1 Oniasa ibu Anduane Homogonaga loma binigo mo miaga agali haguane timbuni heangi wali agali Yarusalemeha bu hearu ti bayale howa tigua bi mana lo wini wiaru baya hangu talialu hene. Oniasa ibu agali lotu lagane mbira howa mana ko bulene ngago damene ibu hame nalaga hene. 2 Kini agali maru dindi tara tara kaundia wiaruha howa Yarusaleme ibugu bialu tigua dabudabu muni dewaoreme yolo miaga wiaru Anduane Homogonaga anda mo yári bia helo migi bini. 3 Esia dindinaga kini mini Selugusu ibugua muni dewaore kini andaga muni wiaga wiagoha wiaru aria agali Anduane Homogonaga loma binigo mo miaga hearu tinaga lotu lalu lomabu delalu biabe biaga wiaruale bulene ngago yolo bigi bilo mini.

4 Ainde agali mbira Biliga aria mini Saimono henego ibu Anduane Homogonaga anda kagonaga gusugusu henego mbirale uruniha ngaru handaya ho haga henego ogoni ibugua loma binigo mo miaga agali haguane timbuni heago baba magedi ngago handaya ho hagane mana tiga nabi wiagola ogoninaga lai lalu hene. 5 Ani lalu howa Saimono ibugua loma binigo mo miaga agali haguane timbuni Oniasa kago ibugua bime bope habe naheyagola ibugua pialu Koelesiria dindinagabi Ponisia dindinagabi agali gabumane haguane Taraseusu igini mini Aboloniusu heago hondo pene. 6 Ani pialu Saimono ibugua Aboloniusuhondo Yarusaleme Anduane Homogonaga anda kagoha muni dewaore mo do ho ngago ogodagua nga lalu lamini. Muni anda biago ngago bibahende agalime daga labe naheore nga. Ani bialu muni uruni wali agalime tinaga loma mini ngago bolangua howa daligaore nga. Ani ngago kini ibugua muni ogoni ibu handaya ho holene erekui nabiore nga, lalu lamini.

7 Aboloniusu ibugua bi ogoni hale halu puwa kinihondo muni ogonidagua nga laya lalu lamiyagola kini ibugua agali mbira mini Heliodorusu ibunaga agali ho bamba hene heago lamialu muni uruni mo pu lene. 8 Ani laya handala Heliodorusu ibu heyalu abale pene. Ibugua ke̱ howa dindi maru Koelesiria tanobi Ponisia tanobi handama ibaga bule poro lalu puwa ibunaga bu miniha biabe henene bule heago wiado howa tara pene tingi halu pene. 9 Ibu puwa Yarusaleme anda piyagola loma binigo mo miaga agali haguane timbuni heagomebi Yarusalemenaga agali haguane bu hearumebi ibunaga mini yaraga hene. Ani biyagola ibugua bi mo do nahe ibu ogoale bule ibiru lalu tihondo latagi hene. Ibugua agali haguane hearuhondo bi Saimonohanda layadago henene layabe bame layabe lalu tihondo hale hene 10 Ani hale hayagola Oniasahanda Heliodorusuhondo lamialu lalu, Í̠na muni ayu te larego ogoni wali dalo ti agalini homene bedaru biamogo biagabi waneigini ti aba nahe karu biamogo biagabi nga. 11 Ani bialu muni uruni aria timbuni Tobaiasa igini Higanusu agali haguane heago ibunaga nga. Muni uruninaga genda magi manda kilogarama daosini nguira (15,000) wialu ngolo kilogarama daosini karia (7,000) nga. Ani ngago ainde agali Saimono ogoninaga bi layadagoni henene ndo layada, lene. 12 Ani lowa laabo halu lalu, Ainde wali agalinaga muni emene ngago ereba hayagua nde ko mbira tagira polebira. Tinaga muni Anduane Homogonaga andaha winidagoni irane anda ogoni mo loma biahene halu dindi bibahendeha mini leneore kago manda bialu winigo nga, lene.

