Haru Tagira Penego
Mbuga ogoha gilibu ngarunaga nemandi ogo
Mbuga ogoni mini Haru Tagira Penego laga irane Isaraele wali agali Iyibi dindiha howa garabaya biabe ale bialu henego golope halu haru tagira pialu Kenana dindi pole penego manda buwa laga.
Mbuga ogoniha bi dunini halu tebo gilibu nga.
Mbira
Be 1–18 Isaraele wali agalirume Iyibinaga garabaya biabe ale bia haga henego Anduane Homogohanda Moseseha howa golope halu haru puwa dindi yobini pialu Hari Sainai anda penego te gilibu nga.
Mende
Be 19–24 Hari Sainai heagoria Anduane Homogo ibugua Habo Nalolene Bi lo wialu mana bulenebi nabulenebi Isaraele wali agali mo tiga bialu tigua mana bayale bilo tihondo lamigi binigonaga te gilibu nga.
Tebone
Be 25–40 Anduane Homogo ibu ti heba ka manda bilonaga Balai Anda wabu helolenebi loma binigo mo miaga agali dabo helolenebi wali agalime Anduane Homogo mitangi bialu mo dunini howa lotu lolenebi mana uruni lowigi bialu gilibu nga.
Isaraele wali agali Iyibi dindi howa haru tagira pelobi Kenana dindiha puabo helobi Anduane Homogohanda Mosese ibu ti haru haga helo dabo helene.
Anduane Homogohanda ibunaga wali agali garabaya howa golope halu ti ibu mini yaraga helobi ti mini mo hongo helobi mini dunubia helobi biamogo bialu golope henego te duniniore ogoni gilibu nga.
Bu̱lu̱ baga buwa kuni gilibu ngago
1.1–15.21
Isaraele wali agaliru Iyibi dindi howa golope henego
1.1-22
Iyibi dindiha howa garabaya biabe ale bia halu henego
2.1–4.31
Mosese taba henenegobi ibugua bialu henegobi
5.1–11.10
Mosese Aronola Iyibinaga kini heago deni puwa bi lenego
12.1–15.21
Bolangua Halu Penegonaga tomo nalu Iyibi dindi yu wahalu penego 15.22–18.27
Iba solowara mini Daramabi domalu Hari Sainai penego 19.1–24.18
Bi Pira gilibu minigobi Habo nalolene Bi lo winigobi lo ngago 25.1–40.38
Habo Nalolene bi lenegonaga Balai Andabi Anduane Homogo mitangi bialu mo dunini howa lotu lolenebi te gilibu nga
1
Iyibi wali agali hearume Isaraele wali agali mo ko henego ogo
1 Yagaba iginiru ti one waneigini heba Iyibi dindi pole Yagaba heba peneru uru.✡Pig 46.8-27 2 Lubene Simiono Libai Yuda 3 Isaga Sebulunu Beniyamini 4 Dana Nabadali Gada Ase imaru pene. 5 Wali agali o penedaruni Yagaba ibunioreha howa tagira penego pira karia (70) pene. Ibu igini Yosebe ibu Iyibi dindi abale pu heaha ti mani pene. 6 Ani pu howa Yosebe ibu hamenerubi wali agali dabane ogoni aria ti mandagi henerubi homai hene.
7 Tini homalu tigua hono wiyagome Isaraele hameigini palene. Isaraele hameiginime hono tawe hama piyagola dewaore hapaya bialu Iyibi dindi ti dege ho namulene.✡Ab 7.17
8 Ani bialu heagola agali gahenge mbira Yosebe manda nabinime Iyibi wali agalinaga kini ho aribia hene.✡Ab 7.18 9 Ani howa ibugua ibunaga Iyibi wali agalihondo lalu, Isaraele wali agali o íbu karuni ti hongo gibihe ina dindi wirimagoni ti dege dindi halu hapaya bidagome ina babehe hiriribi kama. 10 Ina agali baba wai beramangi tigua ina napele ngulebira. Ti wai mendegoha anda puwa ina badai bialu dindi wahalu pole o íbu karuni. Ani bule kago manda buwa o karuni ti ho timbu halu ho dame nabilonaga iname mbira agi bibehedabe handami̱ya, lene.✡Ab 7.19
11 Ani lowa Iyibi wali agalime agali ko handabe mangabi wali agali garabaya biabe ale bilo mo miaga hearu dabowa urunime haru helo helene. Biabe wiarunime Isaraele wali agalinaga mini tinginibi bo gangu lelonaga biabe erekuibiore mo mini. Ani mo miyagola Isaraele wali agalime anda dewa buhe tano timbuni kira Pidomo Lamesela kini biago ibu dabudabu wilonaga bia hene. 12 Iyibi wali agalime Isaraele wali agali hengedalu mo emene hole biyagola Isaraele wali agali ti ho dame biaho wialu Iyibi dindi wiagoriani ti dege ho yu lama pene. Ani biyagola hondowa Iyibi wali agali ti Isaraele wali agali handalu gi howa 13-14 Isaraele wali agali mo genda halu hengedapeore holenaga garabaya biabe ale koore mangabiru mo bia hene. Iyibi wali agali tinaga ege timeni andaru biaha mabu biaberu biaha bigi bilalu dara naheore garabaya biabe ale gibiru mo migi bini.
15 Ani bialu howa Iyibinaga kini biagome wali kira Pua Sibarala libu Isaraele wali waneigini gali taba henelo biamogo biaga berenego ogonilabo lamialu lalu, 16 Isaraele wali gali taba henelo biamogo bigi berabingi igiri taba hanayagua bo wahaga bialu wandariyagua berelalibu lene. 17 Ani lamiyagoyu wali biago libu Anduane Homogohondo giho biraga berenegome kini biagome layadagua nabi igiri taba hanaga biyago nabe wahene.✡Har 1.21 18 Ani bira layago hale howa kini biagome wali biago labo hondo pudaba lowa ibiyagola libuhondo lalu, Igiri taba hanarago bo wahaga bilibu larugo nabe wahalu helaga biribiyago aginagabe, lene.
19 Ani layagola libugua ladai bialu lalu, Hiburu waliru ti Iyibi wali ale ndo beda. Ti waneigini baya hanguore mbira mo ko nahe taba hanaga biaga. Iyame biamogo bule lowa pialu kabaria abale tini taba hono bedaria pugu berabali. 20-21 Wali gali biamogo biaga biagolabo libu Ngode Datagaliwabe ibuhondo gi howa mana tigabi bialu bereago hondowa Ngode Datagaliwabehanda libuhondo bayale bialu libuni nde waneigini helo biamogo bini. Ani bialu Isaraele wali agali ti timbuni halu hongohe hene. 22 Aniore biyago hondowa kini biagome ibunaga wali agali bibahendehondo, O larogodaguaore bilimu, lowa lalu, Hiburu walime wandari taba hanarago berelowa igiri taba hanarago bibahende abale minuwa iba Nailiha bape halimu, lene.✡Ab 7.19