi lalu hearia mo walia henegobibi mo walia harane hondolebere.*Mbirale Yaremaiahanda bialu hene lalu ayu te ledagoni agali Anduane Homogonaga bi mana latagi haga henerunaga mbuga ngagoha te gili bu wia nabi. Baibolo mbugaha bi nagilibuwi dege. Ai hobane mbirani howa mbuga ala tawe lalu gilibu ngago iname manda nabi kemago ainde mbuga ogoni bambaore ereba hene bada.✡Har 16.10, 1 Kin 8.10-11

9 Inanaga mamalirume te maru ogodagua laya. Agali manda bayalewi Solomono heneyago ibugua Anduane Homogonaga anda gahenge panga dugualu howa horo timbuni ogoningi loma bo delalu heneya. 10 Ani bialu howa ibugua Anduane Homogohondo bi layagola ira dene daligaha howa ibira halu loma wiaru minana dai hene laya. O binidagoni bamba Mosesehanda Anduane Homogohondo bi layagola ira dene minana ibira halu lama wiago dene yadagua dege biniya. 11 Mosesehanda lalu, Loma ogoninaga budini mbira agalime nane wiagome loma ogoni irame daiore haya, leneya. 12 Horo ogoningi Solomono ibu turu timbuni ho howa horo halira lotu dege lalu haabo heneya.

13 Bi ayu iname gilibu wia haramago mbuga mbira Nehemaianaga Te laga ngagoha daga lalu hondolebere, lene.†Mbuga ogoni ayu Baibolo mbuga ngagoha nawigo mbuga ogoni bamba ereba hene bada. Nehemaia ibugua kini henerunaga te mo ngoai howa gilibu wiai halu bi Debidihanda lenegobi agali Anduane Homogonaga bi mana latagi haga henerume gilibu winirubi kini tigua mbirale lotunaga lalu bi laga binirubi bibahende mo ngoai ho winiya. 14 Ani buwa Nehemaiahanda ibu andagaha mo ngoai howa winiya. Mani howa nde Yudasahandabi anidagua dege biniyago irane wai timbuni biaru biyagome mbuga uruni mbira mbiraha wahaga biniyago ainde ibugua lone mo ilu mogobu wigi biniya. Mbuga uruni ayu iname yu kema. 15 Ainde tí mbuga uruni maru daga lole manda birimiyagua nde agali marume mo pu lalimu. Tigua mo yu dai bialu tini ngilo.

16 Ngode Datagaliwabenaga anda ibunihondo mo loma bia holene horo timbuni biago tagira ibiyadago. Ani ibiyadagola tíguabi nde horo ogoni tínaga turu ho holene horo mbira wiabagi hene wilimulonaga iname bi ogoni tí kemiria lo ibilarama.✡1 Mag 4.59 17 Ngode Datagaliwabehanda ina garabaya hemaria haru halu dai biyago nai bialu ina mamalirunaga dindi wiago inanehondo ngiadai biya. Ibugua ina biamogo biyagome kini lone ho dai bialu loma binigo mo miaga agali hearume tinaga biabe bialu haga wiaru lone bialu ha biagola Anduane Homogonaga andaha lotu lolenebi lone wiadai biya. 18 Ainde Ngode Datagaliwabehanda wali agali abaleore dara halu wali agali dindi tara tara ngaruha haga haga bu kemaruni bibahende mo mogo bialu ibunaga dindi ibuhondo mo loma bia hene ngagoria haru dai bulebira lowa iname mini dunubia ho kema. Ibugua mbirale ko tara tara wiaruha hemaria haru dai bialu ibunaga anda kagobi lone mo bayale haya, lene.

19 Ayu iname te lamiyago damene mbirale Yudasa Magabeusuha biyarubi ibu hameneruha biyarubi Anduane Homogonaga anda mo gini bialu biabe bialu henerubi lomabu delaga dabu kago mo loma bia henegonaga tebi lami̱ya 20 Ani bialu wai timbuni Yuda tigua Andiogusu Ebipanese bababi ibu igini Yubadolabi binigonaga tebi hale hami̱ya. 21 Ani bialu Ngode Datagaliwabehanda Yuda wali agali tinaga mana ngago mo hongo holenaga wai bialu henerunaga tebi lami̱ya. Heneneore Yuda dewa ndo dege henego howa tigua waitigi bu hearu bope hai halu tinaga dindi bibahende bo yu dai biai halu waitigi hearu bo taliatagi hai halu bini. 22 Tigua Anduane Homogonaga anda dindi bibahende manda biaihe mini lene biago mo yu dai bini. Ani bialu waitigi Yarusaleme tanoha bu hearu bo hatagi halu bini. Ngode Datagaliwabehanda ibunaga dara holene timbuni inahondo mo walia hayagola birimagoni.

23 Bi Yasono ibugua mbuga taratara duriani gilibu wiyayaru uruni ina mbuga mbiraoreha mo biamaga ho ngelarogoni. 24 Ai mbuga ogoni lu hayagola ainde mali dagabi bi mana marubi mbuga ogoniha mo ngeledema. Ani bidagome bi kuniore ngago mbirale urunime wiapai haragola bi kuni dunini ngago taya bialu handawalia ala awene habe nahe kema. 25 Ina mbuga mbira mbirali mbuga ogoni daga larago ibu turu helobi maru mbirale tara tara ngaru lo manda bu harago ibu lo manda bialu tinaga miniha hengelobi gili bulene manda birigo ai gili bulebero. Ani bialu ayu maru bame daga laga karu biamogo bulene hamelo ko. 26 Bi damenego mo mogobu ngelowa lone mo tubagi holenego awedaga ndo ndelaheore mbira nga. 27 Marungi nde gendabiore wiagola mbiraga u napale biabe biaabo haruli. Mbiralime tomo timbuni wali agali íbu ngoai ho biruwa nole manda manda bialu biagadagua bialu biraruli. Biabe ogoni bulene awedaga ndo nga. Agali mbirago ibugua wali agali ibunaga tomo dawa ngago nalu birule ibiraru ti turu ho berelonaga baya hangu mo manda manda bu ngelaga ka. Manane ogonibi dege bialu ina wali agali mbuga ogoni dagalalu holebiraru mo turu hole manda buwa gili biru. 28 Agali mbuga ogoha te ngago gili binidago ibugua te luore gili lowa gilibu winiya. Anigo ina gili bialu howa mo tubagi howa gili bulene hame ledo. 29 I̱ agali anda biaga mbirame anda bialu howa anda bulene aguaore buleda lowa miniha genda tara tara yu howa bialu hagagobi ndo ko. I̱ agali anda bayale helo mo yári bia halu beni hiragogobi howa bero. 30 Mbirali ibu mamalinaga bi te baya hangu hale hole hamelo heagua nde te gilibu ngaruni baya hangu dagalalu manda bulene nga. Ibugua beba daga layago te ogoni henene binigo ngabe bame dege gilibu winidabe lalu maru karu hale holene nga. 31 Anigo mbirali te i̱na larogodagua lole kago ibugua genda yu holene nawi. Te lo gili nale howa bime mo tubagi howa lolene nga. 32 Anigo ai ogoria haru lalu i̱ninaga te gili bero. Bi damene mo walia halu ledagome te henene lo ngago bu dambi howa mo do holigo ai ogoria haru laro.