13 Heliodorusu ibu bi Oniasahanda layago hale howa dege ibugua hongo halu muni uruni kininaga muni andaha anda pelo lalu kinihanda bi lo wiyagoria howa lo hongo hene. 14 Ani lowa ibugua horo mbirangi Anduane Homogonaga andaha anda puwa muni mbirale uruni de hondole lalu horo pongo wini. Ani layagola wali agalime mbirale ibugua biagadaru manga timbuni hene. 15 Agali Anduane Homogonaga loma binigo mo miaga hearu tigua tinaga biabe bialu karulaga aga wiaru mo karulowa Anduane Homogonaga lomabu delaga dabu heago kaware be abalu wiagoria palene. Ani paluwa Ngode Datagaliwabehondo wali agalinaga muni ibuhondo loma bia howa Anduane Homogonaga andaha mo wini ogoni baya hangu handaya ho habe lalu tigua bi lalu hene. 16 Wali agali tigua agali Anduane Homogonaga loma binigo mo miaga haguane timbuni heagonaga dengui hondowa ti gi timbuni hai hene. Ibunaga dengui heagome ibu genda yu heago mo walia hene. 17 Ibu gi timbu howa duru lalu heago hondowa wali agali tigua mitangi bialu, Ibu tandaga timbuni ho ka, lo manda bu hene. 18 Ani hondowa wali agali dewaore tini andagaha howa gerai laga laga bialu ibu hondole íbu ngoai hene. Ani buwa tiguabi nde agali ko karume tinaga Anduane Homogonaga anda kagonaga mana ngago pugualino gi timbuni ho howa tigua Anduane Homogohondo bi hongo howa lalu hene. 19 Walime dara ho howa karu lagane agaru karulowa tinaga andu bu yi nahe bame ibagabu hene. Wali uruni dewaore howa tanoha hariga wiaru henge nawiore ti hangu to̱lai hene. Wandari mabuage tini andagaha birado ho biraga berenerume tini andaga wahalu tagira pialu gerai tanonaga wai pabe heagohabi wai pabe panga heagohabi pugu pugu biai hene. Maru tamuha biruwa windoha handatagi hai ho birama pene. 20 Bibahendeme gi doladaga hai halu Anduane Homogohondo bi laiore hene. 21 Dara holene wali agalinaga bu miniha to̱lai hayagaola tigua dindini be abalu wiagoria paluwa Anduane Homogohondo bi hongo howa lalu hene. Anduane Homogonaga loma binigo mo miaga agali haguane timbuni heago ibu gi timbuni ho howa durulalu hene.

22 Anduane Homogohondo muni dabudaburu wali agalime ibunaga andaha ngaru baya hangu handaya ho habe lalu tigua bi hongo howa lalu hene. 23 Tigua Anduane Homogohondo bi ogoni lalu heagola Heliodorusu ibu gi nahe ibu bule manda bu heago bialu hene. 24 Ibuni heba ami agali ibuni mamage haga bu hearu haru halu Anduane Homogonaga andaha muni wiaga wiagoha anda pene. Ani piyagola Ngode Datagaliwabe ibu bibahendenaga hongo haihe howa dindi bibahendeha bu karu handaya ho howa haru hai haga kago ibunime dama timbuni mbira ibiradagua ibini. Ani biyagola agali haguane maru Heliodorusu heba ibiyaru tigua Ngode Datagaliwabenaga hongo gibiore handa walia halu tini luluyu ibagabu hai hene. Ti gi timbuni howa dindini pilo ibiraho wiai hene. 25 Ai Ngode Datagaliwabe ibuni agali hongohe mbira haradagua bialu nogo hosini yári biahe mbirani berearia hendene. Nogo hosi ogonime gerai lalu ibuwa Heliodorusu pogola ba howa geni hengeda hene. Agali nogo hosini biralu ibiyagoni ibunaga wai biagane yári ngolome wabini karu learia de hendene. 26 Ani bialu igiri daliahe kirali Heliodorusu hearia ibiyago hendene. Libu agali hongoheore howa libunaga yári bayaleore karuleago hendene. Agali kira ogonilabome Heliodorusu abene talebu howa mo ko howa balu hebiria hendene. 27 Ibunaga de mborere biyagola ibu dindini odope hene. Ani biyagola ibunaga agali haru hayarume balai anda danginime lebera buwa ogoriani mo pale lowa 28 mo yalu pene. Ani biyagola agali ibunaga ami agali dewaore haru halu muni andaha haru anda pole manda biyago ibuha mo ko holene abale ngola hene. Tigua agali homene tingini mo yu tagira poradagua bini. Ani biyagola Heliodorusu ibugua Ngode Datagaliwabe ibu bibahendenaga hongo haiheore ka lo manda bini.

29 Heneneore Ngode Datagaliwabenaga hongome agali ogoni bope halu dindini paliape helaya. Ani bialu ibu bi labe naheore wialu ibu lone karulapobe nahe wini. 30 Anduane Homogo ibunime agalime nabiaganeale hongohe mbira ibuni andaga biagoha howa biyagonaga Yuda wali agali tigua Ngode Datagaliwabenaga mini mo yaraga halu hene. Pigane wali agalime tinaga miniha genda timbuni ho howa gi halu Anduane Homogonaga andaha ibalu to̱lai hene. Ani binigo mani mo beregedalu gi holene wiyago turu holene timbuniore anda biagoha to̱latagi hene. Ngode Datagaliwabenaga mini yaraga halu henego irane Ngode Datagaliwabe Bibahendenaga Hongo Haiheore kagome ibunaga hongo taraore mo walia hayagonaga turu hene. 31 Agali maru Heliodorusu nenege hearu Oniasa hearia ibuwa Heliodorusu mo ko nahelo Ngode Datagaliwabehondo bi lahabe lama ibini. Ibu homoligo bi lahabe lalu lamini. 32 Ani layagola Anduane Homogonaga loma binigo mo miaga agali haguane timbuni Oniasahanda mitangi bialu Kinihanda Heliodorusu Yuda wali agalime bo wahayada lo manda buligonaga Oniasa ibugua Anduane Homogohondo Heliodorusu biamogo bibe lalu bi la hene. 33 Oniasahanda ko domolenenaga loma bo delalu heagola igiri daliahe kirali biagolabo lone ibini. Libu yári mbiraoregobi karulowa ala hayagobi dege ibini. Libugua ibalu Heliodorusu deni heyu howa ibuhondo lamialu lalu, Anduane Homogonaga loma binigo mo miaga agali haguane timbuni Oniasahondo ka̱i̱ lolene nga. Ibugua loma bo delayagome í̠ Ngode Datagaliwabehanda bo wanahe helo yupe hayago ndobe. 34 Ayu í̠na pialu wali agali bu karu bibahende hale hai helo Ngode Datagaliwabenaga hongo ogobi winiyagome i̱ pani ngialu baya lalu lamima pole pu, lene. Libugua bi ogonidagua lalu libuni pu ereba hene.

35 Ai Ngode Datagaliwabehanda Heliodorusu ibu homelo bo wahabehego nabayagonaga ibugua Ngode Datagaliwabehondo lomabu mini. Ani bialu ibugua Anduane Homogonaga loma binigo mo miaga agali haguane timbuni Oniasala gi tigani bialu kini hearia ibunaga ami agali biaru heba dai bini. 36 Dai buwa Heliodorusu ibugua te bibahende Ngode Datagaliwabe Daligaorene Daliga kagome agalime nabiagane ale ibuni deme hondo heagola biyaru bibahende wali agali hale hai helo lamiai hene. 37 Ai kini ibugua Heliodorusu hale halu, Ibugua agali abialeme Yarusaleme pu lolene karulapebe lalu hale hayagola Heliodorusuhanda ladai bialu lalu, 38 Agali í̠naga waitigi ho mbira heaguabi í̠naga gabumane mo ko hole manda bu mbira heaguabi ogoniale kago dindi ogoniha pelo pu labe. Ani pelaregola ibu pu ereba nahe bayale dai biyagua nde mbirale tibume bo baulo wahe mbira ibiradagua bialu ibulebira Ngode Datagaliwabenaga hongo tara mbirame ibunaga anda ogoni mamage haga heagome ina bame agali dege kamarume polenego nakarulapeya. 39 Ainde Ngode Datagaliwabe dahuliya andagaha haga kagome ibunaga anda ogoni baya hangu mamage ho haga mbira wia. Ani wiagola agali mbira ibula mini ko wuyu ibirago mo ko howa minu bagaya, lalu lamini. 40 Ai Ngode Datagaliwabehanda Heliodorusu mini balu ibunaga andaha muni wiago baya hangu handaya ho henegonaga te ogoni hangu.